AKP ភ្នំពេញ ថ្ងៃទី០៥ ខែសីហា ឆ្នាំ២០២៥--គិតមកដល់ម៉ោង៦និង១៥នាទីព្រឹកសភាពការណ៍នៅតាមបណ្តោយបន្ទាត់ព្រំដែនទិសខេត្តព្រះវិហារ និងឧត្តរមានជ័យ គឺមានសភាពស្ងប់ស្ងាត់ ហើយកងកម្លាងកម្ពុជាស្ថិតក្នុងការប្រុងប្រយ័ត្ន ក្នុងការអនុវត្តយ៉ាងច្បាស់លាស់ និងពេញលេញ។ នេះបើតាមការបញ្ជាក់ឱ្យដឹងរបស់លោកជំទាវឧត្ដមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិកម្ពុជា ក្នុងសន្នីសីទសារព័ត៌មាន ស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាព្រឹកថ្ងៃទី០៥ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។

លោកជំទាវឧត្ដមសេនីយ៍ឯក ម៉ាលី សុជាតា បានគូសបញ្ជាក់ថា៖ «ចាប់ពីម៉ោង១២ និង០០នាទីរំលងអាត្រាធ ថ្ងៃទី០៥ ខែសីហា ឆ្នាំ២០២៥ រហូតដល់ម៉ោង៦ និង១៥នាទីព្រឹកនេះ សភាពការណ៍នៅតាមបណ្តោយបន្ទាត់ព្រំដែនមានសភាពស្ងប់ស្ងាត់ ។ កងកម្លាំងរបស់យើងស្ថិតក្នុងភាពប្រុងប្រយ័ត្ន និងអនុវត្តន៍តួនាទីរបស់ខ្លួន យ៉ាងច្បាស់លាស់និងពេញលេញ»។ លោកជំទាវឧត្ដមសេនីយ៍ឯកបានអះអាងថា កម្ពុជាបានគោរពយ៉ាងម៉ឺងម៉ាត់បំផុតលើលក្ខខណ្ឌនូវបទឈប់បាញ់កាលពីថ្ងៃទី២៨ ខែកក្កដា ឆ្នាំ០២៥នៅប្រទេសម៉ាឡេស៊ី ។

លោកជំទាវឧត្ដមសេនីយ៍ឯក ម៉ាលី សុជាតា បានបន្ថែមថា ទាំងនេះគឺជាផ្តាច់ជ្ញាចិត្តយ៉ាងច្បាស់លាស់សុចរិតយ៉ាងម៉ត់ចត់ មិនរុញរា និងមិនប្រែប្រួល នូវជំហរដ៏រឹងមាំរបស់រាជរដ្ឋាភិបាលកម្ពុជា និងកងកម្លាំងប្រដាប់អាវុធ នូវការអនុវត្តបទឈប់បាញ់ឱ្យសភាពការណ៍វិលមករកភាពប្រសើរវិញ៕

ដោយ៖ ប៊ុនរិទ្ធ