AKPកំពង់ធំថ្ងៃទី០៣ ខែសីហា ឆ្នាំ២០២៥ --លោកសាយ គឹមឡមអភិបាលស្រុកស្ទោង បានលើកទឹកចិត្តដល់បងប្អូនពលករត្រូវធ្វើការងារនៅក្នុងស្រុក ជាជាងក្រៅស្រុកដើម្បីនិរន្តរភាពការងារប្រាក់ចំណូលនិងអត្ថប្រយោជន៍បន្ថែមជាច្រើនទៀត។

ក្នុងឱកាសដែលលោកព្រមទាំងការិយាល័យមេធាវីណារ៉ា បានអញ្ជើញជាអធិបតីភាពក្នុងពិធីសំណេះសំណាល សួរសុខទុក្ខនិងចែកអំណោយជូនដល់បងប្អូនពលករនិងជនភៀសសឹកដែលបានទើបធ្វើមាតុភូមិនិវត្តន៍ពីប្រទេសថៃដោយសង្គ្រាមឈ្លានពានរបស់សៀមពីព្រំដែនកម្ពុជា-ថៃ នៅក្នុងឃុំបន្ទាយស្ទោង ឃុំរុងរឿង និងឃុំព្រះដំរីកាលពីរសៀលថ្ងៃទី០២ ខែសីហា ឆ្នាំ ២០២៥។ 

ទន្ទឹមនឹងនេះលោកអភិបាលស្រុកបានណែនាំដល់អាជ្ញាធរភូមិ ឃុំ ត្រូវបង្កើនការយកចិត្តទុកដាក់ថែមទៀតដល់សុខទុក្ខ សុខមាលភាពបងប្អូនដែលបានមកដល់មូលដ្ឋាន ជាពិសេសត្រូវធ្វើរបាយការណ៍ឱ្យបានជាប្រចាំជូនដល់អាជ្ញាធរស្រុក ដើម្បីមានលទ្ធភាពសួរសុខទុក្ខឬផ្គត់ផ្គង់ទ្រទ្រង់ជីវភាពពួកគាត់ឱ្យបានល្អប្រសើរនៅក្នុងស្ថានភាពដែលប្រទេសកំពុងរងគ្រោះដោយសារសង្គ្រាមឈ្លានពាន។

 
លោកសាយ គឹមឡមអភិបាលស្រុកស្ទោង បានថ្លែងអំណរគុណយ៉ាងជ្រាលជ្រៅបំផុតដល់ការិយាល័យមេធាវីណារ៉ាខេត្តកំពង់ធំ និងសហការីដែលបានសហការឧបត្ថម្ភគាំទ្រផ្ដល់គ្រឿងឧបភោគបរិភោគ និងថវិកាសម្រាប់ចែកជូនដល់បងប្អូនប្រជាពលករ និងជនភៀសឹកនៅក្នុងឱកាសនេះដែលជាកាយវិការគួរឱ្យស្ញើចសរសើរបំផុត ក្នុងការរួបរួមសហការជាមួយអាជ្ញាធរស្រុកស្ទោង និងលើកកម្ពស់ស្មារតីជាតិនិយមកាន់តែពុះកញ្ជ្រោលឡើងថែមទៀតដើម្បីទប់ទល់នឹងការឈ្លានពានរបស់ចោរសៀម។ 

សូមបញ្ជាក់ថា នៅក្នុងពិធីចែកអំណោយនេះមានជនភៀសសឹក និងពលករចំនួន១០០នាក់ក្នុងម្នាក់ទទួលបាននូវគ្រឿងឧបភោគបរិភោគមួយចំនួននិងថវិកា១ម៉ឺនរៀល៕

ដោយ៖ ស៊ុម វណ្ណា