AKP តាកែវ ថ្ងៃទី៣០ ខែកក្កដា ឆ្នាំ២០២៥-- នៅសាលប្រជុំវិទ្យាស្ថានពហុបច្ចេកទេសភូមិភាគតេជោសែនតាកែវ បានរៀបចំពិធីអបអរសាទរទិវាអន្តរជាតិប្រយុទ្ធប្រឆាំងគ្រឿងញៀន ថ្ងៃទី២៦ ខែមិថុនា ឆ្នាំ២០២៥ ក្រោមប្រធានបទ "រួមគ្នាបង្ការ ទប់ស្កាត់ និងកាត់ផ្ដាច់ឫសគល់នៃបញ្ហាគ្រឿងញៀននៅកម្ពុជា" កាលពីថ្ងៃអង្គារ ទី២៩ ខែកក្កដា ឆ្នាំ២០២៥ ក្រោមអធិបតីភាពឯកឧត្តម ទួន ស៊ីផាន់ រដ្ឋលេខាធិការក្រសួងប្រៃសណីយ៍ និងទូរគមនាគមន៍ ឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការរងនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ឯកឧត្តម យស ណាស៊ី ប្រធានក្រុមប្រឹក្សាខេត្តតាកែវ លោក យង់ សុវឌ្ឍនា អភិបាលរងនៃគណៈអភិបាលខេត្តតាកែវ និងជាប្រធានលេខាធិការដ្ឋានគណៈកម្មាធិការត្រួតពិនិត្យគ្រឿងញៀនខេត្តតាកែវ ដោយមានការអញ្ជើញចូលរូមពីប្រធានអនុប្រធានមន្ទីរអង្គភាពជុំវិញខេត្ត អភិបាលអភិបាលរងក្រុង-ស្រុក មន្ត្រីរាជការ កងកម្លាំងប្រដាប់អាវុធ សហភាពសហព័ន្ធយុវជនកម្ពុជាខេត្តតាកែវ យុវជនកាកបាទក្រហម យុវជនកាយរិទ្ធ លោកគ្រូអ្នកគ្រូ សិស្សានុសិស្ស និងបងប្អូនប្រជាពលរដ្ឋចូលរួមសរុបប្រមាណ៦៧២នាក់។

មានប្រសាសន៍សំណេះសំណាលក្នុងពិធីនោះ ឯកឧត្តម ទួន ស៊ីផាន់ បានមានប្រសាសន៍ថា បញ្ហាគ្រឿងញៀនជាបញ្ហាសង្គមមួយដ៏រ៉ាំរ៉ៃ និងស្មុគស្មាញ ដែលបង្កផលវិបាកជាច្រើនដល់សង្គមជាតិរួមនឹងមនុស្សទូទៅ ហើយការដោះស្រាយបញ្ហាគ្រឿងញៀននេះទាមទារឱ្យមានការចូលរួមចាប់ពីបុគ្គលម្នាក់ៗ ក្រុមគ្រួសារ សហគមន៍ អាជ្ញាធរមូលដ្ឋាន អង្គការជាតិអន្តរជាតិ ដើម្បីធ្វើយ៉ាងណាឈានទៅលុបបំបាត់ ការប្រើប្រាស់គ្រឿងញៀននៅតាមមូលដ្ឋាន។

ឯកឧត្តម ទួន ស៊ីផាន់ បានមានប្រសាសន៍បន្តថា បច្ចុប្បន្ននេះគ្រឿងញៀនបានកំពុងវាយលុកយ៉ាងខ្លាំងក្នុងស្រទាប់យុវជន ផលប៉ះពាល់នៃគ្រឿងញៀនបំផ្លាញទាំងរូបរាងកាយ សុខភាព បញ្ញាស្មារតី និងអាចឈានដល់ការស្លាប់បាត់បង់ជីវិតទៀតផង។ ដូច្នេះក្នុងនាមប្អូនៗជាសិស្សានុសិស្ស និងជាទំពាំងស្នងឫស្សីជំនាន់ក្រោយ ត្រូវឆ្លើយថាទេចំពោះគ្រឿងញៀន កុំចង់សាកចង់ដឹងឱ្យសោះ។ពោលគឺត្រូវរួមគ្នាទប់ស្កាត់ការជួញដូរ ការចែកចាយ និងការប្រើប្រាស់គ្រឿងញៀនគ្រប់ប្រភេទ។ដើម្បីធានាបាននូវគោលនយោបាយភូមិឃុំសង្កាត់មានសុវត្ថិភាព ដែលរាជរដ្ឋាភិបាលបានដាក់ចេញ គ្មានគ្រឿងញៀន គ្មានអំពើឆក់ប្លន់ គ្មានអំពើហិង្សា គ្មានក្រុមក្មេងទំនើង ព្រោះបទល្មើសផ្សេងៗកើតឡើងពីយុវជនដែលប្រើប្រាស់គ្រឿងញៀន។

បើតាមរបាយការណ៍របស់លោក យង់ សុវឌ្ឍនា អភិបាលរងនៃគណៈអភិបាលខេត្តតាកែវ និងជាប្រធានលេខាធិការដ្ឋានគណៈកម្មាធិការត្រួតពិនិត្យគ្រឿងញៀនខេត្តតាកែវ បានឱ្យដឹងថា នៅក្នុងឆមាសទី១ ឆ្នាំ២០២៥ គណៈកម្មាធិការត្រួតពិនិត្យគ្រឿងញៀនខេត្តតាកែវបានអនុវត្តវិធានការច្បាប់ ដោយសហការជាមួយសមត្ថកិច្ចពាក់ព័ន្ធ ចុះបង្ក្រាបបទល្មើសគ្រឿងញៀនក្នុងភូមិសាស្ត្រខេត្តតាកែវ បានចំនួន១១៥ករណី ឃាត់ខ្លួនជនសង្ស័យបានចំនួន២៨៤នាក់ ស្រីចំនួន១៥នាក់ និងអនុវត្តតាមដីកាបានចំនួន១៥ដីកា ឃាត់ខ្លួនជនសង្ស័យបានចំនួន១៤នាក់ ព្រមទាំងវត្ថុតាងមួយចំនួនទៀតផងដែរ៕

ដោយ អ៊ុច សៀង