AKP កណ្ដាល ថ្ងៃទី២៤ ខែកក្កដា ឆ្នាំ២០២៥-- ឯកឧត្តម គួច ចំរើន អភិបាលខេត្តកណ្ដាល បានអំពាវអំពាវនាវដល់ប្រជាពលរដ្ឋទាំងអស់សូមផ្ដល់ការគាំទ្រយ៉ាងពេញទំហឹង នូវកងកម្លាំងដែលកំពុងឈរជើងនៅជួរមុខក្នុងការការពារបូរណភាពទឹកដីប្រឆាំងការឈ្លានពានរបស់ថៃ ក្នុងឱកាសដែលឯកឧត្តមអញ្ជើញជាអធិបតីក្នុងពិធីបិទផ្សាយជាសាធារណៈនូវឯកសារនៃការវិនិច្ឆ័យចំនួន០៥ភូមិ គឺភូមិព្រែកជ្រៃ ភូមិព្រែកឫស្សី ភូមិព្រែកប្រា ភូមិអន្លង់ទ្រា និងភូមិពាមស្ដី ឃុំព្រែកឬស្សី ស្រុកល្វាឯម ខេត្តកណ្ដាល នាព្រឹកថ្ងៃទី២៤ ខែកក្កដា ឆ្នាំ២០២៥។

ឯកឧត្តមអភិបាលខេត្តបានបន្តថា កងទ័ពរបស់យើងដែលកំពុងឈរជើងនៅជួរមុខបានបំពេញនូវភារកិច្ចយ៉ាងអង់អាចក្លាហាន ក្នុងការការពារបូរណភាពទឹកដី ដែលនេះជាស្មារតីគួរឱ្យគោរព និងកោតសរសើរជាទីបំផុត។ ដូច្នេះយើងទាំងអស់គ្នាជាប្រជាពលរដ្ឋ មន្ត្រីរាជការ សូមគាំទ្រនូវវីរភាពដ៏អង់អាចក្លាហានរបស់កងទ័ពយើង ដែលកំពុងឈរជើងនៅជួរមុខ ដើម្បីការពារបូរណភាពទឹកដី ដោយមិនឱ្យសត្រូវមកឈ្លានពានលើទឹកដីរបស់យើងបានឡើយ។

យើងទាំងអស់គ្នាជឿជាក់លើការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការការពារបូរណភាពទឹកដីពីសត្រូវឈ្លានពាន និងគាំទ្រយ៉ាងពេញទំហឹងចំពោះចំណាត់ការរបស់រាជរដ្ឋាភិបាលក្នុងការយកតំបន់ទាំង៤ រួមមាន ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅតុលាការអន្តរជាតិICJ៕

ដោយ ណយ នឿន (ប្រភព៖ រដ្ឋបាលខេត្តកណ្តាល)