AKP កណ្ដាល ថ្ងៃទី០៨ ខែសីហា ឆ្នាំ២០២៥-- រដ្ឋបាលខេត្តកណ្ដាល នៅថ្ងៃទី០៧ ខែសីហា ឆ្នាំ២០២៥ បានរៀបចំពិធីចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋចំនួន១៤ភូមិ សរុបចំនួន ១១ ៥៣៩ បណ្ណ ស្ថិតនៅឃុំព្រែកតាមាក់ និងឃុំកោះចូរ៉ាម ស្រុកខ្សាច់កណ្តាល ខេត្តកណ្តាល ក្រោមអធិបតីភាពឯកឧត្តម មាន ចាន់វណ្ណនី អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងឯកឧត្តម គួច ចំរើន អភិបាលខេត្តកណ្តាល នៅបរិវេណវត្តសុវណ្ណវត្តី ភូមិព្រែកតាមាក់ ឃុំព្រែកតាមាក់ ស្រុកខ្សាច់កណ្តាល ខេត្តកណ្ដាល។

មានប្រសាសន៍សំណេះសំណាលនាឱកាសនោះ ឯកឧត្តម គួច ចំរើន អភិបាលខេត្តកណ្ដាល បានកោតសរសើរដល់មន្ត្រីសូរិយោដីគ្រប់ជាន់ថ្នាក់ ដែលបានយកចិត្តទុកដាក់អនុវត្តការងារចុះបញ្ជីដីធ្លីមានលក្ខណៈជាប្រព័ន្ធបានយ៉ាងល្អប្រសើរ ឈានដល់ការចែកបណ្ណកម្មសិទ្ធិនាឱកាសនេះ។ ទន្ទឹមនឹងនេះ ក៏ដោយមានការចូលរួមពីអាជ្ញាធរគ្រប់លំដាប់ថ្នាក់ ពិសេសការចូលរួមរបស់ប្រជាពលរដ្ឋ ទើបយើងអាចកសាងឯកសារ និងឈានដល់ការចេញបណ្ណកម្មសិទ្ធិជូនកម្មសិទ្ធិករទាំងអស់។

ក្រោមការដឹកនាំរបស់សម្ដេចតេជោ អតីតនាយករដ្ឋមន្ត្រី និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ការគ្រប់គ្រងដីធ្លីគឺពិតជាសារៈសំខាន់សម្រាប់ប្រជាពលរដ្ឋ ក្នុងការស្នាក់នៅ និងប្រើប្រាស់តាមតម្រូវការផង និងកាត់បន្ថយទំនាស់ដីធ្លីនៅក្នុងមូលដ្ឋាន ដូច្នេះទើបរាជរដ្ឋាភិបាលជំរុញក្នុងការចុះបញ្ជីដីធ្លីជូនប្រជាពលរដ្ឋឱ្យបានឆាប់។

ក្នុងឱកាសនោះ ឯកឧត្តមអភិបាលខេត្តកណ្ដាលបានអំពាវដល់បងប្អូនប្រជាពលរដ្ឋ ក្រោយពេលទទួលបាននេះហើយសូមរក្សាទុក និងយកទៅប្រើប្រាស់ឱ្យបានត្រឹមត្រូវ ដើម្បីប្រកបមុខរបរចិញ្ចឹមជីវិតរបស់យើងប្រចាំថ្ងៃ៕

ដោយ ណយ នឿន (ប្រភព៖ រដ្ឋបាលខេត្តកណ្តាល)