AKP បន្ទាយមានជ័យ ថ្ងៃទី២៥ ខែកក្កដា ឆ្នាំ២០២៥--

អាជ្ញាធរជាតិអប្សរាបានអញ្ជើញបើកបើកសម្ពោធជាផ្លូវការនូវមជ្ឈមណ្ឌលវិទ្យាសាស្ត្រអភិរក្សអប្សរា ដែលជាជំនួយនៃកិច្ចសហប្រតិបត្តិការពីទីភ្នាក់ងារបេតិកភណ្ឌកូរ៉េ នៅព្រឹកថ្ងៃទី២៥ ខែកក្កដា ឆ្នាំ២០២៥។ មជ្ឈមណ្ឌលវិទ្យាសាស្ត្រអភិរក្សអប្សរា ដែលបង្កើតឡើងនៅក្នុងមជ្ឈមណ្ឌលនៃអាជ្ញាធរជាតិអប្សរានេះ គឺជាបន្ទប់ពិសោធន៍តាមបែបវិទ្យាសាស្ត្រទំនើប ដើម្បីជួយដល់ការងារអភិរក្សវត្ថុបុរាណនានា ដែលបានរកឃើញពីឧទ្យានបុរាណវិទ្យាអង្គរ។

លោក យុនសាំង គីម (Hyunsung Kim ) អគ្គនាយកស្តីទីអន្តរជាតិនៃមជ្ឈមណ្ឌលសហប្រតិបត្តិការទីភ្នាក់ងារបេតិកភណ្ឌកូរ៉េ (KHA) បានថ្លែងឱ្យដឹងថា មជ្ឈមណ្ឌលវិទ្យាសាស្ត្រអភិរក្សអប្សរា ដែលបានសម្ពោធដាក់ឱ្យប្រើប្រាស់ជាផ្លូវការនេះ បានបំពាក់ឧបករណ៍ឯកទេសផ្នែកវិទ្យាសាស្ត្រនិងបច្ចេកវិទ្យាទំនើប សរុបចំនួន៦៧ប្រភេទ ដែលមានតម្លៃប្រមាណ៣០ម៉ឺនដុល្លារអាមេរិក។ បន្ទាប់ពីបើកសម្ពោធមជ្ឈមណ្ឌលវិទ្យាសាស្ត្រអភិរក្សអប្សរាឱ្យដំណើរការរួចហើយ ទីភ្នាក់ងារបេតិកភណ្ឌកូរ៉េ ក៏គ្រោងនឹងជួយបណ្តុះបណ្តាលផ្នែកបច្ចេកទេសដល់មន្ត្រី និងបុគ្គលិកនៃអាជ្ញាធរជាតិអប្សរា ដោយផ្តោតលើបច្ចេកទេសអភិរក្សលោហៈ សេរ៉ាមិច និងវត្ថុបុរាណធ្វើពីថ្មនានាផងដែរ។ តាមរយៈការបង្កើតមជ្ឈមណ្ឌលវិទ្យាសាស្ត្រអភិរក្សអប្សរា រួមនឹងការបណ្តុះបណ្តាលបច្ចេកទេសវិទ្យាសាស្ត្រដល់មន្ត្រី និងបុគ្គលិកនៃអាជ្ញាធរជាតិអប្សរានេះ កូរ៉េរំពឹងថាបុគ្គលិកដែលទទួលបានការបណ្តុះបណ្តាលនឹងកាន់តែមានការអភិវឌ្ឍន៍សមត្ថភាព លើជំនាញថែរក្សាបេតិកភណ្ឌវប្បធម៌ដ៏មានតម្លៃនៃអង្គរប្រកបដោយសុវត្ថិភាព និងមានលក្ខណៈវិទ្យាសាស្ត្រកាន់តែទូលំទូលាយថែមទៀត។

លោកស្រី លី អ៊ុន បុក (Lee  Eun bok) អគ្គនាយកគោលនយោបាយបេតិកភណ្ឌរបស់ការិយាល័យបេតិកភណ្ឌសេវាកម្មនៃសាធារណរដ្ឋកូរ៉េ បានថ្លែងថា មជ្ឈមណ្ឌលវិទ្យាសាស្ត្រ ដែលបង្កើតឡើងឱ្យប្រើប្រាស់ពេលនេះគឺជាផ្នែកមួយនៃគម្រោងកិច្ចសហប្រតិបត្តិការអន្តរជាតិ រវាងកូរ៉េ-កម្ពុជា នៅប្រាសាទអង្គរវត្ត។ «ប្រទេសកូរ៉េបានរក្សាទំនាក់ទំនងមិត្តភាពនិងកិច្ចសហប្រតិបត្តិការយ៉ាងជិតស្និទ្ធជាមួយនិងបេតិកភណ្ឌពិភពលោកដ៏ល្បីល្បាញរបស់អង្គការយូណេស្កូ ឧទ្យានអង្គរ ប្រទេសកម្ពុជានៅក្នុងវិស័យបេតិកភណ្ឌវប្បធម៌»។ ចាប់តាំងពីឆ្នាំ២០១០មកកូរ៉េ បានគាំទ្រឧបករណ៍សម្រាប់ការងារអភិរក្សនៅតំបន់អង្គរ និងសារមន្ទីរជាតិ។ កាលពីឆ្នាំ២០១៣សេវាបេតិកភណ្ឌកូរ៉េ និងអាជ្ញាធរជាតិអប្សរា បានចុះអនុស្សរណៈនៃការយោគយល់គ្នា (MOU) សម្រាប់គម្រោងអភិរក្ស និងជួសជុលប្រាសាទព្រះពិទូ។ ចាប់ផ្តើមនៅឆ្នាំ២០២៤ កូរ៉េក៏កំពុងធ្វើការលើគម្រោងអភិរក្ស និងជួសជុលប្រាសាទអង្គរវត្ត ដែលជាបេះដូងនៃអង្គរ។

លោកស្រី Lee  Eun bok បញ្ជាក់ទៀតថាការជឿទុកចិត្តបានកសាងឡើងជាង២០ឆ្នាំនៃកិច្ចសហប្រតិបត្តិការបេតិកភណ្ឌវប្បធម៌រវាងកម្ពុជា និងកូរ៉េ នឹងត្រូវបានពង្រឹងឱ្យមាននិរន្តរភាពបន្ថែមទៀតតាមរយៈការបើកមជ្ឈមណ្ឌលវិទ្យាសាស្ត្រអភិរក្សនេះ៕

ដោយ ឃុត សៅ