AKPកំពង់ធំ ថ្ងៃទី២៥ ខែកក្កដា ឆ្នាំ២០២៥--លោកជំទាវ លឹម មួយស្រៀន នួន ផារ័ត្ន អនុប្រធានកិត្តិយសសាខាកាកបាទក្រហមកម្ពុជាខេត្ត លោកស្រី លំ គន្ធារី អនុប្រធានគណៈកម្មាធិការសាខាកាកបាទក្រហមកម្ពុជាខេត្ត មន្ត្រីសាខា-អនុសាខានិងក្រុមការងារថ្នាក់ស្រុក/ឃុំ កាលពីថ្ងៃទី២៤ខែកក្កដាឆ្នាំ២០២៥បានអញ្ជើញចុះសួរសុខទុក្ខ និងនាំយកអំណោយមនុស្សធម៌ របស់សាខាកាកបាទក្រហមកម្ពុជាខេត្តកំពង់ធំ ទៅប្រគល់ជូនដល់ស្ត្រីដែលសម្រាលបានកូនស្រីភ្លោះ៣នាក់ ស្ថិតនៅភូមិជីអាប់ ឃុំចំណាងក្រោម ស្រុកស្ទោងខេត្តកំពង់ធំ។

លោកជំទាវលឹម មួយសៀងនួន ផារ័ត្តអនុប្រធានកិត្តិយសសាខាកាកបាទក្រហមកម្ពុជាខេត្តកំពង់ធំបានមានប្រសាសន៍បញ្ជាក់ថាដោយមានការយកចិត្តទុកដាក់ពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនិងជាប្រធានព្រឹទ្ធសភានិងសម្តេចមហាបវរធិបតី ហ៊ុន ម៉ាណែត នាយរដ្ឋមន្ត្រី នៃព្រះរាជាណាចក្រកម្ពុជាបច្ចុប្បន្ន បានជំរុញនិងលើកទឹកចិត្តដល់ស្ត្រីដែលបានសម្រាលកូនស្រីភ្លោះ៣នាក់ឱ្យរក្សាសុខភាពបានល្អហូបចំណីឱ្យបានត្រឹមត្រូវនិងថែរក្សាកូនស្រីទាំង៣នាក់នេះឱ្យបានធំធាត់ មានអនាគតដូចកុមារដទៃទៀត។

លោកជំទាវ លឹម មួយស្រៀន នួនផារ័ត្ន បានមានប្រសាសន៍បញ្ជាក់បន្ថែមទៀតថា ការចុះសួរសុខទុក្ខដល់គ្រួសារដែលសម្រាលបានកូនស្រី៣នាក់គឺ ឪពុកឈ្មោះ ឃឿន ឃិន អាយុ២៨ឆ្នាំ ម្ដាយឈ្មោះឡន ចន្នី អាយុ២៥ឆ្នាំកូនស្រីទី១ឈ្មោះ ឃិន ចាន់ណូ កូនស្រីទី២ឈ្មោះ ឃិន ចាន់នា និងកូនស្រីទី៣ឈ្មោះ ឃិន ចំរើន កើតនៅថ្ងៃទី៣០ ខែឧសភា ឆ្នាំ២០២៥កន្លងទៅថ្មីៗនេះ។ ការចុះសួរសុខទុក្ខនិងសំណេះសំណាលនាពេលនេះគឺ ដើម្បីផ្ដល់កម្លាំងចិត្តដល់ឪពុកម្ដាយឱ្យមានភាពរឹងមាំក្នុងការបីបាច់ថែរក្សាកូនឱ្យបានល្អ បញ្ជូនទៅសិក្សារៀនសូត្រនៅសាលារៀន ដើម្បីឱ្យក្លាយទៅជាកូនល្អ សិស្សល្អ មិត្តល្អ និងពលរដ្ឋល្អជាសសរទ្រូងកសាងប្រទេសជាតិឱ្យមានការរីកចម្រើន។

សូមបញ្ជាក់ថាអំណោយមនុស្សធម៌របស់សាខាកាកបាទក្រហមកម្ពុជាខេត្តកំពង់ធំផ្ដល់ជូនរួមមាន÷ អង្ករចំនួន៥០គីឡូក្រាម មី១កេស ទឹកត្រី១យួរ ទឹកស៊ីអ៊ីវ១យួរ ឃីត១ សម្ភារៈក្មេងតូច៣ឈុតនិងថវិកាមួយចំនួនទៀត។ចំពោះអំណោយផ្ទាល់របស់លោកជំទាវ លឹម មួយស្រៀន នួន ផារ័ត្នអភិបាលខេត្តកំពង់ធំរួមមាន÷សាប៊ូម្សៅ ខោអាវកុមារ ទឹកដោះគោឆៅ នំនិងថវិកាមួយចំនួនផងដែរ៕

ដោយ៖ ស៊ុម វណ្ណា