AKP ភ្នំពេញ ថ្ងៃទី០៨ ខែសីហា ឆ្នាំ២០២៥-- ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងក្រុមការងារ  នៅថ្ងៃទី០៦ ដល់ថ្ងៃទី០៧ ខែសីហា ឆ្នាំ២០២៥ សហការជាមួយអាជ្ញាធរមូលដ្ឋានបានចុះពិនិត្យស្ថានភាពភាពដំណាំដែលទទួលរងផលប៉ះពាល់ដោយសារគ្រោះទឹកជំនន់ទន្លេមេគង្គ ក្នុងខេត្តកំពង់ចាម និងខេត្តត្បូងឃ្មុំ។

ឯកឧត្តមរដ្ឋលេខាធិការបានឱ្យដឹងថា ខេត្តកំពង់ចាម ផ្ទៃដីដែលទទួលរងផលប៉ះពាល់ក្នុងស្រុកស្ទឹងត្រង់លើដំណាំស្រូវសរុប១៧០ហិកតា ខូតខាត១៥៣ហិកតា និងពោតសរុប១៧៤ហិកតា ខូចខាត១៥៣ហិកតា និងក្នុងស្រុកកោះសូទិនលើដំណាំពោតសរុប១២៣ហិកតា ខូចខាត៧៩ហិកតា។ ភាគច្រើនស្រូវស្ថិតនៅក្នុងដំណាក់កាលពង្រោះ។ ស្ថានភាពប៉ះពាល់ខូចខាតដំណាំពោត ស្ថិតក្នុងដំណាក់កាលទុំ ៧៥%-៨៥% និង៥៩ហិកតា បានប្រមូលផល។

សូមជម្រាបជូនថា មន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម នឹងបន្តចុះសហការជាមួយមន្ត្រីការិយាល័យកសិកម្ម ធនធានធម្មជាតិ និងបរិស្ថានស្រុក អាជ្ញាធរមូលដ្ឋាន និងអ្នកពាក់ព័ន្ធ ដើម្បីចុះពិនិត្យតាមដានស្ថានភាពដំណាំបន្តទៀត។

ខេត្តត្បូងឃ្មុំ ផ្ទៃដីដែលទទួលរងផលប៉ះពាល់ក្នុងស្រុកក្រូចឆ្មារលើដំណាំស្រូវសរុប៨៣៧ហិកតា ខូតខាត៥៥ហិកតា ពោតសរុប២១៩៩ហិកតា និងល្ងសរុប៨ហិកតា និងស្រុកត្បូងឃ្មុំលើដំណាំស្រូវសរុប១២៦៦ហិកតា ខូចខាត១១៣៤ហិកតា ពោតសរុប៣៣៩ហិកតា ខូចខាត៤០ហិកតា បន្លែសរុប៣ហិកតា ខូចខាត៣ហិកតា និងឈូកសរុប៦២ហិកតា ខូចខាត២២ហិកតា។ តំបន់ដែលជន់លិច ស្ថិតក្នុងតំបន់ទំនាបដែលងាយរងការជន់លិចពីរបបទឹកទន្លេមេគង្គ។ កសិករមិនទាន់អាចដាំដុះបានទេ ដោយត្រូវរង់ចាំរហូតដល់ទឹកស្រកទៅវិញ ទើបអាចធ្វើការដាំដុះដំណាំជាថ្មីបាន។

ទន្ទឹមនឹងនេះ ឯកឧត្តមបានណែនាំដល់មន្ទីរកសិកម្ម រុក្ខាប្រមាញ់ និងនេសាទខេត្ត ឱ្យសហការជាមួយអាជ្ញាធរមូលដ្ឋាន ដោយកំណត់ទីតាំងទាំងនោះជាតំបន់ងាយរងគ្រោះ និងធ្វើការផ្សព្វផ្សាយជាទៀងទាត់នៅរាល់ចុងរដូវប្រាំង ដើម្បីឱ្យកសិករធ្វើការពិចារណាហ្មត់ចត់ មុនធ្វើការសម្រេចចិត្តដាំដុះ៕

ដោយ៖ ពេជ្រ សំអឿន (ប្រភព៖ ក្រសួងកសិកម្ម រុក្ខាប្រមាញ់ និងនេសាទ)