AKP ភ្នំពេញ ថ្ងៃទី០៥ ខែសីហា ឆ្នាំ២០២៥-- ឯកឧត្ដម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ បានអញ្ជើញជាអធិបតីបើកវគ្គបណ្ដុះបណ្ដាលស្ដីពី “មូលដ្ឋានគ្រឹះនៃការគ្រប់គ្រងហិរញ្ញវត្ថុ និងលទ្ធកម្មសម្រាប់គម្រោងដៃគូអភិវឌ្ឍន៍របស់ក្រសួងអភិវឌ្ឍន៍ជនបទ” នាព្រឹកថ្ងៃទី០៥ ខែសីហា ឆ្នាំ២០២៥ នៅទីស្ដីការក្រសួង ដោយមានការអញ្ជើញចូលរួមពីឯកឧត្ដមរដ្ឋលេខាធិការប្រចាំការ ឯកឧត្ដម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក និងសិក្ខាកាមជាមន្រ្ដីរាជការ  និងមន្រ្ដីជាកិច្ចសន្យាដែលកំពុងបម្រើការងារក្នុងការអនុវត្តគម្រោងក្រោមហិរញ្ញប្បទានរបស់ដៃគូអភិវឌ្ឍន៍នៃក្រសួងអភិវឌ្ឍន៍ជនបទសរុប ៧៦នាក់ ស្រី ៣៧នាក់។

មុនកិច្ចចាប់ផ្ដើមដំណើរការសិក្ខាសាលា គណៈអធិបតី និងសិក្ខាកាមទាំងអស់បានធ្វើការស្មឹងអារម្មណ៍ដើម្បីគោរពវិញ្ញាក្ខន្ធវីរកងទ័ពកម្ពុជាដែលបានពលីជីវិតក្នុងសមរភូមិប្រយុទ្ធដ៏អង់អាចក្លាហានក្នុងបុព្វហេតុការពារបូរណភាពទឹកដី។

ជាមួយគ្នានោះ ឯកឧត្ដមរដ្ឋមន្ត្រីបានពាំនាំនូវប្រសាសន៍ផ្តាំផ្ញើសាកសួរសុខទុក្ខប្រកបដោយមនោសញ្ចេតនាស្រឡាញ់ និងនឹករលឹកព្រមទាំងពរសព្វសាធុការពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជូនដល់អង្គសិក្ខាសាលា និងបានធ្វើការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ មន្រ្ដីគ្រប់គ្រង និងអនុវត្តគម្រោងទាំងអស់ដែលបានខិតខំបំពេញការងារទាំងផ្នែកហិរញ្ញវត្ថុ និងលទ្ធកម្មឱ្យដំណើរការទៅប្រកបដោយភាបរលូន និងមានប្រសិទ្ធភាពខ្ពស់។

ទន្ទឹមនឹងនេះ ឯកឧត្ដមរដ្ឋមន្រ្ដីក៏បានជម្រាបជូនពីសារសំខាន់នៃការអភិវឌ្ឍធនធានមនុស្ស ស្របពេលដែលក្រសួងកំពុងបាននឹងពង្រឹង ពង្រីកទំនាក់ទំនង និងកិច្ចសហការជាមួយបណ្តាដៃគូទាំងទ្វេភាគី និងពហុភាគី ដើម្បីកសាង និងពង្រឹងសមត្ថភាពរបស់មន្ត្រីទទួលបន្ទុកលើការគ្រប់គ្រងនិងអនុវត្តគម្រោងនៅគ្រប់ផ្នែក ដូចជា ផ្នែកហិរញ្ញវត្ថុ, ផ្នែកលទ្ធកម្ម, ផ្នែកបច្ចេកទេស និងគុណភាពសាងសង់, ផ្នែកសុវត្ថិភាពផ្លូវថ្នល់, ផ្នែកគាំពារសង្គមនិងបរិស្ថាន, និងផ្នែកយេនឌ័រ ផងដែរ។ ក្រសួងអភិវឌ្ឍន៍ជនបទបាន និងកំពុងបន្តបេសកកម្មយ៉ាងសកម្ម ក្រោមចក្ខុវិស័យ “កសាងសង្គមជនបទកម្ពុជាឱ្យមានវិបុលភាពប្រកបដោយបរិយាបន្ន និងចីរភាព” ក្នុងគោលបំណងធ្វើឱ្យប្រជាជននៅតំបន់ជនបទមានជីវភាពរស់នៅ សមរម្យ មានសុខភាពល្អ ស្របតាមយុទ្ធសាស្រ្ដបញ្ចកោណដំណាក់កាលទី១ របស់រាជរដ្ឋភិបាល។ បច្ចុប្បន្ននេះក្រសួងអភិវឌ្ឍន៍ជនបទ កំពុងអនុវត្តគម្រោងកម្មវិធីក្រោមហិរញ្ញប្បទានពីដៃគូអភិវឌ្ឍន៍សរុបចំនួន ២២គម្រោង ក្រោមហិរញ្ញប្បទានសម្បទាន និងឥតសំណង លើការអភិវឌ្ឍន៍ហេដ្ឋារចនាសម្ពន្ធ័គមនាគមន៍ជនបទ, ការផ្គត់ផ្គង់ទឹកស្អាត, ការប្រតិបត្តិអនាម័យ និងការអភិវឌ្ឍន៍សហគមន៍ជនបទ ដែលមានមន្ត្រីរាជការបម្រើការសរុប ២៤៣រូប (ស្រី ៧១ រូប)។

ជាមួយគ្នានេះដែរ ឯកឧត្ដមរដ្ឋមន្រ្ដីបានសម្តែងនូវការគាំទ្រយ៉ាងពេញទំហឹងចំពោះចំណាត់ការដ៏ម៉ឺងម៉ាត់ និងច្បាស់លាស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការយកបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅដោះស្រាយនៅតុលាការយុត្តិធម៌អន្តរជាតិ (ICJ) និងបានគាំទ្រនូវយន្តការទ្វេភាគី ដែលមានស្រាប់ក្នុងការចរចា និងដោះស្រាយបញ្ហាដោយសន្តិវិធី ដើម្បីរក្សា និងកសាងព្រំដែនមិត្តភាព សន្តិភាព សហប្រតិបត្តិការ និងការអភិវឌ្ឍ ព្រមទាំងគាំទ្រសិទ្ធិស្វ័យការពារខ្លួនទប់ទល់ការឈ្លានពានពីសំណាក់បរទេស។

ជាមួយគ្នានេះដែរ ឯកឧត្តមរដ្ឋមន្ដ្រីក៏បានផ្ដល់អនុសាសន៍សំខាន់ៗមួយចំនួនដល់សិក្ខាកាមដែលក្នុងរយៈពេលពីរថ្ងៃនេះ ត្រូវត្រងត្រាប់ស្ដាប់គ្រូឧទ្ទេសនាមមានបទពិសោធន៍ សំដៅទទួលបានចំណេះដឹងថ្មីៗបន្ថែមទៀតទាំងផ្នែកហិរញ្ញវត្ថុ និងលទ្ធកម្មសម្រាប់យកទៅប្រើប្រាស់លើការគ្រប់គ្រង និងអនុវត្តគម្រោងក្រោមហិរញ្ញប្បទានសម្បទាន និងឥតសំណងឱ្យទទួលបានជោគជ័យ៕

ដោយ ទេស ច័ន្ទសុធារី (ប្រភព៖ ក្រសួងអភិវឌ្ឍន៍ជនបទ)