AKP ភ្នំពេញ ថ្ងៃទី២៥ ខែកក្កដា ឆ្នាំ២០២៥--

ឯកឧត្តមសាស្រ្តាចារ្យបណ្ឌិត អឿង ចន្ថា អនុរដ្ឋលេខាធិការក្រសួងធនធានទឹក និងឧតុនិយម និងក្រុមការងារ បានអញ្ជើញចុះពិនិត្យស្ថានភាពទឹក ការគ្រប់គ្រងទឹក ការងារប្រតិបត្តិការ និងសុវត្ថិភាពទំនប់អាងទឹកនៃសំណង់ស្ទាក់ទឹកដំណាក់ឈើក្រំ និងអាងទឹកបឹងព្រះពន្លៃ ស្ថិតក្នុងភូមិសាស្រ្តខេត្តពោធិ៍សាត់ កាលពីរសៀលថ្ងៃព្រហស្បតិ៍ ទី២៤ ខែកក្កដា ឆ្នាំ២០២៥។

ឯកឧត្តមអនុរដ្ឋលេខាធិការបានមានប្រសាសន៍ឱ្យដឹងថា ការងារប្រតិបត្តិការទំនប់អាងទឹក ពិតជាមានសារៈសំខាន់ខ្លាំងណាស់សម្រាប់ការគ្រប់គ្រងទឹក ដើម្បីការកាត់បន្ថយជំនន់ ទឹកហូរច្រោះលើខ្នងទំនប់ដែលអាចបណ្តាលឱ្យខូចខាត និងបាក់ទំនប់ទឹក នារដូវវស្សានេះ។

ឯកឧត្តមក៏បានណែនាំឱ្យលោកប្រធានមន្ទីរធនធានទឹក និងឧតុនិយមខេត្តពោធិ៍សាត់ ត្រូវបន្តយកចិត្តទុកដាក់ខ្ពស់ក្នុងការតាមដានការព្យាករពីស្ថានភាពធាតុអាកាស ការគ្រប់គ្រងកម្ពស់ទឹកឱ្យបានសមស្របក្នុងស្ទឹងផ្នែកខាងលើ និងខាងក្រោម ការគ្រប់គ្រងទ្វារទឹកក្នុងការងារប្រតិបត្តិការទំនប់អាងទឹក ដើម្បីពង្រឹងការគ្រប់គ្រងទឹក ទឹកជំនន់ កាត់បន្ថយហានិភ័យ និងផលប៉ះពាល់ពីគ្រោះទឹកជំនន់ផងដែរ៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក)