AKP ភ្នំពេញ ថ្ងៃទី០៥ ខែសីហា ឆ្នាំ២០២៥ --លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិកម្ពុជាបានថ្លែងបញ្ជាក់ថា នៅឯប្រទេសម៉ាឡេស៊ីនៅពេលនេះគណៈប្រតិភូក្រុមលេខាធិការគណៈកម្មាធិការកិច្ចការព្រំដែនទូទៅកម្ពុជា-ថៃ (GBC) កំពុងបន្តកិច្ចប្រជុំផ្ទៃក្នុង ដើម្បីពិភាក្សាបន្ថែមទៀតក្នុងការជំរុញប្រសិទ្ធភាព និងភាពជឿជាក់អំពីការអនុវត្តកិច្ចព្រមព្រៀងឈប់បាញ់ និងការកសាងទំនុកចិត្តគ្នា។ ការថ្លែងបញ្ជាក់របស់លោកជំទាវឧត្ដមសេនីយ៍ឯក អ្នកនាំពាក្យក្រសួងការពារជាតិកម្ពុជាបែបនេះ ក្នុងសេចក្តីសង្ខេបព័ត៌មានប្រចាំថ្ងៃស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាព្រឹកថ្ងៃទី០៥ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។

លោកជំទាវ ឧត្តមសេនីយ៍ឯក ម៉ាលី សុជាតា បានបញ្ជាក់ថា កិច្ចប្រជុំក្រុមលេខាធិការគណៈកម្មាធិការកិច្ចការព្រំដែនទូទៅកម្ពុជា-ថៃ (GBC) នេះបានធ្វើឡើងពីថ្ងៃទី០៤ ដល់ថ្ងៃទី០៦ ខែសីហា ឆ្នាំ២០២៥ មុននឹងកិច្ចប្រជុំវិសាមញ្ញគណៈកម្មាធិការកិច្ចការព្រំដែនទូទៅកម្ពុជា-ថៃ (GBC) ដែលគ្រោងធ្វើឡើងនៅពេលបន្ទាប់គឺនៅថ្ងៃទី០៧ ខែសីហា ឆ្នាំ២០២៥។ ពាក់ព័ន្ធនឹងស្ថានភាពនៅតំបន់អានសេះ អ្នកនាំពាក្យក្រសួងការពារជាតិកម្ពុជាបានអះអាងសារជាថ្មីរបស់ភាគីកម្ពុជានូវការប្តេជ្ញាចិត្តយ៉ាងពេញលេញចំពោះកិច្ចព្រមព្រៀងបទឈប់បាញ់ដែលសម្រេចបាន តាមរយៈកិច្ចខិតខំប្រឹងប្រែងរបស់ឯកឧត្តម ដូណាល់ ត្រាំ ប្រធានាធិបតីសហរដ្ឋអាមេរិក រួមនឹងឯកឧត្តម អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី ដែលមានការចូលរួមយ៉ាងសកម្មពីតំណាងសាធារណរដ្ឋប្រជាមានិតចិន ដែលបទឈប់បាញ់នេះគឺទទួលបានការគាំទ្រ និងស្វាគមន៍យ៉ាងទូលំទូលាយពីសហគមន៍អន្តរជាតិ និងបានឆ្លុះបញ្ចាំងពីបំណងរួមសម្រាប់សន្តិភាពក្នុងតំបន់។ លោកជំទាវ ឧត្តមសេនីយ៍ឯក ម៉ាលី សុជាតា បានសង្កត់ធ្ងន់ថា ក្នុងនាមជាប្រទេសដែលមានទំនួលខុសត្រូវខ្ពស់ និងស្រឡាញ់សន្តិភាព កម្ពុជាតែងបានប្រកាន់ខ្ជាប់នូវលក្ខខណ្ឌនៃបទឈប់បាញ់ដោយការជ្រើសរើសយកការសន្ទនា និងកិច្ចសហប្រតិបត្តិការ ដោយមិនរើសយកការប្រឈមមុខ ដាក់គ្នាក្នុងជម្លោះឡើយ។ លោកជំទាវ ឧត្តមសេនីយ៍ឯកបានគូសបញ្ជាក់ថា ការប្រកាន់ខ្ជាប់យ៉ាងមុតមាំរបស់កម្ពុជាចំពោះកិច្ចព្រមព្រៀងនៃបទឈប់បាញ់នេះគឺចង់បង្ហាញពីការគោរពចំពោះកិច្ចខិតខំប្រឹងប្រែងដោយមិន ចេះនឿយហត់របស់មិត្តអន្តរជាតិ និងបំណងប្រាថ្នារបស់កម្ពុជាក្នុងការរួមចំណែកដល់ការរកសន្តិភាព និងស្ថិរភាពយូរអង្វែងនៅក្នុងតំបន់។ ប៉ុន្តែជាការគួរឱ្យសោកស្តាយដោយនៅវេលាម៉ោង១១ព្រឹក នាថ្ងៃទី០៤ ខែសីហា ឆ្នាំ២០២៥ កងកម្លាំងប្រដាប់អាវុធថៃអមដោយគ្រឿងចក្រធុនធ្ងន់បានចល័តចូលមកក្នុងតំបន់អានសេះដែលជាដែនអធិបតេយ្យរបស់កម្ពុជា ហើយថែមទាំងបានរាយលួសបន្លា បើទោះបីជាមានការហាមឃាត់ពីកងកម្លាំងកម្ពុជាយ៉ាងណាក្តី៕

ដោយ៖ ចាន់ សុភឿន