AKP ភ្នំពេញ ថ្ងៃទី០២ ខែសីហា ឆ្នាំ២០២៥-- ក្រសួងបរិស្ថាន និងតំណាងសហភាពសហព័ន្ធយុវជនកម្ពុជាក្នុងវិស័យបរិស្ថាន នារសៀលថ្ងៃទី០២ ខែសីហា ឆ្នាំ២០២៥ បានផ្តល់ធុងសំរាម ចំនួន៥០ធុង (ចំណុះ២៤០លីត្រ) ជូនដល់រដ្ឋបាលខេត្តបន្ទាយមានជ័យ ដើម្បីបង្កើនភាពស្អាត មានអនាម័យ មានសោភ័ណភាពល្អ និងមានបរិស្ថានល្អ នៅមណ្ឌលសុវត្ថិភាពជនភៀសសឹក និងមណ្ឌលសំចតពលករចំណាកស្រុកពីប្រទេសថៃ ក្នុងភូមិសាស្ត្រខេត្តបន្ទាយមានជ័យ ដែលមានមណ្ឌលសុវត្ថិភាព ចំនួន៧ទីតាំង មានជនភៀសសឹក និងពលករចំណាកស្រុកពីប្រទេសថៃ ចំនួន ៧,៨០២នាក់ (ទិន្នន័យពីរដ្ឋបាលខេត្ត)។

សូមបញ្ជាក់ថា ឯកឧត្តមបណ្ឌិត អ៊ាង សុផល្លែត រួមជាមួយថ្នាក់ដឹកនាំ មន្រ្តីរាជការក្រសួងបរិស្ថានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ ក្រុមការងារសហភាពសហព័ន្ធយុវជនកម្ពុជាក្នុងវិស័យបរិស្ថាន, សមាគមនារីកម្ពុជាដើម្បីសន្តិភាពនិងអភិវឌ្ឍន៍ក្រសួងបរិស្ថាន តែងតែគិតគូរអំពីសុខសុវត្ថិភាព អនាម័យ បរិស្ថាន និងសុខទុក្ខនៃការរស់នៅ ព្រមទាំងការគាំទ្រដល់ការដឹកនាំរបស់រាជរដ្ឋាភិបាលកម្ពុជា និងវីរកងទ័ពកម្ពុជារបស់យើងដែលបានកំពុងការពារយ៉ាងរឹងមាំបន្ទាត់ព្រំដែនកម្ពុជា និងបងប្អូនប្រជាពលរដ្ឋភៀសសឹកមកមណ្ឌលសុវត្ថិភាព និងពលករចំណាកស្រុកមកពីប្រទេសថៃនៅតាមមណ្ឌលសំចតនានាជាប្រចាំ។

គិតត្រឹមថ្ងៃទី០២ ខែសីហានេះ ក្រសួងបរិស្ថានបានផ្តល់ដល់ខេត្តនៅជាប់ព្រំដែនថៃ ចាប់ពីដើមខែកក្កដាមក រួមមាន ៖ រថយន្តដឹកសំរាមចំនួន ២គ្រឿង (១គ្រឿងនៅមណ្ឌលសុវត្ថិភាពពោធិ៍៥០០០ដើម ខេត្តព្រះវិហារ និង១គ្រឿង នៅមណ្ឌលសុវត្ថិភាពវត្តថ្មកំបោរ ខេត្តឧត្តរមានជ័យ) និងធុងសំរាម សរុប ចំនួន ៥៨០ធុង (នៅខេត្តព្រះវិហារ ១៥០ធុង នៅខេត្តសៀមរាប ១៦០ធុង នៅខេត្តឧត្តរមានជ័យ ចំនួន ១២០ធុង នៅខេត្តប៉ៃលិន ចំនួន ៥០ធុង នៅខេត្តពោធិ៍សាត់ ចំនួន ៥០ធុង និងខេត្តបន្ទាយមានជ័យ ចំនួន ៥០ធុង)៕

ដោយ ទេស ច័ន្ទសុធារី (ប្រភព៖ ក្រសួងបរិស្ថាន)