AKP ភ្នំពេញ ថ្ងៃទី០៤ ខែសីហា ឆ្នាំ២០២៥-- ឯកឧត្តម សាស្ត្រាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានមានប្រសាសន៍ថា សុខាភិបាលជាឫសគល់នៃការអភិវឌ្ឍ ការផលិតបានធនធានមានសុខភាពល្អ នឹងជួយដល់សេដ្ឋកិច្ចជាតិ។ ឯកឧត្តមបានលើកឡើងដូច្នេះ ក្នុងកិច្ចប្រជុំកម្រិតថ្នាក់ដឹកនាំលើកទី១ នៃខែសីហា ពិនិត្យវឌ្ឍនភាពការងារ និងលើកទិសដៅការងារបន្ត នារសៀលថ្ងៃទី០៤ ខែសីហា ឆ្នាំ២០២៥ នៅទីស្តីការក្រសួង ដោយមានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ទីប្រឹក្សាក្រសួង អគ្គនាយក អគ្គនាយករង និងគ្រប់ប្រធានអង្គភាពថ្នាក់កណ្តាលក្រោមឱវាទក្រសួងសុខាភិបាល ប្រធានមន្ទីរសុខាភិបាលរាជធានីភ្នំពេញ និងតាមប្រព័ន្ធ Zoom ប្រធានមន្ទីរសុខាភិបាលខេត្ត។

ក្នុងឱកាសនោះ ឯកឧត្តមសាស្រ្តាចារ្យរដ្ឋមន្រ្តីបានសម្ដែងការកោតសរសើរដល់ថ្នាក់ដឹកនាំ មន្រ្តីសុខាភិបាល បុគ្គលិកសុខាភិបាលគ្រប់លំដាប់ថ្នាក់ ដែលបានចូលរួមយ៉ាងសកម្ម ក្នុងស្មារតីរួបរួមសាមគ្គីភាពគ្នា ជួយគ្នាគាំទ្រគ្នាដោយស្វ័យប្រវត្តិ ទាំងជំនាញបច្ចេកទេសវះកាត់ ថែទាំព្យាបាល ទាំងការលើកកម្ពស់ទឹកចិត្តស្មារតី ដោយមានការចុះជួយគ្នាពីមន្ទីរពេទ្យជាតិទាំងអស់ សាកលវិទ្យាល័យជាតិ និងបណ្តាខេត្តទាំងអស់ ចូលរួមបេសកម្មសុខាភិបាលនាគ្រាអាសន្នចាំបាច់បំផុត ក្នុងនាមជាកងទ័ពអាវស។

ឯកឧត្តមសាស្រ្តាចារ្យបានលើកទឹកចិត្តដល់មន្រ្តីសុខាភិបាល សូមបន្តសកម្មភាព វប្បធម៌ដ៏ល្អប្រពៃបែបនេះតទៅទៀតច្រើនជំនាន់ ដោយត្រូវត្រៀមលក្ខណៈ ស្មារតីយកចិត្តទុកដាក់កម្រឹតខ្ពស់គ្រប់ពេលវេលា គ្រប់វិនាទី ចំពោះរាល់ព្រឹត្តិការណ៍អវិជ្ជមានដែលអាចកើតមានឡើង ហើយត្រូវយកបទពិសោធន៍កន្លងមក មករៀបចំជាការណែនាំ ផែនការសកម្មភាពបន្ត និងសម្រាប់ពេលបន្ទាប់ ទាំងដំណាក់កាលមុនហេតុការណ៍ ដំណាក់កាលកំពុងកើតហេតុការណ៍ និងដឱណាក់កាលក្រោយហេតុការណ៍។ ការគិតគ្រប់ជ្រុងជ្រោយ ចេញពីបទពិសោធន៍ជាក់ស្តែង សម្រាប់ពេលបន្តបន្ទាប់ និងពេលក្រោយៗ តាមរយៈការរៀបចំផែនការសកម្មភាព គឺជាភាពឈ្នះយ៉ាងពិតប្រាកដ។

ទន្ទឹមនឹងនេះ ឯកឧត្តមសាស្រ្តាចារ្យបានណែនាំដល់ថ្នាក់ដឹកនាំ ត្រូវរៀបចំពិនិត្យ និងវាយតម្លៃនូវផលប៉ះពាល់ នៅពេលដែលស្ថានភាពល្អប្រសើរឡើងវិញ ដោយត្រូវធានាយ៉ាងណា ឱ្យដំណើរការបម្រើសេវាសុខាភិបាលជាសារវន្ត័នៅដំណើរការជាធម្មតា និងត្រូវពិនិត្យជំហានបន្តបន្ទាប់ ទាំងការរៀបចំជួសជុលការខូចខាតទាំងឡាយ តាមស្ថានភាពចំពោះមុខ ឈរលើដំណាក់កាលរៀបចំរយៈពេលខ្លី និងផែនការប្រមើលមើលរយៈពេលវែង។

ឯកឧត្តមសាស្រ្តាចារ្យក៏បានណែនាំដល់មជ្ឈមណ្ឌលជាតិពាក់ព័ន្ធ សហការជាមួយមន្ទីរសុខាភិបាលខេត្ត ក្នុងការជួយក្នុងការគាំទ្រសុខភាពសាធារណៈ ដោយត្រូវបង្កើនការយកចិត្តទុកដាក់បន្ថែមទៀតការ បង្កើនការអប់រំសុខភាពតាមគ្រប់មធ្យោបាយ ជាពិសេសការងារប្រយុទ្ធនឹងជំងឺគ្រុនឈាម ដោយត្រូវសហការបាញ់ថ្នាំសម្លាប់មូស នៅតំបន់ដែលមានហានិភ័យខ្ពស់៕

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)