AKP ព្រះសីហនុ ថ្ងៃទី២៥ ខែកក្កដា ឆ្នាំ២០២៥--

យើងខ្ញុំទាំងអស់គ្នាជាក្រុមប្រឹក្សាខេត្ត គណៈអភិបាលខេត្ត មន្ត្រីរាជការគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ ព្រះសង្ឃ លោកគ្រូ អ្នកគ្រូ សិស្ស និស្សិត កម្មករ និយោជិត និងប្រជាពលរដ្ឋទូទាំងខេត្តព្រះសីហនុ សូម ប្រកាសជាឱឡារិកគាំទ្រយ៉ាងពេញទំហឹងដោយឥតងាករលើគោលជំហរដោះស្រាយបញ្ហាព្រំដែន និងការការពារអធិបតេយ្យភាព បូរណភាពទឹកដីនៅតាមព្រំដែនកម្ពុជា-ថៃ របស់រាជរដ្ឋាភិបាលកម្ពុជា ក្រោមការដឹកនាំដ៏ត្រឹមត្រូវប្រកបដោយគតិបណ្ឌិត មានចក្ខុវិស័យច្បាស់លាស់ និងប៉ិនប្រសប់បំផុត របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងគាំទ្រយ៉ាងពេញទំហឹងចំពោះវីរៈកងទ័ពជួរមុខកម្ពុជា ដែលបាននិងកំពុងប្រយុទ្ធ យ៉ាងអង់អាចក្លាហានជាមួយសត្រូវឈ្លានពានទឹកដី ដែលបង្កឡើងដោយកងទ័ពថៃ នាព្រឹកថ្ងៃទី២៤ ខែកក្កដា ឆ្នាំ២០២៥ នេះ នៅក្នុងភូមិសាស្ត្រខេត្តឧត្តរមានជ័យ។

ឆ្លៀតក្នុងឱកាសនេះ យើងខ្ញុំទាំងអស់គ្នា សូមអំពាវនាវដល់បងប្អូនប្រជាពលរដ្ឋទាំងអស់នៅទូទាំងខេត្តព្រះសីហនុ សូមចូលរួមក្នុងស្មារតីជាតិ និយមពីសមរភូមិក្រោយដោយផ្តល់នូវកម្លាំងចិត្ត ជំនឿជាក់លើរាជរដ្ឋាភិបាល និងកងទ័ពជួរមុខ តាមរយៈការចេញនូវសារគាំទ្រដល់កងទ័ពជួរមុខ ដែលកំពុងប្រយុទ្ធយ៉ាងជាញជ័យ ជាមួយនឹងសត្រូវឈ្លានពានទឹកដីនៅតាមព្រំដែនកម្ពុជា-ថៃ ដើម្បីពង្រឹងខឿនការពារជាតិរបស់ប្រជាជន ក្នុងការការពារបូរណភាពទឹកដី។

ជាថ្មីម្តងទៀត យើងខ្ញុំទាំងអស់គ្នាសូមប្តេជ្ញាចិត្តចូលរួមដោយឥតងាករេលើគ្រប់រូបភាពទាំងកម្លាំងកាយចិត្ត ប្រាជ្ញាស្មារតី និងធនធានផ្ទាល់ខ្លួន ជាមួយរាជរដ្ឋាភិបាល ដើម្បីការពារបូរណភាពទឹកដីមាតុភូមិអង្គរដ៏បវរនៃយើងឱ្យបាននៅគង់វង្សស្ថិត ស្ថេរជាអមតៈ ដោយមិនអនុញ្ញាតឱ្យជាតិសាសន៍ណាមួយមករំលោភបំពានបានឡើយ។

យើងខ្ញុំទាំងអស់គ្នាសូមបួងសួងដល់វត្ថុស័ក្តិសិទ្ធិទាំងឡាយទាំងពួងក្នុងលោក ទេវត្តាថែរក្សាទឹកដីនៃព្រះរាជាណាចក្រកម្ពុជា ព្រះបារមីនៃអតីតព្រះមហាក្សត្រខ្មែរ បារមីថែរក្សាប្រាសាទនានាក្នុងដែនកម្ពុជា បារមីមេទ័ពខ្មែរ និងព្រលឹងវីរបុរសខ្មែរ បុព្វបុរសខ្មែរ អតីតយុទ្ធជនគ្រប់ជំនាន់ សូមជួយអភិបាលគ្រងរក្សា ប្រោះព្រំប្រសិទ្ធពរបវរមហាប្រសើរដល់វីរកងទ័ពជួរ មុខទាំងអស់នៅគ្រប់សមរភូមិ និងសូមទទួលបាននូវជោគជ័យគ្រប់ភារកិច្ច វាយកម្ទេចពួកចោរឈ្លានពាន ដែលបង្កការរំខានដល់សេចក្តីសុខ សន្តិភាពរបស់ប្រជាជាតិខ្មែរ៕

ដោយ ងូ សុមុនី