AKP ភ្នំពេញ ថ្ងៃទី០៣ ខែសីហា ឆ្នាំ២០២៥--លោកជំទាវឧត្ដមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិបានគូសបញ្ជាក់ថា ក្រុមអ្នកសង្កេតការណ៍អនុព័ន្ធយោធាអាស៊ាន(អន្តរកាល)ចំនួន៧ប្រទេស នឹងចុះពិនិត្យមើលការអនុវត្តបទឈប់បាញ់នៅតំបន់រងផលប៉ះពាល់ នៃការប៉ះទង្គិចគ្នាដោយប្រដាប់អាវុធរវាងយោធាកម្ពុជា-ថៃ។

ថ្លែងក្នុងសន្និសីទសាររព័ត៌ស្ដីពីលទ្ធផលនៃការអនុវត្តបទឈប់បាញ់រវាង កម្ពុជា-ថៃ នាព្រឹកថ្ងៃទី០៣ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី លោកជំទាវឧត្ដមសេនីយ៍ឯក ម៉ាលី សុជាតា បានលើកឡើងថា ក្រុមអ្នកសង្កេតការណ៍អនុព័ន្ធយោធាអាស៊ាន (អន្តរកាល)ចំនួន៧ប្រទេស នឹងចុះទៅពិនិត្យសង្កេតការណ៍នៅបណ្តាទីតាំងមួយចំនួន ដើម្បីពិនិត្យការអនុវត្តបទឈប់បាញ់ ក្នុងនោះរួមមាន ខេត្តឧត្តរមានជ័យ និងខេត្តព្រះវិហារ ដែលជាតំបន់រងផលប៉ះពាល់ នៃការប៉ះទង្គិចប្រដាប់អាវុធរវាងយោធាកម្ពុជា និងយោធាថៃ។ លោកជំទាវឧត្ដមសេនីយ៍ឯក អ្នកនាំពាក្យក្រសួងការពារជាតិបានបញ្ជាក់ឱ្យដឹងថា ក្រុមអ្នកសង្កេតការណ៍អនុព័ន្ធយោធាអាស៊ាន(អន្តរកាល)ដឹកនាំដោយអនុព័ន្ធយោធាប្រទេសម៉ាឡេស៊ី នឹងមានការចូលរួមពីបណ្តាប្រទេសចំនួន៦ ដូចជា៖ ១. ប្រទេសឥណ្ឌូណេស៊ី ២. ប្រទេសឡាវ ៣. ប្រទេសមីយ៉ាន់ម៉ា ៤. ប្រទេសហ្វីលីពីន ៥. ប្រទេសសិង្ហបុរី និង៦. ប្រទេសវៀតណាម។ លោកជំទាវឧត្ដមសេនីយ៍ឯក បានបន្ថែមថា សកម្មភាពរបស់ក្រុមអ្នកសង្កេតការណ៍កើតចេញពីលទ្ធផលបន្តពីការប្រជុំពិសេសកាលពីថ្ងៃទី២៨ ខែកក្កដា ឆ្នាំ២០២៥ នៅប្រទេសម៉ាឡេស៊ី ដែលបានឯកភាពគ្នាក្នុងការអនុវត្តបទឈប់បាញ់ ។ 

លោកជំទាវឧត្ដមសេនីយ៍ឯក ម៉ាលី សុជាតា បានអះអាងថា មកដល់ពេលនេះ បានធ្វើឱ្យស្ថានការណ៍នៅ តាមតំបន់ព្រំដែនមានភាពធូរស្រាលជាងមុន។ លោកជំទាវឧត្ដមសេនីយ៍ឯក បានឱ្យដឹងទៀតថា ការចុះពិនិត្យជាលើកទី២នេះ ក្រុមអ្នកសង្កេតការណ៍អន្តរកាលដឹកនាំដោយអនុព័ន្ធយោធាប្រទេសម៉ាឡេស៊ី នឹងធ្វើការបំពេញបេសកកម្មក្នុងរយៈពេលពីរសប្តាហ៍ពេញតែម្តង។  

ជាមួយគ្នានេះ លោកជំទាវឧត្ដមសេនីយ៍ឯក អ្នកនាំពាក្យក្រសួងការពារជាតិកម្ពុជាបានចាត់ទុក ការចូលរួមរបស់ប្រទេសដៃគូទាំងអស់បានឆ្លុះបញ្ចាំងឱ្យឃើញពីបំណងប្រាថ្នារួមក្នុងការអនុវត្តបទឈប់បាញ់ ឱ្យទទួលបានជោគជ័យ និងយូរអង្វែង ជាមួយគោលដៅនាំមកនូវសន្តិភាព កិច្ចសហប្រតិបត្តិការ និងការអភិវឌ្ឍ សម្រាប់ប្រជាជនប្រទេសទាំងពីរ៕

ដោយ៖ ប៊ុនរិទ្ធ