AKP ភ្នំពេញ ថ្ងៃទី២៤ ខែកក្កដា ឆ្នាំ២០២៥-- ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងជាប្រធានក្រុមការងារចុះមូលដ្ឋានខេត្តត្បូងឃ្មុំ បានអញ្ជើញចូលរួមជាមួយថ្នាក់ដឹកនាំ សមាជិក សមាជិកា ក្រុមការងារចុះមូលដ្ឋានខេត្តត្បូងឃ្មុំ ក្រុមការងារចុះមូលដ្ឋានស្រុកអូររាំងឪ រដ្ឋបាលស្រុក អាជ្ញាធរមូលដ្ឋានគ្រប់ថ្នាក់ យុវជន និងប្រជាពលរដ្ឋនៅគ្រប់ឃុំទាំង៧នៃស្រុកអូររាំងឪ បានជួបជុំគ្នាតាមកន្លែងផ្សេងៗគ្នាដើម្បីបង្ហាញការរួមគ្នា ជាធ្លុងមួយគាំទ្រដល់រាជរដ្ឋាភិបាល និងកងកម្លាំងជួរមុខកម្ពុជា ដែលកំពុងប្រយុទ្ធជាមួយខ្មាំងសត្រូវ ឈ្លានពាន ការពារបាននូវបូរណភាព និងអធិបតេយ្យភាពជាតិ យ៉ាងអង់អាចក្លាហាន មោះមុត បន្ទាប់ពីកងទ័ពថៃបានរំភលោភចូលមកក្នុងទឹកដីកម្ពុជា និងបាញ់មកលើកម្ពុជាមុន ចាប់តាំងពីព្រឹកព្រលឹម នាថ្ងៃទី២៤ ខែកក្កដា ឆ្នាំ២០២៤នេះ នៅក្នុងភូមិសាស្រ្តខេត្តឧត្តរមានជ័យ។

រហូតមកដល់ពេលនេះកងទ័ពនៃប្រទេសទាំងពីរកំពុងប្រយុទ្ធគ្នា ហើយកងទ័ពកម្ពុជាដ៏អង់អាចក្លាហានបានឈរការពារដែនអធិបតេយ្យយ៉ាងរឹងមាំ តាមខ្សែបន្ទាត់ព្រំដែន មិនអនុញ្ញាតជាដាច់ខាត ដល់ការប៉ុនប៉ងរំលោភ ពីចោរសៀមឈ្លានពានបានឡើយ ហើយប្ដេជ្ញាការពារបូរណភាពទឹកដីទោះជាក្នុងតម្លៃណាក៏ដោយ។

ការរួមកម្លាំងគ្នារវាង ថ្នាក់ដឹកនាំ មន្រ្តីរាជការ យុវជន និងប្រជាពលរដ្ឋកម្ពុជា នៅទូទាំងស្រុកអូររាំងឪ នាថ្ងៃនេះ រៀបចំឡើងក្នុងគោលបំណងបង្ហាញនូវសាមគ្គីភាព លើកស្ទួយជាតិ ប្រឆាំងរាល់អំពើឈ្លានពាន រំលោភបំពានព្រំដែន និងប្តេជ្ញារួមគ្នាជួយជ្រោមជ្រែងរាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបរវធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងក៏ដូចជាកងទ័ពជួរមុខដោយមិនឱ្យខ្មាំងសត្រូវឈ្លានពាន បៀតបៀនយាយីទឹកដីកម្ពុជាជាដាច់ខាត និងសូមជូនពរវីរកងទ័ពកម្ពុជា ទាំងអស់ទទួលបានសេចក្តីសុខ សុវត្ថិភាព និងទទួលបានជ័យជម្នះ លើសត្រូវឈ្លានពានកុំបីខាន៕

ដោយ ទេស ច័ន្ទសុធារី (ប្រភព៖ ក្រសួងបរិស្ថាន)