AKP កំពង់ធំថ្ងៃទី០២ខែសីហាឆ្នាំ២០២៥-- 

ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំកាលពីរសៀលថ្ងៃទី០១ខែសីហាឆ្នាំ២០២៥បានដឹកនាំសហការីនាំយកអំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែតនិងលោកជំទាវបណ្ឌិត ពេជ ចន្ទមុន្នី ទៅឧបត្ថម្ភជូនគ្រួសារកងទ័ពចំនួន៣គ្រួសារនៅអង្គភាពកងពលតូចលេខ៩ កងពលធំលេខ៣ដែលប្រចាំការ ការពារបូរណភាពទឹកដីនៅតំបន់មុំបីព្រមទាំងប្រជាពលរដ្ឋចំនួន២គ្រួសារផ្សេងទៀតដែលបានភៀសសឹកមកពីស្រុកជាំក្សាន្ត ខេត្តព្រះវិហារមកស្នាក់នៅបណ្ដោះអាសន្នភូមិកំណើត ភូមិក្រចាប់សង្កាត់អាចារ្យលាក់ក្រុងស្ទឹងសែនខេត្តកំពង់ធំ។

ក្រុមគ្រួសារកងទ័ព ដែលបានរស់នៅជាមួយស្វាមីក្នុងទីតាំងឈរជើងរបស់អង្គភាពនាពេលកន្លងទៅបានភៀសខ្លួន មកកាន់ស្រុកកំណើតបណ្ដោះអាសន្នបានបញ្ជាក់ថា នៅថ្ងៃទី២៤ខែកក្កដា ឆ្នាំ២០២៥ កងទ័ពឈ្លានពានរបស់ប្រទេសថៃបានបាញ់សន្ធាប់ដោយអាវុធធុនធ្ងន់មកលើចំណុចឈរជើង របស់កងទ័ពនិងទឹកដីរបស់កម្ពុជា ដោយទ្រាំមិនបាននិងការបាញ់ផ្លោង និងការប្រើប្រាស់កម្លាំងថ្មើរជើង វាយលុកឈ្លានពានជាបន្តបន្ទាប់រៀងរាល់ថ្ងៃ ទើបស្វាមីគាត់បានសម្រេចបញ្ជូនភរិយានិងកូនចៅទាំងអស់មកកាន់ស្រុកកំណើតវិញជាបណ្ដោះអាសន្ន ដើម្បីធានាសុវត្ថិភាព។ហើយស្វាមីរបស់គាត់នៅបន្តកាន់អាវុធវាយទប់ទល់ជាមួយការឈ្លានពានពីពួកចោរសៀម ។

ឧត្តមសេនីយ៍ទោ សោម ស៊ុន បានថ្លែងនូវការកោតសរសើរ និងការដឹងគុណ ចំពោះវីរភាពយុទ្ធជនដ៏អង់អាចក្លាហានរបស់យើង ដែលបានតស៊ូស្វិតស្វាញក្រាញននាល ដើម្បីការពារជាតិ ការពារបូរណភាពទឹកដី និងការពារប្រជាជនយើង អំពីការរំលោភឈ្លានពានដ៏ឃោឃៅព្រៃផ្សៃរបស់ពួកទាហានសៀម មកលើទឹកដីកម្ពុជា។

ជាមួយនោះដែរឧត្តមសេនីយ៍ទោ សោម ស៊ុន ក៏បានគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចតេជោ ហ៊ុន សែននិងសម្ដេចមហាបវរធិបតី ហ៊ុន ម៉ាណែត ដែលបានខិតខំស្វែងរកសន្តិភាព បញ្ឈប់ការបាញ់គ្នាជាបន្ទាន់ តាមរយៈការជួយអន្តរាគមន៍ពីប្រធានាធិបតីអាមេរិកនិងនាយករដ្ឋមន្ត្រីនៃប្រទេសម៉ាឡេស៊ី ដែលជាសហប្រធានប្ដូរវេនរបស់អាស៊ាន ព្រមទាំងថ្លៃងអំណរគុណចំពោះសេនានុព័ន្ធយោធាបណ្ដាប្រទេសនានា ដែលបានអញ្ជើញទាន់ពេលវេលាមកត្រួតពិនិត្យការឈប់បាញ់នៅតាមព្រំដែនកម្ពុជា-ថៃ។

ឧត្តមសេនីយ៍ទោ សោម ស៊ុន ក៏បានប្រគល់ជូនស្បៀងអាហារគ្រឿងឧបភោគបរិភោគភេសជ្ជៈ ថ្នាំពេទ្យ និងភួយដណ្ដប់ដែលជាអំណោយរបស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនដល់ក្រុមគ្រួសារវីរៈយុទ្ធជននិងប្រជាពលរដ្ឋភៀសសឹកទាំង៥គ្រួសារ។
លោក សេង វុធ ប្រធានភូមិក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ តំណាងឱ្យគ្រួសារវីរយុទ្ធជននិងប្រជាពលរដ្ឋភៀសសឹកបានសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចតេជោ ហ៊ុន សែន  សម្ដេចមហាបវរធិបតី ហ៊ុន ម៉ាណែត ដែលបានដឹកនាំបញ្ជាកម្លាំងការពារទប់ទល់ការឈ្លានពានពីទាហានសៀម នឹងបានសម្របសម្រួលជាមួយប្រធានាធិបតីសហរដ្ឋអាមេរិកនិងម៉ាឡេស៊ីដើម្បីបញ្ឈប់ការឈ្លានពានមកលើទឹកដីកម្ពុជា៕

ដោយ៖ ស៊ុម វណ្ណា