AKP សៀមរាប ថ្ងៃទី០២ ខែ សីហា ឆ្នាំ២០២៥--
ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា រួមជាមួយបណ្តាអង្គទូតបរទេស និងអង្គការអន្ដរជាតិប្រចាំនៅព្រះរាជាណាចក្រកម្ពុជាបានអញ្ជើញចុះទៅពិនិត្យមើលការស្ថានភាពជនភៀសសឹកជាង ១ ០០០ គ្រួសារ ដែលកំពុងស្នាក់នៅបណ្តោះអាសន្ននៅវត្តប្រាសាទបន្ទាយស្រី ភូមិបន្ទាយស្រី ឃុំដំដែក ស្រុកសូត្រនិគម ខេត្តសៀមរាប នាព្រឹកថ្ងៃទី០២ ខែសីហា ឆ្នាំ២០២៥។
ថ្លែងនៅក្នុងឱកាសចុះសួរសុខទុក្ខប្រជាពលរដ្ឋជាជនភៀសសឹក នាព្រឹកថ្ងៃទី ០២ ខែ សីហា ឆ្នាំ ២០២៥ ឯកឧត្ដមឧបនាយករដ្ឋមន្រ្ដី ប្រាក់ សុខុន បានបញ្ជាក់ថា រាជរដ្ឋាភិបាលកម្ពុជានឹងធ្វើយ៉ាងណាឱ្យប្រជាពលរដ្ឋបានវិលត្រឡប់ទៅលំនៅឋានវិញឱ្យបានឆាប់ ដើម្បីឱ្យសិស្សានុសិស្សបានចូលរៀន និងបងប្អូនបានត្រឡប់ទៅប្រកបមុខរបររកស៊ីជាធម្មតាវិញ។

យោងតាមរបាយការណ៍របស់ លោក តាន់ សុភក្តិ អភិបាលរង ស្រុកសូទ្រនិគម ខេត្តសៀមរាបបានឱ្យដឹងថាសម្រាប់ជនភៀសសឹកដែលបានចាកចេញពីលំនៅឋានចាប់ពីថ្ងៃទី២៤ ខែ កក្កដា ឆ្នាំ ២០២៥ រហូតមកដល់ថ្ងៃទី០២ ខែសីហា ឆ្នាំ ២០២៥ នេះ មានសរុបចំនួន ១ ០១១ គ្រួសារ មានចំនួនមនុស្សសរុប ៣ ៧៩៣ នាក់ ហើយសម្រាប់ជនភៀសសឹកទាំងនេះ មានមកពីខេត្តឧត្តរមានជ័យ បន្ទាយមានជ័យ និងខេត្ដព្រះវិហារ៕

ដោយ៖ មករា រូបថត៖ លន ហ្សាឌីណា