AKP ភ្នំពេញ ថ្ងៃទី០៤ ខែសីហា ឆ្នាំ២០២៥--លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិកម្ពុជាបានលើកឡើងថា រហូតមកទល់ពេលនេះសភាពការណ៍នៅតាមព្រំដែនកម្ពុជា-ថៃ ជាទូទៅគឺមានសភាពស្ងប់ស្ងាត់ជាធម្មតា តែកងកម្លាំងរបស់យើងក៏នៅតែបន្តរក្សាការប្រុងប្រយ័ត្នខ្ពស់ក្នុងការបំពេញតួនាទីរបស់ខ្លួនបានយ៉ាងខ្ជាប់ខ្ជួន។ ការបញ្ជាក់របស់អ្នកនាំពាក្យក្រសួងការពារជាតិយ៉ាងដូច្នេះ ក្នុងឱកាសការធ្វើសេចក្តីសង្ខេបព័ត៌មានស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាព្រឹកថ្ងៃទី០៤ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី ។

លោកជំទាវ ឧត្តមសេនីយ៍ឯក ម៉ាលី សុជាតា បានអះអាងថា កម្ពុជាបន្តគោរពយ៉ាងម៉ឺងម៉ាត់លើការអនុវត្តបទឈប់បាញ់ដែលបានឯកភាពគ្នារវាងកម្ពុជា និងថៃ នៅប្រទេសម៉ាឡេស៊ីនាពេលកន្លងមក ខណៈដែលកាលពីរសៀលថ្ងៃទី០៣ ខែសីហា ឆ្នាំ២០២៥ គណៈប្រតិភូក្រុមលេខាធិការគណៈកម្មាធិការកិច្ចការព្រំដែនទូទៅកម្ពុជា-ថៃ (GBC) ក៏បានធ្វើដំណើរទៅដល់ប្រទេសម៉ាឡេស៊ីហើយដែរនោះ ដែលប្រតិភូក្រុមលេខាធិការគណៈកម្មាធិការកិច្ចការព្រំដែនទូទៅកម្ពុជា-ថៃ (GBC) នេះនឹងមានកិច្ចប្រជុំមួយចំនួនដើម្បីត្រៀមសម្រាប់កិច្ចប្រជុំលើបទឈប់បាញ់ រួមនឹងគោលការណ៍នៃការកសាងទំនុកចិត្តគ្នាដែលប្រព្រឹត្ត ទៅពីថ្ងៃទី០៤ ដល់ថ្ងៃទី០៦ ខែសីហា ឆ្នាំ២០២៥ មុននឹងកិច្ចប្រជុំវិសាមញ្ញរបស់គណៈកម្មាធិការកិច្ចការ ព្រំដែនទូទៅកម្ពុជា-ថៃ (GBC) ត្រូវធ្វើឡើងក្នុងពេលបន្ទាប់ គឺនៅថ្ងៃទី០៧  ខែសីហា ឆ្នាំ២០២៥ ខាងមុខ៕

ដោយ៖ ចាន់ សុភឿន