AKP កែប ថ្ងៃទី២៥ ខែកក្កដា ឆ្នាំ២០២៥

ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមការងារចំពោះកិច្ចសម្របសម្រួលទំនាក់ទំនងពាណិជ្ជកម្ម និងវិនិយោគទ្វេភាគីកម្ពុជា-សហរដ្ឋអាមេរិក បានគូសបញ្ជាក់ថា ក្រុមការងារចំពោះកិច្ចបានបញ្ជូនឯកសារពាក់ព័ន្ធនឹងកិច្ចចរចាទាំងអស់ទៅកាន់ភាគីសហរដ្ឋអាមេរិក កាលពីវេលាម៉ោង១១ និង៣០នាទី យប់ថ្ងៃទី១៦ ខែកក្កដា ឆ្នាំ២០២៥ រួចរាល់ហើយ ហើយបើតាមអ្វីដែលយើងទទួលបានព័ត៌មានមកវិញនោះគឺថា ឯកសារទាំងអស់ដែលយើងបានប្រគល់ជូននោះ គឺខាងតំណាងពាណិជ្ជកម្មសហរដ្ឋអាមេរិកគេបានពិភាក្សាផ្ទៃក្នុងរបស់គេហើយ មុននឹងធ្វើរបាយការណ៍ជូនឯកឧត្ដមប្រធានាធិបតី ដូណាល់ ត្រាំ។

ឯកឧត្ដមឧបនាយករដ្ឋមន្រ្ដីសង្ឃឹមថា មិនយូរទេ គឺអាចនៅដើមខែក្រោយនេះ យើងនឹងទទួលបានព័ត៌មានពីសហរដ្ឋអាមេរិកអំពីអត្រាពន្ធគយបដិការសម្រាប់កម្ពុជា ខណៈដែលប្រទេសជិខាងរបស់យើងគឺហ្វីលីពីនបានចុះពី២០ភាគរយ មកនៅត្រឹម ១៩ភាគរយ ឥណ្ឌូណេស៊ី ចុះពី ៣២ ភាគរយ មកនៅត្រឹម ១៩ភាគរយ ប្រទេសជប៉ុន ចុះពី ២៥ភាគរយ មកនៅត្រឹម ១៥ភាគរយ ហើយនេះបើតាមព័ត៌មានដែលយើងទទួលបាន។

ថ្លែងប្រាប់ក្រុមអ្នកសារព័ត៌មានក្នុងឱកាសអញ្ជើញចុះផ្ទៀងផ្ទាត់ និងបញ្ចប់ការបោះបង្គោលព្រំដីនិយាមកាសម្រាប់គម្រោងព្រែកជីកហ្វូណនតេជោ នៅខេត្តកែប នាព្រឹកថ្ងៃទី២៥ ខែកក្កដា ឆ្នាំ២០២៥ ឯកឧត្តម ឧបនាយករដ្ឋមន្ត្រី ស៊ុន ចាន់ថុល បានមានប្រសាសន៍ថា កាលពីពេលចរចាកន្លងទៅខាងភាគីកម្ពុជាបានសំណូមពរឱ្យសហរដ្ឋអាមេរិកធ្វើយ៉ាងណាឱ្យអត្រាពន្ធគយបដិការរបស់កម្ពុជាមានភាពអាចប្រកួតប្រជែងជាមួយបណ្តាប្រទេសនៅក្នុងតំបន់ដែលជាដៃគូប្រកួតប្រជែងរបស់យើងបាន។ ឯកឧត្ដមឧបនាយករដ្ឋមន្រ្ដីបានលើកឡើងថា តែក្នុងករណីដែលអត្រាពន្ធគយបដិការរបស់យើងខ្ពស់នោះ គឺយើងពិតជាមានការលំបាកនៅក្នុងការប្រកួតប្រជែង ដែលការលើកឡើងរបស់កម្ពុជាយ៉ាងដូច្នេះបានធ្វើឱ្យខាងភាគីអាម៉េរិកបានយល់អំពីសំណូមពររបស់យើង។ ក៏ប៉ុន្តែការសម្រេចចិត្តរបស់សហរដ្ឋអាមេរិកយ៉ាងណានោះនៅសប្តាហ៍ក្រោយយើងនឹងបានដឹង ប៉ុន្តែមិនមែន ៣៦ភាគរយនោះទេ គឺយើងបានធ្វើការចរចាក្រោមការចង្អុលបង្ហាញពីសម្តេចធិបតី នាយករដ្ឋមន្ត្រីជាមួយសហរដ្ឋអាមេរិកដោយស្មោះត្រង់ និងដោយបើកចំហ និយាយត្រង់ទៅ ត្រង់មក។ 

ឯកឧត្ដមឧបនាយករដ្ឋមន្ត្រី ស៊ុន ចាន់ថុល បានបន្ថែមថា ដោយខាងកម្ពុជាបានខិតខំពន្យល់ភាគីមិត្តពីតម្រូវការអត្រាពន្ធគយបដិការនេះក្នុងចំនួនទាប យ៉ាងហោចណាស់ក៏បានស្មើនឹងប្រទេសជិតខាង ដែលនាំឱ្យយើងអាចធ្វើការប្រកួតប្រជែងជាមួយគេបាន ខណៈដែលកម្ពុជាបានខិតខំប្រឹងប្រែងខ្លាំងណាស់ ក្នុងការចរចាអំពីអត្រាពន្ធគយបដិការនេះជាមួយសហរដ្ឋអាម៉េរិកដើម្បីកុំឱ្យមានការស្តាយក្រោយ៕

ដោយ៖ ចាន់ សុភឿន