AKP ភ្នំពេញ ថ្ងៃ១៩ ខែសីហា ឆ្នាំ២០២៥-- លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជាតំណាងដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នារសៀលទី១៨ ខែសីហា ឆ្នាំ២០២៥ បានទទួលជួបពិភាក្សាការងារជាមួយ ឯកឧត្តម ហ្វៃយ៉ា មើស៊ីត កាហ្សី (Faiyaz Murshid Kazi) អគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតបង់ក្លាដែស ដែលមាននិវាសដ្ឋាននៅក្នុងប្រទេសថៃ និងគណៈប្រតិភូ នៅទីស្នាក់ការកណ្តាលកាកបាទក្រហមកម្ពុជា។

ឯកឧត្តម ហ្វៃយ៉ា មើស៊ីត កាហ្សី  បានលើកឡើងថា ជំនួបនេះមានគោលបំណងយល់អំពីដំណើរកា     រការងារកាកបាទក្រហមកម្ពុជាឱ្យច្បាស់ដើម្បីស្វែងរកកិច្ចសហប្រតិបត្តិការ ដោយផ្តោតទៅលើ ការជួយផ្នែកមនុស្សធម៌ចំពោះពលករចំណាកស្រុកបង់ក្លាដែសដែលបានមកធ្វើការនៅប្រទេសកម្ពុជា ការផ្តល់ជំនួយថ្នាំពេទ្យរបស់បង់ក្លាដែសដល់កាកបាទក្រហមកម្ពុជា ការឆ្លើយតបគ្រោះមហន្តរាយ និងការស្តារឡើងវិញ។ ស្របទៅតាមអនុសាសន៍ណែនាំដ៏ខ្ពង់ខ្ពស់របស់សម្តេចតេជោ ហ៊ុន សែន បញ្ជាក់ថា ប្រសិនបើក្នុងពេលឯកឧត្តមអញ្ជើញមកព្រះរាជាណាចក្រកម្ពុជា សូមឯកឧត្តមអញ្ជើញជួបខាងកាកបាទក្រហមកម្ពុជា ដើម្បីបានព័ត៌មានច្រើនស្តីពីអ្វីដែលកាកបាទក្រហមកម្ពុជា បានធ្វើ និងកំពុងធ្វើ។ 

លោកជំទាវ ម៉ែន នារីសោភ័គ បានជម្រាបជូនឯកឧត្តមអគ្គរដ្ឋទូតថា បច្ចុប្បន្នទន្ទឹមនឹងគ្រោះមហន្តរាយទឹកជំនន់គឺការងារដែលពាក់ព័ន្ធនឹងសហព័ន្ធអន្តរជាតិគឺកាកបាទក្រហមកម្ពុជាអនុវត្តទៅលើកម្មវិធីមួយហៅថា «ការប្រកាសផ្តល់ព័ត៌មានជាមុនស្តីពីគ្រោះមហន្តរាយ» ដែលនៅក្នុងកិច្ចសហប្រតិបត្តិការនេះសហព័ន្ធអន្តជាតិបានធ្វើការជាមួយ UNDP ហើយកាកបាទក្រហមកម្ពុជា បានចូលរួមចំណែកក្នុងការអនុវត្តកម្មវិធីនេះក្នុងការផ្តល់ព័ត៌មានជាមុនពីទឹកជំនន់ ដោយនៅក្នុងការអនុវត្តនេះ កាកបាទក្រហមកម្ពុជាបានបណ្តុះបណ្តាលមន្ត្រីតាមសាខាស្តីអំពីការផ្តល់ព័ត៌មានជាមុនអំពីទឹកជំនន់ និងអនុវត្តជំហានជាបន្តបន្ទាប់ទៀត។ ស្របជាមួយគ្នានេះក្នុងស្ថានភាពតានតឹង និងនៅពេលបច្ចុប្បន្នរយៈពេលនៃបទឈប់បាញ់រវាងកម្ពុជា និងថៃ កាកបាទក្រហមកម្ពុជាបានចូលរួមផ្សព្វផ្សាយអប់រំដល់ប្រជាពលរដ្ឋភៀសសឹកនៅតាមមណ្ឌលសុវត្ថិភាពអំពីមីន យុទ្ធភណ្ឌមិនទាន់ផ្ទុះ គ្រាប់បែកចង្កោម អាវុធគីមី សុខភាពអនាម័យ ការប្រើប្រាស់ទឹកស្អាត ការបរិភោគទឹកឆ្អិនការសម្រាកក្នុងមុង ដើម្បីចៀសផុតពីជំងឺគ្រុនឈាម និងជំងឺគ្រុនចាញ់ ជាមួយនឹងការអប់រំអំពីសុខភាពមាតា ទារក និងកុមារ អំពីជំងឺឆ្លងនិងជំងឺមិនឆ្លងនានា ព្រមទាំងការអប់រំអំពីការថែទាំសុខភាពផ្លូវចិត្តផងដែរ។

លោកជំទាវក៏បានជម្រាបជូនឯកឧត្តមអគ្គរដ្ឋទូតផងដែរថា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់មន្ត្រីចុះសួរសុខទុក្ខគ្រួសារយុទ្ធទាំង១៨នាក់ ដែលនៅក្នុងការគ្រប់គ្រងរបស់ភាគីថៃ និងបានឱ្យក្រុមគ្រួសារពួកគាត់សរសេរសារលិខិតដំណឹងគ្រួសារកាកបាទក្រហម ដើម្បីផ្ញើទៅយុទ្ធជនទាំង១៨នាក់តាមរយៈគណៈកម្មាធិការអន្តរជាតិនៃកាកបាទក្រហមផងដែរ។

ជាការឆ្លើយតប ឯកឧត្តមអគ្គរដ្ឋទូតបង់ក្លាដែសបានស្នើដល់កាកបាទក្រហមកម្ពុជា ប្រសិនបើបានជួបប្រទះជនជាតិបង់ក្លាដែសដែលជាពលករមកធ្វើការនៅកម្ពុជាត្រូវបានជម្លៀសខ្លួនក្នុងពេលមានជម្លោះប្រដាប់អាវុធថៃនឹងកម្ពុជាប្រមាណ១៣០នាក់ និងមានខ្លះផ្សេងទៀតកំពុងជាប់ឃុំនៅមណ្ឌលអប់រំកែប្រែ សូមឱ្យមានការគិតគូរដល់ពួកគេលើផ្នែកមនុស្សធម៌ផង។ បន្ថែមពីនេះឯកឧត្តមអគ្គរដ្ឋទូតចង់ឱ្យមានកិច្ចសហប្រតិបត្តិការជាមួយគ្នា ដោយខាងភាគីបង់ក្លាដែសមានជាថ្នាំពេទ្យ ដែលនាំចូលពីបង់ក្លាដែសមក ហើយបើមានសំណូមពរ ឬតម្រូវការអ្វីដែលថ្មីគាត់ និងអាចជួយឧបត្ថម្ភផងដែរ៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)