AKP កំពង់ចាម ថ្ងៃទី០៥ ខែសីហា ឆ្នាំ២០២៥-- ឯកឧត្តម អ៊ុន ចាន់ដា ប្រធានគណៈកម្មាធិការសាខាខេត្តកំពង់ចាម នារសៀលថ្ងៃចន្ទ ទី០៤ ខែសីហា ឆ្នាំ២០២៥ បានចាត់ឯកឩត្តម ទូច ឆៃ នាយកសាខាខេត្ត និងលោក ស៊ីម គង់ ប្រធានកិត្តិយសអនុសាខាស្រុកជើងព្រៃ ចុះសួរសុខទុក្ខ អ្នកស្រី ច្រេង សូលីកា អាយុ ៣០ឆ្នាំ ជាគ្រួសារយោធិនជួរមុខដែលបានភៀសខ្លួនចេញពីតំបន់ត្រពាំងប្រាសាទ ខេត្តឧត្តរមានជ័យ ហើយចូលមកសម្រាលកូននៅមន្ទីរពេទ្យបង្អែកស្រុកជើងព្រែ នាម៉ោង៤ទៀបភ្លឺ ថ្ងៃទី០៤ ខែសីហា ឆ្នាំ២០២៥។

ក្នុងឱកាសនោះ ឯកឧត្តម ទូច ឆៃ នាយកសាខា បាននាំយកការសាកសួរសុខទុក្ខពីឯកឧត្តម អ៊ុន ចាន់ដា ប្រធានគណៈកម្មាធិការសាខា និងឯកឧត្តម នេត សាវឿន ប្រធានកិត្តិយសសាខា ពិសេសពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងបានសម្តែង ការគោរពដឹងគុណយ៉ាងជ្រាលជ្រៅចំពោះវីរភាពដ៏អង់អាចក្លាហានរបស់ស្វាមីជាយុទ្ធជន ដែលកំពុងបំពេញបេសកកម្មការពារបូរណភាពទឹកដីយ៉ាងប្តូរផ្តាច់នៅសមរភូមិព្រំដែន កងទ័ពដែលហ៊ានបូជាជីវិត កម្លាំងកាយ កម្លាំងចិត្ត ក្នុងការប្រយុទ្ធ ការពារបូរណភាពទឹកដី និងសុវត្ថិភាពជូនប្រជាជន។ ដើម្បីបុព្វហេតុជាតិមាតុភូមិ និងប្រជាជន ដែលការលះបង់នេះ បាននាំមកនូវសុខសន្តិភាព និងស្ថិរភាពដល់ប្រទេសជាតិ។

ក្នុងឱកាសចុះសួរសុខទុក្ខ កាកបាទក្រហមកម្ពុជាខេត្តកំពង់ចាមបាននាំយកអំណោយមនុស្សធម៌ រួមមានអង្ករ៥០គ.ក្រ គ្រឿងឧបភោគបរិភោគ ទឹកដោះគោទារក២កំប៉ុងធំ ទឹកដោះគោឆៅ២យួរ ឃីតស្ត្រី១ឈុត និងថវិកាមួយចំនួន ព្រមទាំងបានឧបត្ថម្ភជូនស្ត្រីដែលទើបនឹងសម្រាលកូន២នាក់ ដោយក្នុងម្នាក់ទទួលបានថវិកា ១០០,០០០រៀលផងដែរ។

សូមបញ្ជាក់ថា អ្នកស្រី ច្រេង សូលីកា ជាភរិយាយោធិនជួរមុខ ដែលកំពុងបំពេញបេសកកម្មការពារបូរណភាពទឹកដីយ៉ាងប្តូរផ្តាច់នៅព្រំដែន។ អ្នកស្រីបានភៀសខ្លួនជាមួយកូនស្រីប្រុស៣នាក់ ទាំងកំពុងមានផ្ទៃពោះគ្រប់ខែ មកស្នាក់នៅបណ្តោះអាសន្ន ផ្ទះម្តាយក្មេកនៅភូមិសៀមបោយ ឃុំព្រៃចារ ស្រុកជើងព្រៃ ហើយបានចូលសម្រាកនៅមន្ទីរពេទ្យបង្អែកស្រុកជើងព្រៃ និងសម្រាលបានកូនស្រី ១នាក់ ទម្ងន់៣,៤គ.ក្រ នាម៉ោង៤ទៀបភ្លឺ ថ្ងៃទី០៤ ខែសីហា ឆ្នាំ ២០២៥  ប្រកបដោយសុខភាពល្អដែលសេវាសម្រាល និងព្យាបាល ជាបន្ទុកមន្ទីរពេទ្យបង្អែកស្រុកទាំងស្រុង៕

ដោយ ឆាយ ម៉ុត