AKP ភ្នំពេញ ថ្ងៃទី០៤ ខែសីហា ឆ្នាំ២០២៥--ឯកអគ្គរដ្ឋទូតអាល្លឺម៉ង់ប្រចាំកម្ពុជា បញ្ជាក់ពីការប្តេជ្ញាចិត្តរបស់អាល្លឺម៉ង់ក្នុងការគាំទ្រសន្តិភាពតាមរយៈការសន្ទនា ដោយសង្កត់ធ្ងន់ថាអ្នកដែលរងផលប៉ះពាល់ខ្លាំងបំផុត ជាពិសេសបុគ្គល និងគ្រួសារដែលត្រូវបានផ្លាស់ទីលំនៅ មិនត្រូវបំភ្លេចចោលក្នុងដំណើរការ នៃការទូតឡើយ។

ក្នុងដំណើរទស្សនកិច្ចនាពេលថ្មីៗនេះរបស់ឯកឧត្តមឯកអគ្គរដ្ឋទូតអាល្លឺម៉ង់ប្រចាំនៅកម្ពុជា  Stefan Messerer ទៅកាន់តំបន់ព្រំដែនក្នុងខេត្តឧត្តរមានជ័យ និងខេត្តសៀមរាប នៅថ្ងៃសុក្រ ទី០១ ខែសីហា រួមជាមួយនឹង ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្រ្តីក្រសួងការបរទេស និងសហប្រតិបត្តិការអន្ដរជាតិ និងសមាជិកសហគមន៍ការទូត ធ្វើជាការរម្លឹកទាន់ពេលវេលាថា ចំណុចស្នូលនៃជម្លោះនីមួយៗគឺជាជីវិតពិត និងមនុស្សពិត។

បន្ទាប់ពីបទឈប់បាញ់នាពេលថ្មីៗនេះ ដំណើរទស្សនកិច្ចនេះបានបំភ្លឺអំពីស្ថានភាពនៃជនភៀសសឹកដែលត្រូវបានបង្ខំឱ្យចាកចេញពីផ្ទះរបស់ពួកគេ។ 

ឯកឧត្តម  Stefan Messerer បានបញ្ជាក់ជាថ្មីពីការប្តេជ្ញាចិត្តរបស់អាល្លឺម៉ង់ក្នុងការគាំទ្រសន្តិភាពតាមរយៈការសន្ទនា ដោយសង្កត់ធ្ងន់ថាអ្នកដែលរងផលប៉ះពាល់ខ្លាំងបំផុត ជាពិសេសបុគ្គល និងគ្រួសារដែលត្រូវបានផ្លាស់ទីលំនៅ មិនត្រូវបំភ្លេចចោលក្នុងដំណើរការនៃការទូតឡើយ។ ឯកឧត្ដមបន្ដថា សុវត្ថិភាព សេចក្តីថ្លៃថ្នូរ និងសិទ្ធិក្នុងការវិលត្រឡប់មកមាតុភូមិវិញដោយសន្តិភាព ត្រូវតែរក្សាជាស្នូលនៃកិច្ចខិតខំប្រឹងប្រែងទាំងអស់ឆ្ពោះទៅរកការបន្ធូរបន្ថយភាពតានតឹង និងការផ្សះផ្សា។

ឯកឧត្ដមឯកអគ្គរដ្ឋទូតបានបន្ថែមថា ប្រទេសអាល្លឺម៉ង់ស្វាគមន៍ការកោះប្រជុំ GBC ជាជំហានដ៏សំខាន់មួយឆ្ពោះទៅរកការកសាងទំនុកចិត្ត និងស្ថិរភាពឡើងវិញ។ សន្តិភាពប្រកបដោយនិរន្តរភាពទាមទារលើសពីកិច្ចព្រមព្រៀងដែលបានចរចា វាទាមទារឱ្យស្តាប់អ្នកដែលមិននៅតុចរចា ប៉ុន្តែនៅជិតការរងគ្រោះបំផុត។

ជាមួយគ្នានេះដែរ ស្ថានទូតកាណាដាប្រចាំកម្ពុជា បញ្ជាក់ឡើងវិញនូវការគាំទ្រ ចំពោះការសន្ទនាបន្តរវាងកម្ពុជា និងថៃ ដើម្បីសម្រេចបាននូវសន្តិភាពយូរអង្វែង។ 

លោក David Verbiwski ភារធារី នៃស្ថានទូតកាណាដា ប្រចាំទីក្រុងភ្នំពេញ ព្រះរាជាណាចក្រកម្ពុជា បានចូលរួមដំណើរជាមួយ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ព្រមទាំង ឯកអគ្គរាជទូត ឯកអគ្គរដ្ឋទូត មកពីបណ្តាប្រទេសនានាប្រចាំនៅកម្ពុជា និងអភិបាលខេត្តឧត្តរមានជ័យ និងខេត្ដសៀមរាប នៅថ្ងៃទី០១ និង០២ ខែសីហា ឆ្នាំ២០២៥ ក្នុងការទស្សនកិច្ចទៅតំបន់ព្រំដែន ដែលទទួលរងផលប៉ះពាល់ដោយសារការតានតឹងរវាងកម្ពុជា និងថៃ នាពេលថ្មីៗនេះ រួមមានទីជម្រករបស់ប្រជាជន ជំរំភៀសសឹក។ 

លោក David Verbiwski បានលើកឡើងថា កាណាដាបញ្ជាក់ឡើងវិញនូវការគាំទ្រ ចំពោះការសន្ទនាបន្តរវាងកម្ពុជា និងថៃ ដើម្បីសម្រេចបាននូវសន្តិភាពយូរអង្វែង ដែលអនុញ្ញាតឱ្យប្រជាជនភៀសសឹកអាចត្រលប់ទៅផ្ទះរបស់ពួកគេវិញដើម្បីស្ដារឡើងវិញនូវជីវភាព និងរស់នៅក្នុងសន្តិភាព៕

ដោយ៖ AKP