AKP ភ្នំពេញ ថ្ងៃទី០៤ ខែសីហា ឆ្នាំ២០២៥

ឯកឧត្ដមឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀនបានណែនាំដល់មន្ដ្រីទទួលការបណ្តុះបណ្ដាលពីក្រៅប្រទេស ត្រូវក្រេបយកចំណេះដឹង មកផ្សព្វផ្សាយបន្ត ដើម្បីពង្រីកប្រសិទ្ធភាពការងារប្រយុទ្ធប្រឆាំងគ្រឿងញៀន។

ការណែនាំនេះ បានធ្វើឡើងក្នុងកិច្ចប្រជុំផ្សព្វផ្សាយលទ្ធផល នៃការចូលរួមវគ្គបណ្ដុះបណ្ដាល ស្តីពីការលើកកម្ពស់សមត្ថភាពស៊ើបអង្កេត បទល្មើស និងត្រួតពិនិត្យគ្រឿងញៀនដល់សមត្ថកិច្ចកម្ពុជា ក្នុងការប្រយុទ្ធប្រឆាំងគ្រឿងញៀន ទីក្រុងហូជីមិញ ប្រទេសវៀតណាម កាលពីថ្ងៃ២០ ដល់ថ្ងៃទី២៥ ខែកក្កដា ឆ្នាំ២០២៥កន្លងទៅ នាព្រឹកថ្ងៃទី០៤ ខែសីហា ឆ្នាំ២០២៥ នៅអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន។

ថ្លែងក្នុងនាម ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន ក្នុងឱកាសនោះ ឯកឧត្ដម ឧត្តមសេនីយ៍ឯក លឹម តុងហួត បានកោតសរសើរដល់កិច្ចខិតខំរបស់ថ្នាក់ដឹកនាំ និងមន្ត្រី នៃនាយកដ្ឋានទាំងអស់ ដែលបានរួបរួមសាមគ្គីគ្នា ចូលរួមអនុវត្តន៍នូវតួនាទីភារកិច្ចរបស់នាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈបានល្អ។ ឯកឧត្ដម ឧត្តមសេនីយ៍ឯក ក៏បានជំរុញមន្ត្រីទាំងអស់ ត្រូវបន្តកិច្ចការខិតខំប្រឹងប្រែងអនុវត្តន៍នូវតួនាទីភារកិច្ចរបស់នាយកដ្ឋានឱ្យបានល្អបន្ថែមទៀត ក្នុងគោលបំណងចូលរួមចំណែក ក្នុងការងារប្រយុទ្ធប្រឆាំងគ្រឿងញៀនលើវិស័យ ផ្សព្វផ្សាយអប់រំ និងទំនាក់ទំនងសាធារណៈនេះឱ្យទទួលបានលទ្ធផលល្អបន្ថែមទៀត។
ក្នុងឱកាសនោះ ឯកឧត្ដមឧត្តមសេនីយ៍ឯក លឹម តុងហួត បានបន្ថែមថា ថ្នាក់ដឹកនាំក៏ដូចជាមន្ត្រីនៃនាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈទាំងអស់ ដែលបានចេញទៅទទួលនូវការបណ្តុះបណ្ដាល ក៏ដូចជាសិក្ខាសាលា កិច្ចប្រជុំនៅក្រៅប្រទេស ត្រូវតែខិតខំទទួលយកនូវបទចំណេះដឹងពាក់ព័ន្ធនឹងការអនុវត្តការងារ មកកែច្នៃពង្រីកទៅជាការងារផ្សព្វផ្សាយ អប់រំរបស់យើង ហើយផ្សព្វផ្សាយចែករំលែកបន្តដល់ថ្នាក់ដឹកនាំ និងមន្ដ្រីនាយកដ្ឋានយើងទាំងអស់ឱ្យទទួលបាននូវចំណេះដឹងដូចអ្នកដែលបានទៅចូលរួមផងដែរ។

ជាមួយគ្នានេះ សិក្ខាកាម លោក នន ឧត្តម ដែលបានចូលរួម និងចែករំលែកនូវចំណេះដឹងពីវគ្គបណ្ដុះបណ្ដាលនោះ បានប្រាប់ឱ្យដឹងពីការកោតសរសើរ និងការចាប់អារម្មណ៍ពាក់ព័ន្ធនឹងអត្ថប្រយោជន៍ App NoDrug (ទាញយក៖https://nodrugsnacd.com/download) របស់កម្ពុជា៕

ដោយ៖ រិទ្ធី, ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន