AKP ភ្នំពេញ ថ្ងៃទី០៤ ខែសីហា ឆ្នាំ២០២៥--

ថ្លែងក្នុងកិច្ចដឹកនាំកិច្ចប្រជុំគណៈបញ្ជាការឯកភាព រដ្ឋបាលខេត្ត ស្ដីអំពីការងារសន្តិសុខ នៅព្រឹកថ្ងៃទី០៤ ខែសីហា ឆ្នាំ២០២៥ ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត និងជាគណៈបញ្ជាការឯកភាពខេត្ត បានធ្វើការណែនាំដល់អាជ្ញាធរគ្រប់លំដាប់ថ្នាក់ទាំងអស់របស់ខេត្តពាក់ព័ន្ធទៅនឹងសភាពការណ៍បច្ចុប្បន្ន ដោយត្រូវយកចិត្ដទុកដាក់ខ្ពស់លើចំណុច៤ជាសំខាន់៖ ទី១. ការងារសន្តិសុខ សណ្ដាប់ធ្នាប់សាធារណៈ ត្រូវគ្រប់គ្រងឱ្យបានល្អធានាឱ្យបានសន្តិសុខសណ្តាប់ធ្នាប់នៅតាមមូលដ្ឋានទប់ស្កាត់ឱ្យមានប្រសិទ្ធភាពរាល់សកម្មភាពបទល្មើសគ្រប់ប្រភេទគឺត្រូវបន្តពង្រឹងការអនុវត្តគោលនយោបាយភូមិឃុំសង្កាត់មានសុវត្ថិភាពដែលជាមូលដ្ឋានគ្រឹះនៃការងារសន្តិសុខសណ្តាប់ធ្នាប់សាធារណៈ។ ទី២. ត្រូវយកចិត្តទុកដាក់លើប្រជាពលរដ្ឋភៀសសឹក នៅតាមមូលដ្ឋានរបស់ខ្លួន ដែលជាគោលដៅក្នុងការដោះស្រាយ បញ្ហាប្រឈមចំពោះពួកគាត់នឹងត្រូវជួយផ្ដល់ជូននូវស្បៀងអាហារ ដើម្បីទ្រទ្រង់ជីវភាពប្រចាំថ្ងៃរបស់ពួកគាត់។ ទី៣. ត្រៀមរៀបចំដោះស្រាយស្ថានភាពពលករដែលវិលត្រឡប់មកពីប្រទេសថៃ ដែលមកដល់លំនៅដ្ឋានរបស់ពួកគាត់ហើយ យើងត្រូវជួយរកការងារឱ្យពួកគាត់ និងទី៤. ត្រូវត្រៀមលក្ខណ:សម្បត្តិឱ្យបានគ្រប់គ្រាន់សម្រាប់ការធ្វើអន្តរាគមន៍គ្រោះទឹកជំនន់ ដែលស្ថានភាពទឹកជំនន់ទន្លេមេគង្គ ដែលកំពុងហក់ឡើងមកដល់ថ្ងៃនេះ។

ទន្ទឹមនឹងនេះ ឯកឧត្តមអភិបាលខេត្តក៏បានក្រើនរំលឹកដល់បណ្តាមន្ទីរ អង្គភាព អាជ្ញាធរ គ្រប់លំដាប់ថ្នាក់ ក្រុង ស្រុក ត្រូវ បង្កើតការយកចិត្តទុកដាក់ខ្ពស់ចំពោះបញ្ហាសន្តិសុខក្នុងមូលដ្ឋាន លុបបំបាត់ល្បែងស៊ីសងគ្រប់ប្រភេទ និងពង្រឹងការអនុវត្តគោលនយោបាយភូមិឃុំមានសុវត្ថិភាព ដើម្បីប្រយោជន៍ប្រជាពលរដ្ឋក្នុងមូលដ្ឋានរបស់ខ្លួន៕

ដោយ ឆាយ ម៉ុត