AKP សៀមរាប ថ្ងៃទី០២ ខែសីហា ឆ្នាំ២០២៥ -- រដ្ឋបាលស្រុកប្រាសាទបាគង សហការជាមួយមន្រ្ដីសង្ឃស្រុក នារសៀលថ្ងៃទី២ ខែសីហា ឆ្នាំ២០២៥នេះបានរៀបចំពិធីបួងសួង សុំសេចក្តីសុខ និងគោរពវិញ្ញាណក្ខន្ធជូនដល់វីរកងទ័ពដែលបានពលីជីវិតជូនជាតិមាតុភូមិ ក្នុងកំឡុងពេលសង្រ្គាម ដោយពិធីនេះធ្វើឡើងក្រោមអធិបតីភាព លោកជំទាវ តឹករ៉េត កំរង ប្រធានក្រុមការងាររាជរដ្ឋាភិបាលចុះមូលដ្ឋានស្រុកប្រាសាទបាគង លោក  ឌី រ៉ាដូ អភិបាលរងខេត្ដ រួមជាមួយអាជ្ញាធរស្រុក ក្រុមប្រឹក្សាស្រុក អាជ្ញាធរមូលដ្ឋាន លោកគ្រូ អ្នកគ្រូ បងប្អូនប្រជាពលរដ្ឋ និងសិស្សានុសិស្សជាច្រើនរូប។

ថ្លែងនាក្នុងពិធីបួងសួង សុំសេចក្ដីសុខ និងគោរពវិញ្ញាណក្ឋន្ធវីរកងទ័ពខ្មែរ លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកប្រាសាទបាគង មានប្រសាសន៍ថា ការពលីជីវិតរបស់កងទ័ពនៅសមិរភូមិជួរមុខ ក្នុងពេលមានសង្រ្គាម គឺជាការលះបង់នូវសាច់ស្រស់ ឈាមស្រស់ ក្នុងបុព្វហេតុការពារទឹកដី ការពារជាតិ មាតុភូមិពីសំណាក់សត្រូវ និងមិនឱ្យសត្រូវឈ្លានពានបានឡើយ។ ការពលីជីវិតជូនជាតុមាតុភូមិរបស់វីរកងទ័ពនេះ គឺជាគុណបំណាច់យ៉ាងធំធេង ដែលមិនអាចកាត់ថ្លៃបាន ដែលដក់ជាប់ក្នុងបេះដូងរបស់ប្រជាជនខ្មែរគ្រប់ៗរូបតជំនាន់។ 

លោកជំទាវក៏បានបួងសួងដល់វត្ថុសក្ដិសិទ្ធដែលមាននៅក្នុងលោកជួយថែរក្សាការពារ វីរកងទ័ពខ្មែរឱ្យទទួលបានជោគជ័យក្នុងសមរភូមិ និងសូមគោរពវិញ្ញាណក្ខនរបស់កងទ័ពខ្មែរយើងដែលទទួលមរណៈភាពក្នុងសមរភូមិ សូមទៅកាន់សុគតិភព កូនចៅនឹងចងចាំនូវវីរភាពដ៍អង់អាចក្លាហានរបស់កងទ័ពខ្មែរជារៀងរហូត។

លោក  ឌី រ៉ាដូ អភិបាលរងខេត្ដសៀមរាប  បានឱ្យដឹងថា សង្រ្គាមតែងតែបានបង្ករនូវផលវិបាល និងមហន្ដរាយផ្សេងៗជាច្រើន ដូចជា បាត់បង់អាយុជីវិត ព្រាត់ប្រាស់គ្រួសារ ផ្ទះសម្បែង ខូចខាតហេដ្ឋារចនាសម្ព័ន្ធផ្សេងៗ ដែលនេះបានបង្ហាញឱ្យឃើញថា សុខសន្ដិភាពគឺមានតម្លៃណាស់ មានសន្ដិភាពពទើបមានការអភិវឌ្ឍន៍ ដូចនេះ ចូរយើងគ្រប់គ្នា ថែរក្សាសន្ដិភាពឱ្យបានគង់វង្ស។

ស្ថិតក្នុងស្ថានការណ៍ប្រទេសជាតិមានបញ្ហា លោកអភិបាលស្រុកក៏បានអំពាវនាវដល់ប្រជាពលរដ្ឋទាំងអស់ត្រូវក្ដាប់ឱ្យបាននូវព័ត៌មានពិតប្រាកដ មានប្រភពច្បាស់លាស់ ចៀសវាងកការជឿ និងចែករំលែកនូវព័ត៌មានក្លែងក្លាយដែលបង្ករឱ្យមានភាពចលាចលនៅក្នុងសង្គម៕

ដោយ៖ ឃុត សៅ