AKP កែប ថ្ងៃទី២៥ ខែកក្កដា ឆ្នាំ២០២៥

ការអនុវត្តការងារចុះពិនិត្យទីតាំង ប្រមូលទិន្នន័យ ផ្ទៀងផ្ទាត់និយាមកា និងបោះបង្គោលព្រំដីនៅតាមបណ្តោយគម្រោងព្រែកជីកហ្វូណនតេជោសរុបទាំងអស់មានចំនួន ១ ៩២០ បង្គោល ត្រូវបានសម្រេចរួចរាល់ទាំងស្រុងនៅត្រឹមថ្ងៃទី២៥ ខែកក្កដា ឆ្នាំ២០២៥នេះ ដោយបានអនុវត្តន៍ក្នុងខេត្តកណ្តាល តាកែវ កំពត និងខេត្តកែប ដែលខេត្តកែបគឺជាភូមិសាស្រ្តបញ្ចប់ចុងក្រោយគេ។ នេះគឺជាការលើកឡើងរបស់ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាអនុប្រធានប្រចាំការគណៈកម្មាធិការពិសេស ដើម្បីជំរុញការអនុវត្តគម្រោងព្រែកជីកហ្វូណនតេជោ ក្នុងឱកាសអញ្ជើញចុះផ្ទៀងផ្ទាត់ និងបញ្ចប់ការបោះបង្គោលព្រំដីនិយាម កាសម្រាប់គម្រោងព្រែកជីកហ្វូណនតេជោ ដោយមានការអញ្ជើញចូលរួមអមដំណើរ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានលេខាធិការដ្ឋានគណៈកម្មាធិការពិសេស ស្ថិតក្នុងភូមិសាស្រ្តឃុំអង្កោល ស្រុកដំណាក់ចង្អើរ ខេត្តកែប នាព្រឹកថ្ងៃទី២៥ ខែកក្កដា ឆ្នាំ២០២៥។

ឯកឧត្ដម ឧបនាយករដ្ឋមន្រ្ដី ស៊ុន ចាន់ថុល មានប្រសាសន៍ថា បន្ទាប់ពីប្រកាសបើកការដ្ឋានជាផ្លូវការ កាលពីថ្ងៃទី០៥ ខែសីហា ឆ្នាំ២០២៤ បច្ចុប្បន្ននេះ គម្រោងត្រូវបានអនុវត្តតាមផែនការសកម្មភាពជាដំណាក់កាលបន្តបន្ទាប់ស្របទៅតាមផែនការដែលបានគ្រោងទុក ហើយចំពោះការចល័តគ្រឿងចក្រចូល ដើម្បីចាប់ផ្ដើមសាងសង់ជាផ្លូវការគ្រោងនឹងអនុវត្តន៍ក្នុងរដូវទឹកស្រក អំឡុងចុងឆ្នាំ២០២៥នេះ បន្ទាប់ពីក្រុមការងារក្រសួងសេដ្ឋកិច្ច និងហិរញ្ញវត្ថុ បានបញ្ចប់ការដោះស្រាយផលប៉ះពាល់ និងទូទាត់សំណងរួចរាល់ជូនដល់បងប្អូនប្រជាពលរដ្ឋដែលរស់នៅតាមតម្រាយព្រែកជីកនេះ។ ឯកឧត្តម  ឧបនាយករដ្ឋមន្ត្រីលើកឡើងថា ការបោះបង្គោលព្រំដីនៅតាមបណ្តោយគម្រោងព្រែកជីកហ្វូណនតេជោបានចាប់ផ្តើមធ្វើឡើងតាំងពីថ្ងៃទី១៤ ខែមករា ឆ្នាំ២០២៥  ហើយថ្ងៃនេះគឺជាថ្ងៃចុងក្រោយនៃការងារបោះបង្គោលនេះ គឺបង្គោលទី ១ ៩២០ ដែលបង្គោលទាំង ១ ៩២០បង្គោលនេះ មាននៅក្នុងខេត្តកណ្តាលចំនួន ៣៨៧ បង្គោល ខេត្តតាកែវចំនួន ៥៥២ បង្គោល  ខេត្តកំពតចំនួន ៨០១ បង្គោល និងជាចុងក្រោយគឺខេត្តកែបចំនួន ១៨០ បង្គោល។ ឯកឧត្តម  ឧបនាយករដ្ឋមន្ត្រីបានបញ្ជាក់ថា ថ្ងៃនេះក្រុមការងារបោះបង្គោលបានបញ្ចប់ការងាររបស់ខ្លួនតាមការគ្រោងទុក ហើយបន្ទាប់ពីនេះទៅក្រុមការងារបោះបង្គោលនឹងជូនព័ត៌មានទៅកាន់ក្រសួងសេដ្ឋកិច្ច និងហិរញ្ញវត្ថុ ដើម្បីធ្វើការវាស់វែង និងដោះស្រាយផលប៉ះពាល់ជូនបងប្អូនប្រជាពលរដ្ឋទៅតាមការជាក់ស្តែង រួចហើយទើបក្រុមហ៊ុនទទួលការងារសាងសង់គម្រោងព្រែកជីកហ្វូណនតេជោនេះនឹងចូលមកបំពេញការងាររបស់ខ្លួនទៅតាមអ្វីដែលបានគ្រោងទុក ពោលគឺការងារនឹងត្រូវចាប់ផ្តើមនៅក្នុងរដូវប្រាំងឆ្នាំនេះគឺក្នុងខែវិច្ឆិកា ឬខែធ្នូ ដែលយើងទាំងអស់គ្នានឹងបានឃើញពីទ្រង់ទ្រាយធំនៃការកសាងគម្រោងដ៏មហិមាមួយនេះ គ្រោងនឹងបញ្ចប់នៅក្នុងឆ្នាំ២០២៨។ 

