AKP ភ្នំពេញ ថ្ងៃទី២៤ ខែកក្កដា ឆ្នាំ២០២៥ -- មន្រ្តីឧទ្យានុរក្សមកពីខេត្តបាត់ដំបង ប៉ៃលិន ពោធិ៍សាត់ និងកំពង់ឆ្នាំង ចំនួន២០នាក់ បានចូលរួមពិគ្រោះយោបល់ ដើម្បីពង្រឹងសមត្ថភាពបន្ថែម ស្តីពីការប្រើប្រាស់រូបភាពផ្កាយរណប សម្រាប់គាំទ្រការងារតាមដាន និងវាយតម្លៃការកាប់រានដីព្រៃឈើ និងសេចក្តីព្រាងផែនការពង្រឹង ការអនុវត្តច្បាប់នៅតំបន់ការពារធម្មជាតិ។

លោក ឯក ម៉ែនរិទ្ធ អនុប្រធាននាយកដ្ឋានសេវាកម្មព័ត៌មានភូមិសាស្រ្តនៃអគ្គនាយកដ្ឋានចំណេះដឹង និងព័ត៌មានបរិស្ថាន បានឱ្យដឹងថា កិច្ចប្រជុំនេះត្រូវបានរៀបចំឡើងរយៈពេល៤ថ្ងៃ ចាប់ពីថ្ងៃទី២៣ ដល់ថ្ងៃទី២៦ ខែកក្កដា ឆ្នាំ២០២៥ នៅទីរួមខេត្តបាត់ដំបង ហើយឯកសារទាំងនេះនឹងបម្រើជាមូលដ្ឋាន សម្រាប់រៀបចំកម្មវិធីបណ្តុះបណ្តាល ដែលផ្តោតលើជំនាញជាក់ស្តែង សម្រាប់មន្ត្រីឧទ្យានុរក្ស និងមន្ត្រីបរិស្ថាន នៅពេលខាងមុខ។

ឯកឧត្តម ខ្វៃ អាទិត្យា អនុរដ្ឋលេខាធិការក្រសួងបរិស្ថាន បានថ្លែងថា ក្នុងរយៈពេល៤ថ្ងៃ សិក្ខាកាមបានស្វែងយល់ពីសារៈសំខាន់ នៃការប្រើប្រាស់រូបភាពផ្កាយរណប បច្ចេកវិទ្យា Remote Sensing និងការប្រើប្រាស់ដ្រូន DJI Mavic Air 3S ដែលផ្តល់ជូន ដោយឯកឧត្តមបណ្ឌិត អ៊ាង សុផល្លែត ដើម្បីជួយជំរុញការអភិរក្សធម្មជាតិ ជាបច្ចេកវិទ្យា ធ្វើការបំពេញគ្នាទៅវិញទៅមក ដើម្បីបង្កើនប្រសិទ្ធភាព និងសុវត្ថិភាពក្នុងការល្បាត និងអនុវត្តច្បាប់។ រូបភាពផ្កាយរណប បានផ្តល់ទិន្នន័យទ្រង់ទ្រាយធំ ដែលអនុញ្ញាតឱ្យយើង តាមដានការបាត់បង់គម្របព្រៃឈើ និងការប្រែប្រួលបរិស្ថាន នៅទូទាំងតំបន់ការពារធម្មជាតិ ដែលគ្របដណ្តប់ផ្ទៃដីជាង៧លានហិកតា។ 

ឯកឧត្តមបានបន្ថែមថា ទិន្នន័យផ្កាយរណបអាចបង្ហាញពីតំបន់ដែលមានហានិភ័យខ្ពស់នៃការកាប់រាន ឬបទល្មើសធនធានធម្មជាតិ។ ដោយឡែក បច្ចេកវិទ្យា Remote Sensing ជួយវិភាគទិន្នន័យទាំងនេះ ដើម្បីកំណត់និន្នាការនៃការកាប់រាន ការរំលោភដីធ្លី ឬការគំរាមកំហែងដល់ជីវចម្រុះ ដូចជាការបាត់បង់ ទីជម្រករបស់សត្វកម្រ ដែលជួយឱ្យមន្ត្រី អាចរៀបចំផែនការល្បាតបានត្រឹមត្រូវ។ ជាមួយគ្នានេះ ប្រសិនបើទិន្នន័យផ្កាយរណប បង្ហាញពីការកាប់រាននៅតំបន់ជាក់លាក់មួយ ដ្រូនអាចត្រូវបានបញ្ជូន ទៅស្កែនតំបន់នោះ ដើម្បីចាប់យករូបភាព និងវីដេអូលម្អិត ដែលបង្ហាញពីសកម្មភាពខុសច្បាប់ ឬស្ថានភាពនៅកន្លែងសង្ស័យ។

អ្នកនាំពាក្យក្រសួងបរិស្ថានបានបញ្ជាក់ថា ការគាំទ្រពង្រឹងសមត្ថភាពមន្រ្តីឧទ្យានុរក្សលើការប្រើប្រាស់បច្ចេកវិទ្យាថ្មីនេះ បានបង្ហាញពីការប្តេជ្ញាចិត្តរបស់ក្រសួងបរិស្ថាន ក្នុងការការពារជីវចម្រុះ និងទប់ស្កាត់បទល្មើសធនធានធម្មជាតិ។ បច្ចេកវិទ្យាទាំងនេះធ្វើការរួមគ្នា ដើម្បីបង្កើតប្រព័ន្ធត្រួតពិនិត្យ និងអនុវត្តច្បាប់ប្រកបដោយប្រសិទ្ធភាព ដែលជួយកាត់បន្ថយហានិភ័យសម្រាប់មន្ត្រីឧទ្យានុរក្ស និងបង្កើនប្រសិទ្ធភាពនៃការល្បាត។

សូមបញ្ជាក់ថា កិច្ចប្រជុំពិគ្រោះយោបល់ស្តីពីមេរៀនបច្ចេកទេស ការប្រើប្រាស់រូបភាពផ្កាយរណប សម្រាប់គាំទ្រ ដល់ការងារ តាមដាន និងវាយតម្លៃការកាប់រានដី ព្រៃឈើ និងសេចក្តីព្រាងផែនការពង្រឹងការអនុវត្តច្បាប់ នៅតាមតំបន់ការពារធម្មជាតិ ជាសកម្មភាពទី១.៣ នៃគម្រោង“ការពង្រឹងសមត្ថភាព សម្រាប់ការអនុវត្តផែនការយុទ្ធសាស្ត្រ គ្រប់គ្រងតំបន់ការពារធម្មជាតិ និងក្របខណ្ឌរេដបូក” នៃកិច្ចសហប្រតិបត្តិការមេគង្គ-ឡានឆាង ដែលគ្រប់គ្រងដោយ ក្រសួងបរិស្ថាន ដែលមានគោលបំណងកាត់បន្ថយ ការសឹករេចរិលព្រៃឈើ ពង្រឹងកិច្ចសហប្រតិបត្តិការក្នុងតំបន់ និងលើកកម្ពស់ប្រសិទ្ធភាព នៃការអនុវត្តផែនការយុទ្ធសាស្ត្រ គ្រប់គ្រងតំបន់ការពារជាតិ និងកម្មវិធីរេដបូក៕

ដោយ ទេស ច័ន្ទសុធារី (ប្រភព៖ ក្រសួងបរិស្ថាន)