AKP ភ្នំពេញ ថ្ងៃទី០៥ ខែសីហា ឆ្នាំ២០២៥--​ កម្ពុជាបានស្នើឱ្យភាគីថៃ ដែលកំពុងរំលោភលើដែនអធិបតេយ្យកម្ពុជាធ្វើការរុះរើលួសបន្លា និងដកចេញនូវគ្រឿងចក្ររបស់ខ្លួនចេញពីដែនអធិបតេយ្យរបស់កម្ពុជាជាបន្ទាប់។ នេះបើតាមការបញ្ជាក់របស់ លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ ក្នុងសន្និសីទសារព័ត៌មាន ស្ដីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាព្រឹកថ្ងៃទី០៥ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។

លោកជំទាវ ឧត្តមសេនីយ៍ឯក ម៉ាលី សុជាតា បានបញ្ជាក់ថា បទឈប់បាញ់រវាងកម្ពុជា -ថៃ កាលពីថ្ងៃទី ២៨ ខែកក្កដា ឆ្នាំ២០២៥ ត្រូវបានការគាំទ្រនិងសា្វគមន៍យ៉ាងទូលំទូលាយពីសហគមន៍អន្តរជាតិ និងឆ្លុះបញ្ចាំងពីបំណងរួម សម្រាប់សន្តិភាពក្នុងតំបន់។ លោកជំទាវ ឧត្តមសេនីយ៍ឯកបានលើកឡើងថា ក្នុងនាមជាប្រទេសដែលមានទំនួលខុសត្រូវខ្ពស់ និងស្រឡាញ់សន្តិភាពកម្ពុជាបានប្រកាន់ភ្ជាប់នូវលក្ខខណ្ឌនូវបទឈប់បាញ់ ដោយជ្រើសរើសយកការសន្ទនា និងកិច្ចសហប្រតិបត្តិការ ហើយមិនជ្រើសរើសយកការប្រឈមមុខដាក់គ្នា និងជម្លោះឡើយ។ លោកជំទាវ ឧត្តមសេនីយ៍ឯកអ្នកនាំពាក្យបានអះអាងទៀតថា ការប្រកាន់ភ្ជាប់យ៉ាងមុតមាំរបស់កម្ពុជាចំពោះបទឈប់បាញ់នេះបានបង្ហាញថាការគោរពចំពោះកិច្ចខិតខំប្រឹងប្រែងមិនខ្លាចនឿយហត់ និងបំណងប្រាថ្នារបស់កម្ពុជាក្នុងការចូលរួមចំណែកដល់សន្តិភាព ស្ថិរភាពយូរអង្វែងក្នុងតំបន់។ 

ជាមួយគ្នានោះដែរលោកជំទាវ ឧត្តមសេនីយ៍ឯក អ្នកនាំពាក្យក្រសួងការពារជាតិក៏បានសម្តែងការសោកស្តាយចំពោះទង្វើរបស់ថៃ កាលពីវេលាម៉ោង១១ព្រឹកថ្ងៃទី០៤ ខែសីហា ឆ្នាំ២០២៥ កងកម្លាំងប្រដាប់អាវុធ អមដោយ គ្រឿងចក្រធុនធ្ងន់កាយដី បានចល័តចូលនៅតំបន់អានសេះ ដែលជាដែនអធិបតេយ្យកម្ពុជា  ហើយថែមទាំងរាយលួសបន្លា បើទោះបីជាមានការរារាំងហាមឃាត់យ៉ាងខ្លាំងពីសំណាក់កងកម្លាំងរបស់កម្ពុជាយ៉ាងណាក៏ដោយ។ លោកជំទាវ ឧត្តមសេនីយ៍ឯកបានបន្ដថា ទីតាំងដែលកងកម្លាំងថៃបានចល័តគ្រឿងចក្រមកឈូសឆាយនោះគឺស្ថិតក្នុងដែនអធិបតេយ្យភាពរបស់កម្ពុជា  និងនៅក្រោមការគ្រប់គ្រងរបស់កងកម្លាំងប្រដាប់អាវុធកម្ពុជា បន្ទាប់ពីបទឈប់បាញ់ចូលជាធរមានកាលពីយប់រំលងអាត្រាធថ្ងៃទី២៨ ខែកក្កដា ឆ្នាំ២០២៥ ។ លោកជំទាវ ឧត្តមសេនីយ៍ឯកបានអះអាងថា ទង្វើគ្រប់យ៉ាងរបស់យោធាថៃគឺជាការរំលោភបំពានយ៉ាង គឃ្លើនលើកិច្ចព្រមព្រៀង និងបានបង្កឱ្យមានការគំរាមកំហែងយ៉ាងធ្ងន់ធ្ងរបំផុតចំពោះសន្តិភាព សន្តិសុខតាមបន្ទាប់ព្រំដែន នៃប្រទេសទាំងពីរ ក៏ដូជាតំបន់ទាំងមូល។

លោកជំទាវ ឧត្តមសេនីយ៍ឯក ម៉ាលី សុជាតា បានបន្ថែមថា កម្ពុជាសូមអំពាវនាវដល់សហគមន៍អន្តរជាតិ ជាពិសេសប្រទេសដៃគូដែលខិតខំប្រឹងប្រែង ជួយឱ្យសម្រេចបាននូវបទឈប់បានដ៏លំបាកនេះ ហើយសុទ្ធតែមាន បំណងចង់ឃើញបទឈប់បាញ់មួយនេះត្រូវបានអនុវត្តន៍ពេញលេញប្រកបដោយប្រសិទ្ធភាព ។ ជាមួយគ្នានេះក្រសួងការពារជាតិកម្ពុជាស្នើឱ្យភាគីថែគោរពកិច្ចព្រមព្រៀងឈប់បាញ់ មិនត្រឹមតែតាមរយៈពាក្យសំដីប៉ុណ្ណោះទេ តែត្រូវធ្វើសកម្មភាពជាក់ស្តែងផងដែរ ដោយបញ្ឈប់រាល់អំពើអរិយភាព ទាំងឡាយ ដោយរុះរើលួសបន្លា និងដកចេញគ្រឿងចក្ររបស់ខ្លួនជាបន្ទាន់ពីដែនអធិបតេយ្យភាពរបស់កម្ពុជាដែលភាគីថៃមិនអាចយកលេសណាមួយមកបំភ្លៃការពិតបានឡើយ៕

ដោយ៖ ប៊ុនរិទ្ធ