AKP ភ្នំពេញ ថ្ងៃទី២៤ ខែកក្កដា ឆ្នាំ២០២៥-- ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងលោកស្រី Miura Yoshiko តំណាងជាន់ខ្ពស់ការិយាល័យនៃទីភ្នាក់ងារសហប្រតិបត្តិការអន្តរជាតិជប៉ុន (JICA) ប្រចាំនៅកម្ពុជា បានអញ្ជើញជាសហប្រធាន ដឹកនាំកិច្ចប្រជុំអនុគណៈកម្មការក្រុមការងារបច្ចេកទេសស្ដីពីទឹកកខ្វក់ និងអនាម័យក្នុងទីក្រុង លើកទី៥ នាថ្ងៃព្រហស្បតិ៍ ទី២៤ ខែកក្កដា ឆ្នាំ២០២៥ នៅទីស្ដីការក្រសួង ដោយមានការអញ្ជើញចូលរួមពីថ្នាក់ដឹកនាំក្រសួង មន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ តំណាងក្រសួង ស្ថានប័នពាក់ព័ន្ធ និងតំណាងដៃគូអភិវឌ្ឍន៍នានា។

កិច្ចប្រជុំនេះផ្តោតជាសំខាន់លើផែនការនាពេលបច្ចុប្បន្ន និងអនាគត ទាក់ទងនឹងការគ្រប់គ្រងទឹកកខ្វក់នៅកម្ពុជា ការផ្គត់ផ្គង់ទឹក និងអនាម័យក្នុងទីក្រុង និងការធ្វើបច្ចុប្បន្នភាពពីដៃគូអភិវឌ្ឍន៍នានាដូចជា៖ ADB, AFD, EDCF, GGGI, GRET, KOICA និង WATER AID។

ក្នុងឱកាសនោះ ឯកឧត្តមរដ្ឋលេខាធិការបានគូសបញ្ជាក់ការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការធ្វើឱ្យប្រសើរឡើងនូវក្របខ័ណ្ឌស្ថាប័ន និងច្បាប់ ដើម្បីលើកកម្ពស់ការគ្រប់គ្រងអនាម័យ និងការគ្រប់គ្រងទឹកកខ្វក់ប្រកបដោយប្រសិទ្ធភាព និងនិរន្តរភាព៕

ដោយ៖ ពេជ្រ សំអឿន (ប្រភព៖ ក្រសួងសាធារណការ)