AKP ភ្នំពេញ ថ្ងៃទី០៣ ខែសីហា ឆ្នាំ២០២៥--ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានថ្លែងអំណរគុណសាជាថ្មីម្ដងទៀតជូនចំពោះជនរួមជាតិទាំងអស់ ទាំងក្នុងនិងក្រៅប្រទេសដែលបានក្រោកឈរឡើងយ៉ាងស្រុះគ្នា ដើម្បីស្រែកការពារសន្តិភាព គាំទ្រកងកម្លាំងប្រដាប់អាវុធដ៏អង់អាចក្លាហាន និងទាមទារឱ្យភាគីថៃដោះលែងកងកម្លាំងកម្ពុជាទាំង១៨នាក់ឱ្យវិលត្រឡប់មកប្រទេសវិញឱ្យបានឆាប់។

ក្នុងឱកាសនៃការធ្វើសេចក្តីសង្ខេបព័ត៌មានស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នៅទីស្តីការគណៈរដ្ឋមន្ត្រី នាព្រឹកថ្ងៃទី០៣ ខែសីហា ឆ្នាំ២០២៥នេះ ឯកឧត្តមប្រធានអង្គភាពអ្នកនាំពាក្យរាជរដ្ឋាភិបាល បានឱ្យដឹងថា «សំឡេងរបស់ប្រជាពលរដ្ឋខ្មែរដែលលាន់ឮពាសពេញពិភពលោកនៅពេលនេះ សបញ្ជាក់ប្រាប់សហគមន៍អន្តរជាតិទាំងមូលឱ្យដឹងយ៉ាងច្បាស់ថា កម្ពុជា និងប្រជាពលរដ្ឋខ្មែរត្រូវការរស់នៅក្នុងសុខសន្តិភាពនិងគ្មានការបំពារបំពាន។ ក្នុងនាមជាប្រទេសស្រឡាញ់សន្តិភាព កម្ពុជាមិនឈ្លានពានប្រទេសណា ហើយក៏មិនបង្ករឿងជាមួយប្រទេសណាជាដាច់ខាត ពោលគឺកម្ពុជាសុំសិទ្ធិតែការពារបូរណភាពទឹកដីរបស់ខ្លួន ការពារកិត្តិយសនិងសេចក្ដីថ្លៃថ្នូរបស់ខ្លួនចេញពីការបំពារបំពាននិងការប្រមាទមាក់ងាយតែប៉ុណ្ណោះ»។ 

ឯកឧត្តមប្រធានអង្គភាពអ្នកនាំពាក្យរាជរដ្ឋាភិបាល បានបន្ថែមថា ដូចដែលប្រជាពលរដ្ឋខ្មែរបានជ្រាបពេញបេះដូងទាំងអស់គ្នា សន្តិភាពគឺជាអត្តសញ្ញាណរបស់កម្ពុជានៅក្នុងយុគសម័យតេជោធិបតី។ ថ្នាក់ដឹកនាំរបស់យើង ចាត់ទុកសន្តិភាពដែលកើតចេញពីនយោបាយ ឈ្នះ ឈ្នះ របស់សម្ដេចតេជោ ហ៊ុន សែន គឺជារបស់ដ៏មានតម្លៃជាងអ្វីៗទាំងអស់ ហើយជារបស់ដ៏កម្រក្រៃណាស់សម្រាប់កម្ពុជាក្នុងរយៈពេលជាង៥០០ឆ្នាំ។ 

ក្នុងន័យនេះ ឯកឧត្តមប្រធានអង្គភាពអ្នកនាំពាក្យរាជរដ្ឋាភិបាល សូមគូសបញ្ជាក់ជូនជនរួមជាតិឱ្យបានជ្រាបជាថ្មីថា បទឈប់បាញ់ដែលបានចូលជាធរមានតាំងពីពាក់កណ្ដាលអធ្រាត្រថ្ងៃទី២៨ ខែកក្កដា ឆ្នាំ២០២៥ កន្លងទៅនេះ គឺកើតឡើងដោយស្មារតីស្រឡញ់សុខសន្តិភាព នៃថ្នាក់ដឹកនាំរបស់យើង ក្រោមការជ្រោមជ្រែងពីមេដឹកនាំបណ្ដាប្រទេសធំៗដែលស្រឡាញ់សន្តិភាពដូចយើងដែរ។ 

កិច្ចព្រមព្រៀងឈប់បាញ់នេះក៏ទទួលបានការសាទរពីបណ្ដាមេដឹកនាំពិភពលោកជាច្រើន បច្ចុប្បន្នការអនុវត្តបទឈប់បាញ់កំពុងតែប្រព្រឹត្តិទៅក្រោមក្រសែភ្នែកតាមដានដោយយកចិត្តទុកដាក់ពីសហគមន៍អន្តរជាតិ៕

ដោយ៖ គង់ សិរីរ័ត្ន