AKP ភ្នំពេញ ថ្ងៃទី២៤ ខែកក្កដា ឆ្នាំ២០២៥-- ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារអនុវត្តគម្រោង FMIS បានអញ្ជើញជាអធិបតីក្នុងកម្មវិធីបញ្ជ្រាបការយល់ដឹងស្តីពី “ការអនុវត្តនីតិវិធីចំណាយថវិកាចរន្តគ្រប់មុខសញ្ញាតាម FMIS ទាំងស្រុង សម្រាប់គ្រឹះស្ថានសាធារណៈរដ្ឋបាលចំនួន ៩” នៅថ្ងៃទី ២៤ ខែកក្កដា ឆ្នាំ២០២៥ នៅទីស្តីការក្រសួងសេដ្ឋកិច្ច និងហិរញ្ញវត្ថុ ដោយមានការអញ្ជើញចូលរួមពី ថ្នាក់ដឹកនាំ និង មន្ត្រីជំនាញ ដែលជាតំណាងគ្រឹះស្ថានសាធារណៈរដ្ឋបាល និង ក្រសួង-ស្ថាប័នពាក់ព័ន្ធ សរុបប្រមាណ១០០ រូប។

កម្មវិធីនេះត្រូវបានរៀបចំឡើងក្នុងគោលបំណងបញ្ជ្រាបការយល់ដឹងក្នុងកម្រិតបឋមជូន ថ្នាក់ដឹកនាំ និង មន្រ្តីជំនាញ នៅតាមគ្រឹះស្ថានសាធារណៈរដ្ឋបាលចំនួន៩ រួមមាន៖ ១). មជ្ឈមណ្ឌលបណ្តុះធុរកិច្ចថ្មី "តេជោ" ២). គ្រឹះស្ថានអង្គរ ៣). រាជបណ្ឌិត្យសភាកម្ពុជា ៤). វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា ៥). សាកលវិទ្យាល័យភូមិន្ទកសិកម្ម ៦). សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ៧). វិទ្យាស្ថានសេដ្ឋកិច្ច និងហិរញ្ញវត្ថុ ៨). សាកលវិទ្យាល័យជាតិបាត់ដំបង និង៩). សាកលវិទ្យាល័យវិទ្យាសាស្ត្រសុខាភិបាល រួមជាមួយក្រសួង-ស្ថាប័នជាអាណាព្យាបាលបច្ចេកទេស និងអង្គភាពពាក់ព័ន្ធ ដើម្បីត្រៀមលក្ខណៈសម្បត្តិគ្រប់គ្រាន់ ក្នុងការចូលរួមអនុវត្តនីតិវិធីចំណាយថវិកាចរន្តគ្រប់មុខសញ្ញាតាម FMIS ទាំងស្រុង សំដៅឈានទៅប្រើប្រាស់ជាផ្លូវការ នៅដើមត្រីមាសទី៤ ឆ្នាំ២០២៥ ស្របតាមកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាល ក្នុងការអនុវត្តថវិការបស់គ្រឹះស្ថានសាធារណៈរដ្ឋបាលឱ្យកាន់តែមានប្រសិទ្ធភាព គណនេយ្យភាព និងតម្លាភាព ដើម្បីបម្រើសេវាសាធារណៈជូនប្រជាពលរដ្ឋឱ្យកាន់តែប្រសើរថែមទៀត។

