AKP ភ្នំពេញ ថ្ងៃទី០៤ ខែសីហា ឆ្នាំ២០២៥--ឯកឧត្តម ប៉ែន បូណា រដ្ឋមន្រ្ដីប្រតិភូអមនាយករដ្ឋមន្រ្ដី និងជាប្រធានអង្គភាពអ្នកនាំពាក្យរាជរដ្ឋាភិបាល បានថ្លែងថា កម្ពុជាបានឆ្លងរួចហើយនូវវិញ្ញាសា នៅក្នុងជម្លោះប្រដាប់អាវុធរយៈពេល៥ថ្ងៃកន្លងមកនេះ ចាប់ពីថ្ងៃទី២៤ ដល់២៨ ខែកក្កដា ឆ្នាំ២០២៥។ កម្ពុជាជាប្រទេសតូចតែទទួលបានការចាប់អារម្មណ៍ដោយការភ្ញាក់ផ្អើលនិងកោតសរសើរពីសហគមន៍អន្តរជាតិ ដោយសារកម្ពុជាមានកម្លាំងមហាសាមគ្គីផ្ទៃក្នុងដ៏រឹងមាំនិងដើរស្របជាមួយសហគមន៍អន្តរជាតិ។

ថ្លែងក្នុងសន្និសីទសារព័ត៌មានស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាព្រឹកថ្ងៃទី០៤ ខែសីហា ឆ្នាំ២០២៥ នៅទីស្តីកាគណៈរដ្ឋមន្ត្រី ឯកឧត្តម ប៉ែន បូណា បានគូសបញ្ជាក់ពីចំណុចខ្លាំង៤យ៉ាងដែលនាំឱ្យកម្ពុជាទទួលបានការកោតសរសើរពីមជ្ឈដ្ឋានខាងក្រៅ។

ចំណុចខ្លាំងទី១. កម្ពុជាមានថ្នាក់ដឹកនាំដែលមានបទពិសោធន៍ មានភាពវាងវៃប្រកបដោយយុទ្ធសាស្ត្រ និងចក្ខុវិស័យវែងឆ្ងាយ ទាំងផ្នែកយោធា នយោបាយ និងការទូត ហើយជាថ្នាក់ដឹកនាំដែលស្រឡាញ់សន្តិភាព និងឈរលើគោលការណ៍ច្បាប់អន្តរជាតិ។

ចំណុចខ្លាំងទី២. កម្ពុជាមានវីរកងទ័ព និងវីរកងកម្លាំងប្រដាប់អាវុធដ៏អង់អាចក្លាហានប្តូរផ្ដាច់ការពារសន្តិភាព ការពារបូរណភាពទឹកដី និងការពារមោទនភាពជាតិខែ្មរ។ 

ចំណុចខ្លាំងទី៣ កម្ពុជាមានប្រជាពលរដ្ឋដែលចេះរួបរួមសាមគ្គីគ្នាជាធ្លង់មួយ ជាពិសេសនៅពេលដែលប្រទេសជាតិ ប្រឈមនឹងហានិភ័យដោយការឈ្លានពាន ឬការគំរាមកំហែងពីខាងក្រៅ។ ប្រជាពលរដ្ឋខ្មែរគឺជាអ្នកជាតិនិយម ប៉ុន្តែមិនជ្រុលនិយម។

និងចំណុចខ្លាំងទី៤៖ កម្ពុជាមានប្រព័ន្ធដឹកនាំមួយដែលឯកភាព និងមានវិន័យ ពោលគឺ ទាំងមន្ត្រីរាជការស៊ីវិល ទាំងកងកម្លាំងប្រដាប់អាវុធ ស្ដាប់ការណែនាំ និងគោរពបទបញ្ជារបស់ថ្នាក់ដឹកនាំយ៉ាងម៉ឺងម៉ាត់។

បើតាម ឯកឧត្តម ប្រធានអង្គភាពអ្នកនាំពាក្យរាជរដ្ឋាភិបាល កម្ពុជាមានចំណុចខ្លាំងទាំងបួននេះហើយ ទើបកម្ពុជាទទួលបានការអបអរពីអន្តរជាតិ«ដូច្នេះខ្ញុំសុំស្នើបងប្អូនប្រជាពលរដ្ឋរបស់យើងថែរក្សាឱ្យបាននូវកម្លាំងមហាសាមគ្គីដ៏រឹងមាំនេះ ជារៀងរហូត ហើយជាពិសេសគឺត្រូវជៀសវាងការទទួលបានព័ត៌មានក្លែងក្លាយ ព័ត៌មានដែលមិនច្បាស់លាស់ ហើយជាពិសេសព័ត៌មានណាដែលមានចរិតបំបែកបំបាក់មហាសាមគ្គីជាតិដ៏រឹងមាំរបស់យើង ហើយបងប្អូនយើងរង់ចាំទទួលព័ត៌មានផ្លូវការពីរាជរដ្ឋាភិបាលដើម្បីធ្វើជាប្រភពនៃព័ត៌មានច្បាស់លាស់បាទ»៕

ដោយ៖ គង់ សិរីរ័ត្ន