AKP ភ្នំពេញ ថ្ងៃទី២៤ ខែកក្កដា ឆ្នាំ២០២៥ -- កម្ពុជា និងសហរដ្ឋអាមេរិកបានពិភាក្សា និងផ្លាស់ប្តូរទស្សនៈលើកិច្ចសហប្រតិបត្តិការផ្លូវច្បាប់ រួមទាំងការចែករំលែកព័ត៌មាន សម្រាប់បម្រើឱ្យការស្រាវជ្រាវនិងស៊ើបអង្កេត រួមទាំងការឆបោកតាមប្រព័ន្ធបច្ចេកវិទ្យាផងដែរ។

ការលើកឡើងរបស់ភាគីទាំងពីរនេះបានធ្វើឡើងរវាងឯកឧត្តមសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) បានអនុញ្ញាតឱ្យ លោកស្រី Julia Stevens អនុព័ន្ធផ្នែកច្បាប់នៃស្ថានទូតសហរដ្ឋអាមេរិក ប្រចាំកម្ពុជា ចូលជួបសម្តែងការគួរសម និងពិភាក្សាការងារកាលពីថ្ងៃទី២៣ ខែកក្កដា ឆ្នាំ២០២៥។  

ក្នុងជំនួបនោះ ឯកឧត្តមសន្តិបណ្ឌិត ឆៃ ស៊ីណារិទ្ធ បានគូសបញ្ជាក់ពីការប្តេជ្ញាចិត្តខ្ពស់របស់រាជរដ្ឋាភិបាលក្នុងការបោសសម្អាតការឆបោកតាមប្រព័ន្ធបច្ចេកវិទ្យា តាមរយៈការបង្កើតយន្តការ គ.ប.ឆ.ប ដែលមានសមាសភាពពីក្រសួង ស្ថាប័ន និងអាជ្ញាធរពាក់ព័ន្ធ។ ក្រោយការបង្កើត គ.ប.ឆ.ប. កម្ពុជាបានធ្វើការស្រាវជ្រាវស៊ើបអង្កេត បង្រ្កាប និងបោសសម្អាត ព្រមទាំងអនុវត្តវិធានការច្បាប់លើទីតាំង និងជនសង្ស័យ។  ឯកឧត្តមសន្តិបណ្ឌិតក៏បានគូសបញ្ជាក់អំពីភាពចាំបាច់នៃការពង្រឹង និងពង្រីកកិច្ចសហប្រតិបត្តិការជាមួយភាគីពាក់ព័ន្ធ ក្នុងប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា។

ជាមួយគ្នានេះ ណលោកស្រី Julia Stevens បានបង្ហាញក្តីរីករាយចំពោះឱកាសជួបពិភាក្សាការងារនាពេលនេះ ដើម្បីពិនិត្យលទ្ធភាពស្វែងរកកិច្ចសហប្រតិបត្តិការជាមួយកម្ពុជា លើបញ្ហាប្រឈមរួមមួយចំនួន រួមទាំងការឆបោកតាមប្រព័ន្ធបច្ចេកវិទ្យា ផងដែរ។ លោកស្រី Julia Stevens បានវាយតម្លៃខ្ពស់ និងទទួលស្គាល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា កន្លងមក និងបានបង្ហាញបំណងធ្វើការជាមួយកម្ពុជាក្នុងនាមជាដៃគូកិច្ចសហប្រតិបត្តិការ៕

ដោយ៖ រិទ្ធី