AKP កំពង់ឆ្នាំង ថ្ងៃទី០៥ ខែសីហា ឆ្នាំ២០២៥-- ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានអញ្ជើញជាអធិបតីក្នុងពិធីបួងសួងសុំសេចក្ដីសុខដល់វីរកងទ័ពកម្ពុជាទាំងអស់ នៅតាមខ្សែបន្ទាត់ព្រំដែនកម្ពុជា ដោយធ្វើឡើងនៅអាសនៈលោកតាដំបងដែកខេត្តកំពង់ឆ្នាំង កាលពីថ្ងៃទី០៤ ខែសីហា ឆ្នាំ២០២៥ ដោយមានការអញ្ជើញចូលរួមពីឯកឧត្តម ស៊ីវ រុន ប្រធានក្រុមប្រឹក្សាខេត្ត ឯកឧត្តម លោកជំទាវ លោក លោកស្រី សមាជិកក្រុមប្រឹក្សាខេត្ត អភិបាលរងខេត្ត និងថ្នាក់ដឹកនាំមន្ទីរអង្គភាពជុំវិញខេត្តជាច្រើននាក់ផងដែរ។

ថ្លែងក្នុងឱកាសនោះ ឯកឧត្តម ស៊ុន សុវណ្ណារិទ្ធិ បានលើកដៃប្រណម បួងសួងប្រគេនពរជ័យដល់ព្រះសង្ឃគ្រប់ព្រះអង្គ និងថ្វាយព្រះពរជ័យដល់ព្រះមហាក្សត្រ ព្រះមហាក្សត្រី និងគោរពជូនពរសម្តេចមហាចក្រី ហេង សំរិន សម្តេចអគ្គមហាសេនាបតីតេជោ ហ៊ុន សែន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងថ្នាក់ដឹកនាំគ្រប់លំដាប់ថ្នាក់ មន្ត្រីរាជការ ព្រមទាំងប្រជាពលរដ្ឋខ្មែរ សូមជួបតែសេចក្តីសុខ សេចក្តីចម្រើនគ្រប់ៗគ្នា និងសូមឱ្យប្រទេសជាតិមានសុខសន្តិភាពជារៀងរហូត។

ទន្ទឹមនឹងនេះ ឯកឧត្តមបានបួងសួងអញ្ជើញដួងវិញ្ញាណទេវតាទាំងអស់ក្នុងព្រះរាជាណាចក្រកម្ពុជា តាមជួយថែរក្សាដល់វីរកងទ័ពសមរភូមិជួរមុខ ជួបតែសេចក្តីសុខ សេចក្តីចម្រើន សូមមានឫទ្ធិអំណាច ថាមពលខ្លាំងក្លា កម្ចាត់ខ្មាំងឈ្លានពាន វិនាសអន្តរាយពីទឹកដីកម្ពុជា។ ប្រជាពលរដ្ឋនៅក្នុងខេត្តកំពង់ឆ្នាំងក៏ដូចជានៅទូទាំងប្រទេសកម្ពុជា សមរភូមិក្រោយរួមសាមគ្គីគ្នាជាធ្លុងមួយ លើកទឹកចិត្ត គាំទ្រពេញបេះដូងចំពោះសមរភូមិមុខ។ សង្រ្គាមបានបង្កនូវផលវិបាក និងមហន្ដរាយផ្សេងៗជាច្រើន ដូចជាបាត់បង់អាយុជីវិត ព្រាត់ប្រាស់គ្រួសារ ផ្ទះសម្បែង ខូចខាតហេដ្ឋារចនាសម្ព័ន្ធផ្សេងៗ ដែលនេះបានបង្ហាញឱ្យឃើញថា សុខសន្ដិភាពគឺមានតម្លៃណាស់ មានសន្ដិភាពទើបមានការអភិវឌ្ឍន៍ ដូចនេះ ចូរយើងគ្រប់គ្នា ថែរក្សាសន្ដិភាពឱ្យបានគង់វង្ស។

ទន្ទឹមនឹងនេះ ឯកឧត្តមអភិបាលខេត្ត ឯកឧត្តមប្រធានក្រុមប្រឹក្សាខេត្ត លោកជំទាវ លោក លោកស្រី បានបន្តគាំទ្រយ៉ាងពេញទំហឹង និងជាគ្រឹះដ៏រឹងមាំ ជូនដល់វីរកងទ័ពសមរភូមិមុខ ការពារទឹកនៅតាមខ្សែបន្ទាត់ព្រំដែនកម្ពុជា សូមជូនពរបងប្អូនវីរកងទ័ពយើង សូមមានឫទ្ធិអំណាច ថាមពលខ្លាំងក្លា កម្ចាំងខ្មាំងសត្រូវ វិនាសអន្តរាយពីទឹកដីកម្ពុជា៕

ដោយ បៃ ស៊ីថុន