AKP ភ្នំពេញ ថ្ងៃទី ២៥ ខែកក្កដា ឆ្នាំ ២០២៥--លោកជំទាវឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិបានថ្លែងបញ្ជាក់ថា ថៃបានចាប់ផ្តើមវាយប្រហារដោយប្រើប្រាស់គ្រាប់បែកចង្កោមមកលើទឹកដីកម្ពុជា ចាប់ពីព្រឹកថ្ងៃទី ២៥ ខែ កក្កដា ឆ្នាំ ២០២៥នេះ ដែលនេះបង្ហាញពីការល្មើសច្បាប់អន្តរជាតិ និងបង្ហាញពីភាពឃោរឃៅក្នុងការសម្លាប់មនុស្សគ្មានញញើតសោះឡើយ។ ការថ្លែងបញ្ជាក់របស់លោកជំទាវឧត្តមសេនីយ៍ឯក អ្នកនាំពាក្យក្រសួងការពារជាតិបែបនេះ ក្នុងសន្និសីទសារព័ត៌មានពាក់ព័ន្ធស្ថានការណ៍នៃការឈ្លានពានរបស់ភាគីថៃមកលើដែនអធិបតេយ្យភាពកម្ពុជា នៅទីស្តីការគណៈរដ្ឋមន្ត្រី នាព្រឹកថ្ងៃទី២៥ ខែកក្កដា ឆ្នាំ២០២៥។

លោកជំទាវឧត្តមសេនីយ៍ឯក ម៉ាលី សុជាតា បានលើកឡើងថា នៅព្រឹកថ្ងៃទី ២៥ ខែ កក្កដា ឆ្នាំ ២០២៥នេះនៅវេលាម៉ោង៣៖២០នាទី ថៃបានវាយប្រហារគ្រាប់បែកចង្កោមមកលើតំបន់ភ្នំខ្មោច តាថាវ និងភ្នំ៣៣៣ ហើយនៅវេលាម៉ោង៥៖២៥នាទី ថៃបានប្រើគ្រាប់បែកចង្កោមវាយប្រហារមកលើតំបន់ភ្នំខ្មោច ។ នៅម៉ោង៥៖៣០នាទី ថៃបានចាប់ផ្តើមវាយប្រហារនៅប្រាសាទតាមាន់ និងប្រាសាទតាក្របី និងនៅវេលាម៉ោង៥,៤០នាទី ថៃចាប់ផ្តើមវាយប្រហារនៅតំបន់មុំ៣ និងនៅវេលាម៉ោង៦៖៥០នាទី ថៃបានបាញ់គ្រាប់បែកចង្កោមលើកទី២នៅភូមិ តេជោធម្មជាតិ ស្រុក ជាំក្សាន្ត ខេត្តព្រះវិហារ ខណៈនៅវេលាម៉ោង៧៖០៣នាទី ទាហានថៃក៏បានបាញ់ចូលគោលដៅជាំក្សាន្តផងដែរ។ លោកជំទាវឧត្តមសេនីយ៍ឯក អ្នកនាំពាក្យក្រសួងការពារជាតិបានបញ្ជាក់ផងដែរថាសម្រាប់នៅពេលវេលាព្រឹកម៉ោង៨៖០០ នាថ្ងៃទី២៥ ខែកក្កដា ឆ្នាំ ២០២៥ ដដែល ថៃបានព្យាយាមវាយប្រហារដណ្តើមយកប្រាសាទតាក្របីវិញ ប៉ុន្តែកងកម្លាំងរបស់យើងបានតស៊ូយ៉ាងស្វិតស្វាញ ហើយប្តេជ្ញាការពារឱ្យខានតែបានមិនឱ្យការរំលោភបំពានមកលើដែនអធិបតេយ្យភាពកម្ពុជាបានឡើយ។

លោកជំទាវឧត្តមសេនីយ៍ឯក ម៉ាលី សុជាតា បានសង្កត់ធ្ងន់ថា៖ «ថៃចាប់ផ្តើមប្រើគ្រាប់បែកចង្កោមវាយសន្ធាប់ដោយចេតនាដ៏ខុសច្បាប់មកលើទឹកដីកម្ពុជា។ ភាពរំលោភដ៏កម្រោលនេះគឺជាការរំលោភយ៉ាងធ្ងន់ធ្ងរចំពោះច្បាប់អន្តរជាតិនៃអនុសញ្ញាស្តីពីគ្រាប់បែកចង្កោម និងការប្រើប្រាស់អាវុធបែបនេះមិនត្រឹមតែបង្ហាញពីភាពឃោរឃៅ និងអនុមនុស្សធម៌របស់ថៃប៉ុណ្ណោះទេ តែវាជាការឆ្លុះបញ្ចាំងឱ្យមើលឃើញថាប្រទេសមួយនេះមិនខ្លាចរអាច្បាប់អន្តរជាតិសោះឡើយ៕

ដោយ៖ មករា