AKP ភ្នំពេញ ថ្ងៃទី៣០ ខែកក្កដា ឆ្នាំ២០២៥-- លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាលមានប្រសាសន៍ថា សុខភាពផ្លូវចិត្តគឺជាផ្នែកមួយយ៉ាងសំខាន់សម្រាប់បុគ្គលម្នាក់ៗ ហើយក៏ជាកត្តាកំណត់នៃសុភមង្គលរបស់គ្រួសារ និងការអភិវឌ្ឍសង្គម-សេដ្ឋកិច្ចរបស់ប្រទេសជាតិដែលមិនអាចខ្វះបាន ហើយថាបច្ចុប្បន្នកម្ពុជាក៏ដូចជាបណ្តាប្រទេសនានានៅជុំវិញពិភពលោក បាន និងកំពុងរងនូវឥទ្ធិពលពីការផ្លាស់ប្តូរសង្គមយ៉ាងឆាប់រហ័ស ខណៈការប្រើប្រាស់សារធាតុញៀន របួសផ្លូវចិត្ត ការចំណាកស្រុក ការលំបាកផ្នែកសេដ្ឋកិច្ច និង បញ្ហាប្រឈមផ្នែកអាកាសធាតុគឺជាកត្តាប្រឈមនៃការកើនឡើងនូវបន្ទុកនៃជំងឺផ្លូវចិត្ត។ ការលើកឡើងរបស់លោកជំទាវវេជ្ជបណ្ឌិត យក់ សម្បត្តិ យ៉ាងដូច្នេះ ក្នុងសិក្ខាសាលាពិគ្រោះយោបល់ស្តីពីការអភិវឌ្ឍផែនការសកម្មភាពសម្រាប់គម្រោងផ្តួចផ្តើមជាពិសេសសម្រាប់សុខភាពផ្លូវចិត្តនៅកម្ពុជា រៀបចំឡើងដោយក្រសួងសុខាភិបាលរយៈពេល០៣ថ្ងៃ នៅសណ្ឋាគាររ៉េស៊ីដង់សុខាភ្នំពេញ នាព្រឹកថ្ងៃទី៣០ ខែកក្កដា  ឆ្នាំ២០២៥។

លោកជំទាវរដ្ឋលេខាធិការបានបន្តថា នៅប្រទេសកម្ពុជាស្លាកស្នាមរបួសដែលបានបន្សល់ពីអតីតកាលគឺមិនទាន់បានសាបរលត់នៅឡើយទេ ដែលទាមទារឱ្យមានការយកចិត្តទុកដាក់ ជាពិសេសពីបណ្តាស្ថាប័នពាក់ព័ន្ធពីសហគមន៍ពីប្រជាពលរដ្ឋខ្លួនឯង ពីដៃគូ ពីសហភាតរទាំងអស់ និងពីអាជ្ញាធរមូលដ្ឋានផងដែរ។

លោកជំទាវបានបន្ថែមថា នៅកម្ពុជាសង្គ្រាមកាលពីអតីតកាល ដែលនាំឱ្យមានការបែកបាក់ក្រុមគ្រួសារក៏បានធ្វើឱ្យប្រជាជនកម្ពុជាមួយចំនួនទទួលរងនូវជំងឺផ្លូវចិត្តរហូតមកទល់បច្ចុប្បន្ន ហើយចំពោះឥទ្ធិពលនៃគ្រឿងញៀនដែលកំពុងកើតមានសព្វថ្ងៃក៏ជាមូលហេតុនាំឱ្យមានវិបត្តិផ្លូវចិត្តរបស់បុគ្គលដែលជាអ្នកប្រើប្រាស់ រួមទាំងអ្នកដែលទទួលរងគ្រោះពីឥទ្ធិពលនៃគ្រឿងញៀននេះផងដែរ និងនៅមានកត្តាជាច្រើនទៀតដែលយើងសឹងតែមិនអាចរៀបរាប់អស់ ដែលសុទ្ធសឹងតែជាចំណែកនាំឱ្យមានបញ្ហាខាងផ្នែកសុខភាពផ្លូវចិត្ត។

តាមរយៈសិក្ខាសាលាពិគ្រោះយោបល់ស្តីពីការអភិវឌ្ឍផែនការសកម្មភាពសម្រាប់គម្រោងផ្តួចផ្តើមជាពិសេសសម្រាប់សុខភាពផ្លូវចិត្តនៅកម្ពុជារយៈពេល០៣ថ្ងៃនេះ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល រំពឹងថា អង្គសិក្ខាសាលានឹងទទួលបានធាតុចូលសំខាន់ៗ ដើម្បីយកទៅ ចងក្រងជាយុទ្ធសាស្ត្រ និងធ្វើជាឯកសារគោលដើម្បីជាកត្តាកំណត់នូវលក្ខខណ្ឌផ្សេងៗដែលជាកត្តាតម្រូវរបស់អង្គការសុខភាពពិភពលោក ដោយសិក្ខាសាលានៅថ្ងៃនេះក៏ជាលក្ខខណ្ឌតម្រូវផងដែរ ព្រោះថាមុនក្លាយជាប្រទេសមួយដែលមុននឹងអាចចូលទៅក្នុងក្រុមប្រទេសដែលអង្គការសុខភាពពិភពលោកចាត់ទុកថាជាប្រទេសពិសេសផ្នែកសុខភាពផ្លូវចិត្តនោះគឺយើងត្រូវតែកំណត់លក្ខខណ្ឌឱ្យបានច្បាស់លាស់ជាមុនសិន ដោយលោកជំទាវសង្ឃឹមថា ក្រោយពីសិក្ខាសាលានេះទៅយើងនឹងទទួលបានលទ្ធផលល្អ ខណៈដែលកម្ពុជាកំពុងមានមោទនភាពដោយបានក្លាយជាប្រទេសទី១០ នៅក្នុងពិភពលោកបន្ទាប់ពីហ្វីលីពីន ដែលត្រូវបានអង្គការសុខភាពពិភពលោកសម្រេចជ្រើសរើសសម្រាប់ការអនុវត្តគម្រោងជាពិសេសសម្រាប់សុខភាពផ្លូវចិត្ត៕

ដោយ៖ ចាន់ សុភឿន រូបថត៖ សួស សាវី