ឯកឧត្តមបណ្ឌិតសភាចារ្យបានគូសរំលេចអំពីសាវតារនៃការអនុវត្តនីតិវិធីតាម FMIS ទាំងស្រុង ដែលទទួលបានជោគជ័យ និងការសាទរពីថ្នាក់ដឹកនាំ និងអ្នកប្រើប្រាស់នៅតាមក្រសួង-ស្ថាប័នចំនួន ១៦ រួចមកហើយ ដោយបានផ្តល់អត្ថប្រយោជន៍ជាច្រើន រួមមាន៖ ១). ជំហាននៃការអនុវត្តមានលក្ខណៈសាមញ្ញ ខ្លី និង លឿន ២). មានព័ត៌មានគ្រប់គ្រាន់ ក្នុងការតាមដានអំពីស្ថានភាពនៃប្រតិបត្តិការចំណាយថវិកាជាប់គាំង (ទៅតាមដំណាក់កាល អ្នកទទួលបន្ទុក និងរយៈពេលជាប់គាំង) ៣). ចូលរួមបង្កើនគុណភាព ប្រសិទ្ធភាព និងពន្លឿនការផ្តល់សេវាសាធារណៈ ៤). បញ្ឈប់ការរៀបចំនូវឯកសារដូចជា កំណត់បង្ហាញរឿង លិខិតស្នើសុំធានាចំណាយមកក្រសួងសេដ្ឋកិច្ច និងហិរញ្ញវត្ថុ និងលិខិតស្នាមពាក់ព័ន្ធផ្សេងៗ ដោយសារឯកសារ និង លិខិតយុត្តិការចាំបាច់មួយចំនួន ត្រូវបានស្គែនចូលក្នុង FMIS រួចជាស្រេច ៥). កសាងបាននូវមូលដ្ឋានកាន់តែច្បាស់លាស់ ក្នុងការបន្តលុបបំបាត់ភាពអសកម្មនានា នៅក្នុងការអនុវត្តថវិកា និង ឈានដល់ការទប់ស្កាត់ទាំងស្រុង។

ឯកឧត្តមបណ្ឌិតសភាចារ្យបានបន្ថែមទៀតថា ការអនុវត្តនីតិវិធីខាងលើនឹងបម្រើជាមូលដ្ឋានសម្រាប់អ្នកប្រើប្រាស់ ក្នុងការតាមដានព័ត៌មានជាក់លាក់ និងគ្រប់ជ្រុងជ្រោយ នូវរាល់ប្រតិបត្តិការហិរញ្ញវត្ថុ ចាប់ពីការស្នើសុំ រហូតដល់ការទូទាត់ចំណាយ ដែលនឹងត្រូវធ្វើឡើងដោយផ្ទាល់នៅក្នុង FMIS ដោយលុបបំបាត់ទាំងស្រុងនូវការប្រើប្រាស់ឯកសារជាក្រដាស នៅគ្រប់ដំណាក់កាល រួមទាំងដំណាក់កាលនៃការអនុវត្តថវិការបស់គ្រឹះស្ថានសាធារណៈរដ្ឋបាល។ តាមរយៈបទពិសោធន៍នៃការអនុវត្តនីតិវិធីនេះ នៅតាមក្រសួង-ស្ថាប័ន បានបង្ហាញអំពីប្រសិទ្ធភាពខ្ពស់ ដោយបានកាត់បន្ថយរយៈពេលនៃការស្នើសុំទូទាត់ចំណាយថវិកាចរន្ត នៅតាមក្រសួង-ស្ថាប័ន មកត្រឹម ១២ ថ្ងៃ (ក្នុងឆ្នាំ ២០២៤) និង ៦ ថ្ងៃ (ក្នុងឆ្នាំ ២០២៥)។

ឯកឧត្តមបណ្ឌិតសភាចារ្យបានផ្ដល់អនុសាសន៍ណែនាំដល់គ្រឹះស្ថានសាធារណៈរដ្ឋបាល ឱ្យបន្តផ្តល់កិច្ចសហការល្អជាមួយក្រុមការងារគ្រប់គ្រងគម្រោង FMIS សំដៅធានាបាននូវការអនុវត្តនីតិវិធីចំណាយថវិកាចរន្តគ្រប់មុខសញ្ញាតាម FMIS ទាំងស្រុង ឱ្យដំណើរការទៅដោយរលូន និងប្រកបដោយប្រសិទ្ធភាពខ្ពស់៕

ដោយ ទូច វលក័្ខណ