AKP ភ្នំពេញ ថ្ងៃទី០៤ ខែសីហា ឆ្នាំ២០២៥-
ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានលើកឡើងពីការយកចិត្តទុកដាក់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាចំពោះបងប្អូនកងទ័ពចំនួន១៨នាក់ដែលកំពុងស្ថិតក្នុងការគ្រប់គ្រងរបស់ថៃ ដោយសម្តេចនាយករដ្ឋមន្ត្រីបានចេញសារមួយ ដែលបានបញ្ជាក់ពីការយកចិត្តទុកដាក់ខ្ពស់បំផុតចំពោះកងកម្លាំងទាំង១៨នាក់នោះ។ ការលើកឡើងរបស់ឯកឧត្តម ប៉ែន បូណា ដូចនេះធ្វើឡើងនៅក្នុងការធ្វើសេចក្តីសង្ខេបព័ត៌មានប្រចាំថ្ងៃស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នារសៀលថ្ងៃទី០៤ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។

ឯកឧត្តម ប៉ែន បូណា បានថ្លែងថា នៅក្នុងខ្លឹមសារនៃសារលិខិតរបស់សម្តេចធិបតី នាយករដ្ឋមន្ត្រី បានគូស បញ្ជាក់ជូនជនរួមជាតិថា បើទោះបីជាស្ថានការណ៍មានការវិវត្តន៍ប្រែប្រួលយ៉ាងណាក្តីក៏រាជរដ្ឋាភិបាលកម្ពុជានៅតែបន្តការតាមដានដោយកចិត្តទុកដាក់បំផុតចំពោះសុវត្ថិភាពរបស់បងប្អូនយោធាកម្ពុជាទាំង ១៨នាក់ ដែលកំពុងស្ថិតក្នុងការឃុំខ្លួនរបស់អាជ្ញាធរថៃចាប់តាំងពីថ្ងៃទី២៩ ខែកក្កដា ឆ្នាំ២០២៥ មកនោះ និងកំពុងតែចាត់វិធានការតាមយន្តការចាំបាច់ផ្សេងៗ ដើម្បីឱ្យមានការដោះលែងឱ្យបានឆាប់ និង ដោយសុវត្ថិភាព។ ឯកឧុតមបន្តថា ក្នុងនោះក្រសួងការពារជាតិ អគ្គមេបញ្ជាការមេបញ្ជាការយោធភូមិភាគរបស់កម្ពុជា បានធ្វើការជាប់ជាប្រចាំជាមួយភាគីថៃ ព្រមទាំងបានស្នើម៉ាឡេស៊ីក្នុងនាមជាប្រធានអាស៊ានឱ្យធ្វើការជា មួយអាជ្ញាធរថៃលើកិច្ចករានេះ ហើយរាជរដ្ឋាភិបាលកម្ពុជាក៏បានប្រគល់ភារកិច្ចនេះជូនក្រសួងការបរទេស និងសហប្រតិបត្តិការអន្តរជាតិ តាមរយៈស្ថានបេសកកម្មអចិន្ត្រៃយ៍កម្ពុជាប្រចាំអង្គការសហប្រជាជាតិ និងអង្គការអន្តរជាតិនៅទីក្រុងហ្សឺណែវធ្វើការជាមួយគណៈកម្មាធិការកាកបាទក្រហមអន្តរជាតិ ដើម្បីជំរុញឱ្យមានការដោះលែងឱ្យបានឆាប់ ខណៈដែលរាជរដ្ឋាភិបាលកម្ពុជាបានប្រគល់ភារកិច្ច ជូនគណៈកម្មាធិការសិទ្ធិមនុស្សកម្ពុជាឱ្យធ្វើការជាមួយការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស គណៈកម្មាធិការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស និងគណៈ កម្មាធិការសិទ្ធិមនុស្សជាតិរបស់ថៃ ដើម្បីខិតខំជំរុញបន្ថែមទៀតឱ្យមានការដោះលែង និងបញ្ជូនយោធា កម្ពុជាទាំង១៨នាក់ឱ្យត្រឡប់មកមាតុប្រទេសវិញឱ្យបានឆាប់។
ឯកឧត្តម ប៉ែន បូណា ឱ្យដឹងទៀតថា គណៈកម្មាធិការសិទ្ធិមនុស្សកម្ពុជា ដែលជាសេនាធិការរបស់រាជរដ្ឋាភិ បាលកម្ពុជាបានដាក់ញ្ញតិជាបន្ទាន់ទៅកាន់បណ្តាស្ថាប័នសិទ្ធិមនុស្សខាងលើរួចរាល់ និងបានស្នើឱ្យតំណាងស្ថាប័នទាំងនេះធ្វើទស្សនកិច្ចបែបមនុស្សនៅកន្លែងឃុំខ្លួនកងទ័ពកម្ពុជាដោយភាគីថៃទាំង១៨ នាក់ ដោយធ្វើការផ្ទៀងផ្ទាត់នូវសុខុមាលភាពផ្លូវកាយ ផ្លូវចិត្តរបស់កងទ័ពទាំងនោះ រួមទាំងលក្ខខណ្ឌនៃ ការឃុំខ្លួន ព្រមទាំងជួយយ៉ាងណាឱ្យពួកគេអាចមានទំនាក់ទំនងជាមួយក្រុមគ្រួសារក៏ដូចជាអ្នកពាក់ព័ន្ធ ផ្សេងទៀត ហើយធានាឱ្យមានការដោះលែងជាបន្ទាន់៕

ដោយ៖ ចាន់ សុភឿន