AKPបន្ទាយមានជ័យ ថ្ងៃទី២៥ខែកក្កដា ឆ្នាំ២០២៥--ឯកឧត្តមអ៊ុំរាត្រី អភិបាលខេត្តបន្ទាយមានជ័យតាងនាមក្រុមប្រឹក្សាខេត្ត គណៈអភិបាលខេត្ត មន្ត្រីរាជការ ព្រះសង្ឃ កងកម្លាំងប្រដាប់អាវុធគ្រប់ប្រភេទ លោកគ្រូ អ្នកគ្រូ យុវជន សិស្សានុសិស្ស និងប្រជាពលរដ្ឋទូទាំងខេត្តបន្ទាយមានជ័យ បានប្រកាសជាសាធារណៈនូវការគាំទ្រដោយឥតងាករេ និងជឿជាក់ទាំងស្រុងលើការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការដោះស្រាយបញ្ហាព្រំដែន និងការការពារបូរណភាពទឹកដីនៅតាមព្រំដែនកម្ពុជា-ថៃ។ 

ការប្រកាសនេះធ្វើឡើងបន្ទាប់ពីមានការឈ្លានពានទឹកដីបង្កឡើងដោយកងទ័ពថៃ នាព្រឹកថ្ងៃទី២៤ ខែកក្កដា ឆ្នាំ២០២៥ នៅក្នុងភូមិសាស្ត្រខេត្តឧត្តរមានជ័យព្រះវិហារ។

ក្រុមប្រឹក្សាខេត្ត គណៈអភិបាលខេត្ត និងគ្រប់មជ្ឈដ្ឋានទាំងអស់ក្នុងខេត្តបន្ទាយមានជ័យ បានបង្ហាញជំហរយ៉ាងរឹងមាំក្នុងការគាំទ្រចំពោះភាពអង់អាចក្លាហានរបស់ វីរៈកងទ័ពជួរមុខកម្ពុជា ដែលបាននឹងកំពុងប្រយុទ្ធយ៉ាងសកម្មជាមួយសត្រូវឈ្លានពាន។ ការគាំទ្រនេះមិនត្រឹមតែជាការលើកទឹកចិត្តប៉ុណ្ណោះទេ ប៉ុន្តែជាការបញ្ជាក់ពីជំនឿជឿជាក់លើសមត្ថភាពដឹកនាំរបស់សម្តេចធិបតី ហ៊ុន ម៉ាណែត ក្នុងការរក្សាបាននូវសុវត្ថិភាព និងបូរណភាពទឹកដីជាតិ។

ស្ថិតក្នុងកាលៈទេសៈដ៏តានតឹងនេះ ប្រជាពលរដ្ឋទូទាំងខេត្តបន្ទាយមានជ័យ បានប្ដេជ្ញាចិត្តចូលរួមក្នុងស្មារតីជាតិនិយមពីសមរភូមិក្រោយ ដោយផ្តល់នូវកម្លាំងចិត្ត និងជំនឿជឿជាក់លើរាជរដ្ឋាភិបាល និងកងទ័ពជួរមុខ។ ការចេញនូវសារ ឬញត្តិគាំទ្រដល់កងទ័ពជួរមុខ ដែលកំពុងប្រយុទ្ធយ៉ាងប្តូរផ្តាច់នឹងសត្រូវឈ្លានពានទឹកដីនៅតាមព្រំដែនកម្ពុជា-ថៃ គឺជាសកម្មភាពដ៏សំខាន់មួយ ដើម្បីពង្រឹងខឿនការពារជាតិរបស់ប្រជាជនក្នុងការការពារបូរណភាពទឹកដី។ នេះបង្ហាញពីការរួបរួមគ្នារបស់ប្រជាជនកម្ពុជាក្នុងបុព្វហេតុជាតិ។

ជាថ្មីម្តងទៀត ប្រជាពលរដ្ឋ មន្ត្រីរាជការ និងកងកម្លាំងប្រដាប់អាវុធទាំងអស់ បានប្តេជ្ញាចូលរួមជាមួយរាជរដ្ឋាភិបាលដោយឥតងាករេ ក្នុងការការពារបូរណភាពទឹកដី ដោយមិនអនុញ្ញាតឱ្យជាតិសាសន៍ណាមួយមករំលោភបំពានបានឡើយ។ នេះគឺជាការសង្កត់ធ្ងន់ទៅលើគោលជំហរដ៏រឹងមាំរបស់កម្ពុជាក្នុងការរក្សាអធិបតេយ្យភាពរបស់ខ្លួន។

ឆ្លៀតក្នុងឱកាសនេះផងដែរ គ្រប់មជ្ឈដ្ឋានទាំងអស់បានលើកហត្ថបួងសួងដល់វត្ថុស័ក្តិសិទ្ធិទាំងឡាយក្នុងលោក គុណបុណ្យព្រះរតនៈត្រ័យ គុណកែវទាំងបី បារមីថែរក្សាប្រាសាទព្រះវិហារ ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងបារមីអតីតមេទ័ពខ្មែរគ្រប់ជំនាន់ សូមជួយកម្ចាត់សត្រូវឈ្លានពានទឹកដីកម្ពុជាឱ្យវិនាសខ្ចាត់ខ្ចាយ។ ព្រមជាមួយគ្នានេះ ក៏សូមឱ្យបារមីគ្រប់ព្រះអង្គ ជួយបីបាច់ថែរក្សា ការពារប្រោះព្រំ ដល់កងកម្លាំងជួរមុខរបស់កម្ពុជា ដែលកំពុងប្រយុទ្ធជាមួយសត្រូវឈ្លានពានទឹកដី សូមជួបតែសេចក្តីសុខ សុវត្ថិភាព និងឈ្នះអស់មារសត្រូវគ្រប់ទិសទី។

ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានមានប្រសាសន៍ថា "ការគាំទ្រដ៏មុតមាំនេះ គឺជាកម្លាំងចលករដ៏ធំធេងសម្រាប់រាជរដ្ឋាភិបាល និងកងទ័ពរបស់យើង ក្នុងការបន្តបេសកកម្មការពារជាតិមាតុភូមិ។ យើងជឿជាក់យ៉ាងមុតមាំថា ក្រោមការដឹកនាំដ៏ឈ្លាសវៃរបស់សម្តេចធិបតី ហ៊ុន ម៉ាណែត កម្ពុជានឹងរក្សាបាននូវសុខសន្តិភាព និងបូរណភាពទឹកដីជានិច្ចនិរន្តរ៍"៕

ដោយ ៖ ឈុនសារ៉ាត