AKP ភ្នំពេញ ថ្ងៃទី ៣០ ខែកក្កដា ឆ្នាំ២០២៥ -- ឯកឧត្តម សំ សិទ្ធិសេរី អគ្គនាយកនៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាននៃក្រសួងប្រៃសណីយ៍ និងទូរគមនាគមន៍ បានអញ្ជើញដឹកនាំគណៈប្រតិភូចូលរួមក្នុងសន្និសីទពិភពលោកស្តីពីបញ្ញាសិប្បនិម្មិត (WAIC) ឆ្នាំ២០២៥ ដោយមានការអញ្ជើញចូលរួមពីឯកឧត្តម Li Qiang នាយករដ្ឋមន្រ្តីនៃសាធារណរដ្ឋប្រជាមានិតចិន ព្រមទាំងថ្នាក់ដឹកនាំ និងអ្នកជំនាញបច្ចេកវិទ្យា អ្នកវិទ្យាសាស្រ្ត អ្នកធ្វើគោលនយោបាយ មកពីប្រមាណ ៤៤ប្រទេសនៅជុំវិញពិភពលោក។

ឯកឧត្តម សំ សិទ្ធិសេរី បានឱ្យដឹងនៅថ្ងៃទី៣០ ខែកក្កដា ឆ្នាំ២០២៥ថា កាលពេលថ្មីៗនេះ ឯកឧត្តមបានចូលរួមសន្និសីទពិភពលោកស្តីពីបញ្ញាសិប្បនិម្មិត គឺជាព្រឹត្តិការណ៍លំដាប់អន្តរជាតិកំពូលមួយដែលប្រមូលផ្តុំដោយថ្នាក់ដឹកនាំមកពីជុំវិញពិភពលោក អ្នកវិទ្យាសាស្ត្រ និងអ្នកធ្វើគោលនយោបាយ ដើម្បីដាក់បង្ហាញអំពីបច្ចេកវិទ្យាបញ្ញាសិប្បនិម្មិតឈានមុខគេ ជំរុញកិច្ចសហប្រតិបត្តិការអន្តរជាតិ និងពិភាក្សាអំពីអភិបាលកិច្ច និងឥទ្ធិពលសង្គមនៃបញ្ញាសិប្បនិម្មិត ។

ក្នុងឱកាសនៃការចូលរួមកម្មវិធី (WAIC) ឯកឧត្តម និងគណៈប្រតិភូបានទស្សនកិច្ចពិព័រណ៍របស់សន្និសីទ ដើម្បីស្វែងយល់ពីនវានុវត្តន៍ចុងក្រោយបង្អស់ក្នុងវិស័យ Generative AI, Large Language Models, ដ្រូន និងមនុស្សយន្តផងដែរ។ ឯកឧត្តមអគ្គនាយកក៏បានចូលរួមថ្លែងសុន្ទរកថាគន្លឹះ ក្នុងវេទិកាពិភាក្សាគោលនយោបាយ និងកិច្ចសហប្រតិបត្តិការអភិវឌ្ឍបញ្ញាសិប្បនិម្មិតសកល ដោយឯកឧត្តមបានគូសបញ្ជាក់ពីគោលនយោបាយស្នូលពីរដែលជាមគ្គុទេសន៍ក្នុងការជំរុញបរិវត្តកម្មឌីជីថល និងការអភិវឌ្ឍបច្ចេកវិទ្យាឌីជីថលថ្មីៗជាពិសេសបញ្ញាសិប្បនិម្មិតនៅកម្ពុជាគឺ «ក្របខ័ណ្ឌគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥» និង «គោលនយោបាយរដ្ឋាភិបាលឌីជីថលកម្ពុជា ២០២២-២០៣៥»។

ឯកឧត្តមបានបន្ថែមថា ក.ប.ទ. ត្រូវបានរាជរដ្ឋាភិបាលប្រគល់ភារកិច្ចឱ្យដឹកនាំការរៀបចំគោលនយោបាយ និងអភិបាលកិច្ចបញ្ញាសិប្បនិម្មិតជាតិ។ សមិទ្ធផលថ្មីៗដែលក.ប.ទ. សម្រេចបានថ្មីៗនេះរួមមាន ការដាក់ឱ្យដំណើរការដោយជោគជ័យនូវវិធីសាស្ត្រវាយតម្លៃភាពរួចរាល់បញ្ញាសិប្បនិម្មិតរបស់អង្គការយូណេស្កូ (RAM) និងសិក្ខាសាលាពិគ្រោះយោបល់លើសេចក្តីព្រាងយុទ្ធសាស្រ្តជាតិស្តីពីបញ្ញាសិប្បនិម្មិត ដែលមានអ្នកចូលរួមប្រមាណ ៤០០នាក់ តំណាងអោយគ្រប់ភាគីពាក់ព័ន្ធទាំងរដ្ឋាភិបាល វិស័យឯកជន ដៃគូអភិវឌ្ឍនិងគ្រឹះស្ថានអប់រំ។ល។ ក.ប.ទ. ដែលមានបណ្ឌិត្យសភាបច្ចេកវិទ្យាឌីជីថលកម្ពុជាជាសេនាធិការ បាននឹងកំពុងធ្វើការសិក្សាសមិទ្ធិលទ្ធភាពបង្កើតមន្ទីរពិសោធន៍ជាតិបញ្ញាសិប្បនិម្មិត និង វិទ្យាសាស្ត្រទិន្នន័យ។ ក.ប.ទ. ក៏កំពុងរៀបចំបង្កើតឱ្យមានសួនឌីជីថលជាតិថ្មីមួយដែលប្រមូលផ្តុំក្រុមហ៊ុនបច្ចេកវិទ្យាធំៗ ធុរកិច្ចថ្មីឌីជីថល និងកម្មវិធីជំរុញកិច្ចសហប្រតិបត្តិការឱ្យកាន់តែទូលំទូលាយក្នុងការអភិវឌ្ឍបច្ចេកវិទ្យាឌីជីថលនៅកម្ពុជា។

ឯកឧត្តមបានអំពាវនាវឱ្យមានភាពជាដៃគូសកលក្នុងស្មារតីបើកចំហ និងកិច្ចសហប្រតិបត្តិការប្រកបដោយ ការប្តេជ្ញាចិត្តដើម្បីធ្វើយ៉ាងណាអោយបច្ចេកវិទ្យាបញ្ញាសិប្បនិម្មិតបម្រើដល់មនុស្សជាតិទាំងអស់ ជួយដល់ការអភិវឌ្ឍសេដ្ឋកិច្ច និងសង្គមឱ្យកាន់តែខ្លាំង និងកាត់បន្ថយហានិភ័យជាអប្បបរមាពីការប្រើប្រាស់បញ្ញាសប្បនិម្មិតមិនត្រឹមត្រូវ៕

ដោយ ណយ នឿន (ប្រភព៖ ក្រសួងប្រៃសណីយ៍)