AKP ភ្នំពេញ ថ្ងៃទី០២ ខែសីហា ឆ្នាំ២០២៥--
ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាលបានថ្លែងបញ្ជាក់ថា បច្ចុប្បន្ននេះគឺកំពុងតែមានការក្លែងបន្លំគណនីហ្វេសប៊ុកជាច្រើនដោយគេបានប្រើប្រាស់ឈ្មោះខ្មែរ ក៏ប៉ុន្តែអ្នកដែលបង្កើត និងអ្នកប្រើប្រាស់គណនីទាំងនោះមិនមែនជាខ្មែរទេ នេះគឺជាកលល្បិចថ្មីមួយទៀតដែលគេប្រើប្រាស់ដើម្បីក្លែងបន្លំធ្វើជាជនជាតិខ្មែរ ដាក់ឈ្មោះខ្មែរ សរសេរអក្សរខ្មែរ តែនិយាយដើម្បីបំបែកបំបាក់ស្មារតីសាមគ្គីភាពរបស់ខ្មែរ។ ឯកឧត្ដមក៏បានស្នើឱ្យសូមបងប្អូនមានការប្រុងប្រយ័ត្ន កុំចាញ់ល្បិចកលទាំងនេះឱ្យសោះ។ ការថ្លែងរបស់ឯកឧត្ដមប្រធានអង្គភាពអ្នកនាំពាក្យរាជរដ្ឋាភិបាលយ៉ាងដូច្នេះ ក្នុងឱកាសនៃការធ្វើសេចក្តីសង្ខេបព័ត៌មានស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នៅទីស្តីការគណៈរដ្ឋមន្ត្រី ព្រឹកថ្ងៃទី០២ ខែសីហា ឆ្នាំ២០២៥។

ឯកឧត្តម ប៉ែន បូណា បានលើកឡើងថា នៅក្នុងខណៈនៃវេលានេះជនរួមជាតិយើងទាំងក្នុង និងក្រៅប្រទេសកំពុងមានការសាមគ្គីគ្នាជាធ្លុងមួយ បង្កើតបានជាខឿនការពារទឹកដីយ៉ាងរឹងមាំ និងការពារសេចក្តីថ្លៃថ្នូររបស់ជាតិខ្មែរទាំងមូល។ ឯកឧត្ដមអ្នកនាំពាក្យបានបន្ថែមថា៖ «ដូច្នេះហើយសូមបងប្អូនយើងបន្តថែរក្សានូវកម្លាំងមហាសាមគ្គីជាតិនេះឱ្យស្ថិតស្ថេរជារៀងរហូត»៕

ដោយ៖ ចាន់ សុភឿន