AKP ភ្នំពេញ ថ្ងៃទី០៨ ខែសីហា ឆ្នាំ២០២៥-- ពុទ្ធិកវិទ្យាល័យព្រះសុរាម្រឹត វត្តបទុមវតីរាជវរារាមសាលាគណរាជធានីភ្នំពេញ បានដឹកនាំព្រះសង្ឃ និងប្រជាពុទ្ធបរិស័ទជាង១០០០អង្គ/នាក់ បានរៀបចំពិធីបុណ្យទក្ខិណានុប្បទានបង្សុកូល និងប្រគេនចង្ហាន់ ព្រះសង្ឃសមណសិស្ស ដើម្បីឧទ្ទិសមហាកុសលជូនវីរកងទ័ពខ្មែរដែលបានពលីជីវិត ដើម្បីបុព្វហេតុការពារបូរណភាពទឹកដីខ្មែរ។

ពិធីនេះបានរៀបចំធ្វើឡើងក្រោមវត្តមានឯកឧត្ដម ចាយ បូរិន រដ្ឋមន្ត្រីក្រសួងធម្មការ និងសាសនា និងមានការចូលរួមពីព្រះសង្ឃ និងប្រជាពុទ្ធបរិស័ទជាង១០០០អង្គ/នាក់ ដែលបានប្រារព្ធនៅវត្តបទុមវតីរាជវរារាម សង្កាត់ចតុមុខ ខណ្ឌដូនពេញ រាជធានីភ្នំពេញ ថ្ងៃទី០៨ ខែសីហា ឆ្នាំ២០២៥។

ក្នុងពិធីនេះ មានការធ្វើនមស្ការព្រះរតនត្រ័យ និងសមាធិ៣០នាទី សមានទានសីល និងវេរភត្តាហារប្រគេនព្រះសង្ឃ សមណសិស្ស ព្រះសង្ឃ បានធ្វើភត្តានុមោទនា បង្សុកូលប្រមូលបុណ្យកុសលឧទ្ទិស ដល់វិញ្ញាណក្ខន្ធវីរកងទ័ពខ្មែរ ដែលបានពលីជីវិតក្នុងការការពារបូរណភាព ទឹកដី ដើម្បីសេចក្តីសុខសន្តិភាព ស្ថេរភាព និងភាពសុខសាន្តរបស់ប្រជាពលរដ្ឋខ្មែរជាយូរអង្វែងតរៀងទៅ៕

ដោយ សួស សំរិត