បើតាម ឯកឧត្តមឧបនាយករដ្ឋមន្រ្ដី ស៊ុន ចាន់ថុល ក្រោយពេលសាងសង់រួចក្រុមហ៊ុនដែលជាអ្នកទទួលបានសិទ្ធិក្នុងការសាងសង់នឹងត្រូវគ្រប់គ្រងព្រែកជីកហ្វូណនតេជោក្នុងរយៈពេល ៥០ឆ្នាំ មុននឹងប្រគល់មកឱ្យរាជរដ្ឋាភិបាលកម្ពុជាជាអ្នកគ្រប់គ្រងវិញ។ តែក្នុងរយៈពេលនៃការគ្រប់គ្រងរបស់ក្រុមហ៊ុននេះ រាជរដ្ឋាភិបាលក៏នឹងទទួលបាននូវកម្រៃសួយសារពីអាជីវកម្មលើព្រែកជីកហ្វូណនតេជោនេះផងដែរ ដែលនេះ គឺជាកិច្ចព្រមព្រៀងរវាងរាជរដ្ឋាភិបាលកម្ពុជាជាមួយក្រុមហ៊ុនដែលជាអ្នកទទួលបានសិទ្ធិក្នុងការសាងសង់ ដែលកិច្ចព្រមព្រៀងមួយនេះត្រូវបានចុះហត្ថលេខាកាលពីថ្ងៃទី១៧ ខែមេសា ឆ្នាំ២០២៥ នៅក្នុងដំណើរទស្សនកិច្ចជាផ្លូវការរបស់ឯកឧត្តម ស៊ី ជិនពីង ប្រធានាធិបតីចិននៅក្នុងប្រទេសកម្ពុជា។ ឯកឧត្ដមឧបនាយករដ្ឋមន្រ្ដីបានបន្ថែមថា ការចុះហត្ថលេខានេះក៏បានគ្របដណ្តប់ផងដែរនូវកិច្ចព្រមព្រៀងមួយចំនួន រួមមាន កិច្ចព្រមព្រៀងលើតម្លៃនៃការសាងសង់ និងកិច្ចព្រមព្រៀងលើការថែទាំ ហើយចំពោះគម្រោងព្រែកជីកហ្វូណនតេជោនេះគឺនៅតែដំណើរទៅមុខដដែល បើទោះបីជាយើងកំពុងតែមានជម្លោះនៅតាមព្រំដែនជាមួយប្រទេសថៃក៏ដោយ៕

ដោយ៖ ចាន់ សុភឿន