AKP បន្ទាយមានជ័យ ថ្ងៃទី០៨ ខែសីហា ឆ្នាំ២០២៥-- ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និងលោក ខួង សុភ័ក្ត្រ តំណាងអង្គការ Good Neighbors បានចុះសួរសុខទុក្ខ និងនាំយកអំណោយចែកជូនដល់បងប្អូនប្រជាពលរដ្ឋចំនួន៩៣៨គ្រួសារ ដែលបានជម្លៀសខ្លួនពីតំបន់តាមបណ្តោយព្រំដែន មកកាន់ទីទួលសុវត្ថិភាពបណ្តោះអាសន្ននៅភូមិសិលាខ្មែរ ឃុំអូរបីជាន់ ស្រុកអូរជ្រៅ ដោយពិធីប្រព្រឹត្តទៅនាព្រឹកថ្ងៃទី០៨ ខែសីហា ឆ្នាំ២០២៥ ដោយមានការចូលរួមពីមន្ត្រីជាន់ខ្ពស់ជាច្រើនរូបទៀត។ ការចុះជួបសំណេះសំណាល និងចែកអំណោយនេះ ធ្វើឡើងក្នុងបរិបទដែលប្រជាពលរដ្ឋតាមតំបន់ព្រំដែនកម្ពុជា-ថៃមួយចំនួន បានជម្លៀសខ្លួនដើម្បីគេចចេញពីផលប៉ះពាល់នៃសង្គ្រាម ដែលធ្វើឱ្យជីវភាពរស់នៅរបស់ពួកគាត់ជួបការលំបាកយ៉ាងខ្លាំង។

ក្នុងឱកាសនោះ ឯកឧត្តម អ៊ុំ រាត្រី បានថ្លែងអំណរគុណយ៉ាងជ្រាលជ្រៅចំពោះអង្គការ Good Neighbors ដែលបានចូលរួមយ៉ាងសកម្មជាមួយអាជ្ញាធរខេត្តក្នុងការជួយសម្រាលបន្ទុក និងដោះស្រាយការលំបាករបស់ប្រជាពលរដ្ឋដែលរងគ្រោះដោយសារសង្គ្រាម។ អំណោយទាំងនេះមិនត្រឹមតែជាការផ្តល់ជំនួយសម្ភារប៉ុណ្ណោះទេ តែក៏បង្ហាញពីទឹកចិត្តសាមគ្គី និងការយកចិត្តទុកដាក់របស់រាជរដ្ឋាភិបាល និងដៃគូអភិវឌ្ឍន៍ចំពោះសុខុមាលភាពរបស់ប្រជាជន។

លោក ខួង សុភ័ក្ត្រ តំណាងអង្គការ Good Neighbors ក៏បានបង្ហាញពីការប្តេជ្ញាចិត្តរបស់អង្គការក្នុងការបន្តសហការជាមួយរាជរដ្ឋាភិបាលកម្ពុជា ក៏ដូចជាអាជ្ញាធរខេត្តបន្ទាយមានជ័យ ដើម្បីចូលរួមចំណែកជួយដល់ជនភៀសខ្លួនទាំងនេះ។ ការជួយសម្រួលដល់ជីវភាពប្រចាំថ្ងៃរបស់ប្រជាពលរដ្ឋដែលភៀសខ្លួនពីសង្គ្រាម គឺជាបេសកកម្មមួយក្នុងចំណោមបេសកកម្មសំខាន់ៗរបស់អង្គការ ដែលផ្តោតលើការផ្តល់ជំនួយសង្គ្រោះបន្ទាន់ដល់ប្រជាជនដែលរងគ្រោះ និងងាយរងគ្រោះ។

សូមជម្រាបថា ពិធីនេះមានការអញ្ជើញចូលរួមពីលោកជំទាវ នួម សុភ័ណ តំណាងរាស្ត្រមណ្ឌលខេត្តបន្ទាយមានជ័យ លោក លី សុវណ្ណណារិទ្ធ អភិបាលរងខេត្ត និងក្រុមការងាររាជរដ្ឋាភិបាលចុះមូលដ្ឋានស្រុកអូរជ្រៅ រួមទាំងមន្ត្រីរាជការ និងអាជ្ញាធរមូលដ្ឋានគ្រប់លំដាប់ថ្នាក់ផងដែរ។ ការចូលរួមពីគ្រប់ភាគីទាំងអស់នេះបានឆ្លុះបញ្ចាំងពីស្មារតីសាមគ្គីភាព និងការប្តេជ្ញាចិត្តរួមគ្នាក្នុងការដោះស្រាយបញ្ហាប្រឈមរបស់សហគមន៍ ជាពិសេសក្នុងគ្រាអាសន្ន។

អំណោយដែលបានចែកជូននៅពេលនោះដូចជាសម្ភារ គ្រឿងឧបភោគបរិភោគ និងគ្រឿងប្រើប្រាស់ចាំបាច់ផ្សេងៗទៀត ដែលអាចជួយសម្រាលទុក្ខលំបាករបស់ប្រជាពលរដ្ឋបានមួយកម្រិតក្នុងអំឡុងពេលស្នាក់នៅបណ្តោះអាសន្ននេះ៕

ដោយ ឈុន សារ៉ាត