AKP ភ្នំពេញ ថ្ងៃទី០២ ខែសីហា ឆ្នាំ២០២៥--
លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិកម្ពុជាបានគូសបញ្ជាក់ថា កម្ពុជាបានស្នើឱ្យអគ្គមេបញ្ជាការកងទ័ពម៉ាឡេស៊ី ឱ្យជួយអន្តរាគមន៍ដើម្បីជំរុញឱ្យភាគីថៃ ឆាប់ប្រគល់កងកម្លាំងកម្ពុជាទាំង១៨រូប បញ្ជូនមកឱ្យកម្ពុជាវិញ។ ការគូសបញ្ជាក់របស់លោកជំទាវឧត្ដមសេនីយ៍ឯកបែបនេះ ក្នុងសន្និសីទសារព័ត៌មានស្ដីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាព្រឹកថ្ងៃទី០២ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។
លោកជំទាវឧត្ដមសេនីយ៍ឯក ម៉ាលី សុជាតា បានលើកឡើងថា កម្ពុជាក៏បានស្នើសុំយ៉ាងទទួចឱ្យភាគីថៃ ឆាប់ប្រគល់កងកម្លាំងកម្ពុជាទាំង១៨នាក់ ត្រឡប់មកកម្ពុជាវិញឱ្យបានឆាប់រហ័សផងដែរ ហើយក្រសួងការពារជាតិក៏មិនទុកសមាជិករបស់យើងចោលនោះទេ ទោះបីស្ថិតក្នុងកាលៈទេសៈណាក៏ដោយ។ លោកជំទាវឧត្ដមសេនីយ៍ឯកបានគូសបញ្ជាក់យ៉ាងដូច្នេះថា៖ «នាងខ្ញុំបញ្ជាក់សាជាថ្មីថាចំពោះកងកម្លាំងកម្ពុជាយើងចំនួន១៨រូបដែលស្ថិតក្រោមការគ្រប់គ្រងរបស់យោធាថៃ ចាប់តាំងពីម៉ោង៧ និង៥០នាទី កាលពីថ្ងៃទី២៩ ខែកក្កដា ឆ្នាំ២០២៥ យោធាថៃ បានបញ្ជាក់ថាពួកគេមានសុត្ថិភាព ហើយរាជរដ្ឋាភិបាលកម្ពុជាបានកំពុងធ្វើការយ៉ាងសស្រាក់សម្រាំដើម្បីធ្វើយ៉ាងណាឱ្យថៃបញ្ជូនកងកម្លាំងទាំង១៨រូប មកវិញឱ្យបានឆាប់រហ័ស»។ 

លោកជំទាវឧត្ដមសេនីយ៍ឯក អ្នកនាំពាក្យក្រសួងការពារជាតិក៏បានអះអាងថា ចាប់ពីតាំងពីចូលជាធរមាននូវបទឈប់បាញ់រវាងកម្ពុជា និងថៃ  ពោលគឺមកដល់ពេលនេះគឺមានរយៈពេល៥ថ្ងៃហើយ ដែលរាជរដ្ឋាភិបាលកម្ពុជាមិនមានការប្រែប្រួលនោះទេក្នុងការអនុវត្តនូវបទឈប់បាញ់ដើម្បីធ្វើយ៉ាងណាឱ្យស្ថានភាពស្ថានភាពកាន់តែប្រសើររហូតដោះស្រាយដោយសន្តិវិធី។ 

ក្នុងឱកាសនោះ លោកជំទាវឧត្ដមសេនីយ៍ឯក អ្នកនាំពាក្យក្រសួងការពារជាតិក៏បានបញ្ជាក់បន្ថែមផងដែរថា កាលពីថ្ងៃទី៣១ ខែកក្កដា ឆ្នាំ២០២៥ កន្លងមកនេះក៏មានក្រុមអ្នកសង្កេតការណ៍អាស៊ានអន្តរកាលមកពី៣ប្រទេស ដែលក្នុងនោះ រួមមាន អនុព័ន្ធ ម៉ាឡេស៊ី ជាប្រធានអាស៊ានជាអ្នកដឹកនាំ និងជំនួយការអនុព័ន្ធយោ ធាវៀតណាម និងជំនួយការ អនុព័ន្ធយោធាហ្វីលីពីបានចុះទៅទស្សនកិច្ចនៅតំបន់ដែលកើតហេតុដែលជាទីតាំងយន្តហោះថៃទម្លាក់គ្រាប់បែកនៅខេត្តឧត្តរមានជ័យ និងបានបន្តចុះទៅមើលជនភៀសឹកនៅខេត្តព្រះវិហារ។  ទន្ទឹមនេះ អនុព័ន្ធយោធាទាំងនេះ ក៏បានចុះទៅពិនិត្យមើលនៅតំបន់ភ្នំខ្មោច ដែលជាតំបន់ក្តៅដោយតំបន់នេះត្រូវរងផលប៉ះពាល់យ៉ាងខ្លាំងពីការទម្លាក់គ្រាប់បែករបស់យន្តហោះយោធាថៃ៕

ដោយ៖ ប៊ុនរិទ្ធ