AKP តាកែវ ថ្ងៃទី០៤ ខែសីហា ឆ្នាំ២០២៥-- នៅបរិវេណសាលាសង្កាត់បារាយណ៍ ក្រុងដូនកែវ ខេត្តតាកែវ បានរៀបចំពិធីចែកអំណោយមនុស្សធម៌ «មហាគ្រួសារខ្មែរ» មកចែកជូនបងប្អូនប្រជាពលរដ្ឋភៀសសឹក ដោយសារការប្រយុទ្ធគ្នារវាងកងទ័ពកម្ពុជាយើង និងកងទ័ពឈ្លានពានសៀមចំនួន៣០គ្រួសារដែលទើបវិលត្រឡប់មកពីខេត្តឧត្តរមានជ័យ មកស្នាក់នៅបណ្ដោះអាសន្ននៅក្នុងសង្កាត់បារាយណ៍ ក្រុងដូនកែវ ខេត្តតាកែវ កាលពីថ្ងៃទី០៣ ខែសីហា ឆ្នាំ២០២៥ ក្រោមវត្តមានរបស់លោក កង អាណាន់ អភិបាលនៃគណៈអភិបាលក្រុងដូនកែវ ព្រមទាំងមានការចូលរួមពីថ្នាក់ដឹកនាំ និងមន្ត្រីរាជការពាក់ព័ន្ធផងដែរ។

មានប្រសាសន៍សំណេះសំណាលក្នុងពេលនោះ លោក កង អាណាន់ បានមានប្រសាសន៍ថា ដោយឃើញពីការលំបាករបស់បងប្អូនភៀសសឹក ដែលបានមកស្នាក់នៅក្នុងក្រុងដូនកែវ ពិសេសសង្កាត់បារាយណ៍នេះតែម្ដង ទើបអាជ្ញាធរក្រុងដូនកែវនាំយកអំណោយមនុស្សធម៌មកចែកជូនបងប្អូន ដើម្បីជួយសម្រាលការលំបាកខ្វះខាតផ្នែកជីវភាពរស់នៅប្រចាំថ្ងៃខ្លះ។ អំណោយដែលបានយកមកផ្ដល់ជូនបងប្អូនប្រជាពលរដ្ឋភៀសសឹក នាពេលនេះគឺបានមកពីការចូលរួម «មហាគ្រួសារខ្មែរ» ចេញពីទឹកចិត្តរបស់បងប្អូនប្រជាពលរដ្ឋទូទាំងក្រុងដូនកែវ ដែលបានចូលរួមជាមួយអាជ្ញាធរក្រុង ទុកសម្រាប់ចែកជូនបងប្អូនប្រជាពលរដ្ឋភៀសសឹក ក៏ដូចជាវីរកងទ័ពកំពុងឈរជើងនៅសមរភូមិមុខ ដែលបានបូជាសាច់ស្រស់ ឈាមស្រស់ ក្នុងការការពារបូរណភាពទឹកដី ជូនជាតិមាតុភូមិដោយអង់អាចក្លាហាន។

លោកអភិបាលក្រុងដូនកែវបានមានប្រសាសន៍បន្តថា បើទោះបីជាអំណោយដែលបានផ្ដល់ជូនបងប្អូនប្រជាពលរដ្ឋ នាពេលនេះមិនច្រើនក្ដី ប៉ុន្តែកើតចេញពីទឹកចិត្តមហាគ្រួសារខ្មែរ ដែលអាចជួយសម្រាលទុក្ខលំបាករបស់បងប្អូនបានមួយគ្រាដែរ ហើយក្នុងនាមអាជ្ញាធរមូលដ្ឋាន យើងនឹងបន្តយកចិត្តទុកដាក់ដល់ពុកម៉ែបងប្អូនប្រជាពលរដ្ឋភៀសសឹកគ្រប់ពេលវេលា។

លោក កង អាណាន់ អភិបាលនៃគណៈអភិបាលក្រុងដូនកែវ បានមានប្រសាសន៍បន្ថែមថា ក្រោមការដឹកនាំរបស់ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បច្ចុប្បន្ននៅក្នុងក្រុងដូនកែវខេត្តតាកែវ មានរោងចក្រ សហគ្រាស មធ្យម និងតូចជាច្រើនកំពុងបើកដំណើរការ ហើយក៏កំពុងត្រូវការជ្រើសរើសកម្លាំងពលកម្មជាច្រើនកន្លែង ដែលបងប្អូនអាចដាក់ពាក្យចូលបម្រើការងារបានទៅតាមជំនាញរៀងៗខ្លួន។

សូមបញ្ជាក់ថា អំណោយ «មហាគ្រួសារខ្មែរ» ដែលបានយកមកចែកជូនបងប្អូនប្រជាពលរដ្ឋភៀសសឹកទាំង៣០គ្រួសារ នាពេលនេះរួមមានគ្រឿងឧបភោគបរិភោគ និងថវិកា រួមមាន ក្នុងមួយគ្រួសារៗ ទទួលបានអង្ករ២៥គីឡូក្រាម មី១កេស ទឹកត្រី១យួរ និងថវិកា៥ម៉ឺនរៀលផងដែរ៕

ដោយ អ៊ុច សៀង