AKP តាកែវ ថ្ងៃទី២៤ ខែកក្កដា ឆ្នាំ២០២៥-- លោក កង អាណាន់ អភិបាលនៃគណៈអភិបាលក្រុងដូនកែវ និងជាប្រធានគណៈបញ្ជាការឯកភាពរដ្ឋបាលក្រុងដូនកែវ បានចុះជួបសំណេះសំណាល និងអប់រំផ្សព្វផ្សាយដល់សិស្សានុសិស្សនៃសាលារៀនសុវណ្ណភូមិតាកែវ ស្ថិតនៅក្នុងភូមិឡូរី សង្កាត់រកាក្នុង ក្រុងដូនកែវ ខេត្តតាកែវ ស្តីពីគោលនយោបាយ ភូមិ ឃុំ សង្កាត់ មានសុវត្ថិភាព ពិសេសច្បាប់ចររាចរណ៍ផ្លូវគោក បញ្ហាគ្រឿងញៀន បញ្ហាក្មេងទំនើង និងអនាម័យបរិស្ថាន កាលពីព្រឹកថ្ងៃទី២៣ ខែកក្កដា ឆ្នាំ២០២៥ ដោយមានការអញ្ជើញចូលរួមពីអភិបាលរងក្រុងដូនកែវ មន្ត្រីរាជការ កងកម្លាំងប្រដាប់អាវុធ ចំណុះរដ្ឋបាលក្រុងដូនកែវ លោកគ្រូអ្នកគ្រូ សិស្សានុសិស្ស សាលារៀនសុវណ្ណភូមិតាកែវ ចូលរួមយ៉ាងច្រើនកុះករ។

មានប្រសាសន៍សំណេះសំណាលក្នុងពិធីនោះ លោក កង អាណាន់ បានលើកឡើងអំពីចំណុចសំខាន់ៗដែលតម្រូវឱ្យប្អូនៗ កូន ក្មួយ អនុវត្ត ដើម្បីក្លាយខ្លួនជាកូនល្អ សិស្សល្អ មិត្តល្អ និងជាទំពាំងស្នងឫស្សីដែលមានគុណភាព និងសមត្ថភាពខ្ពស់។ ការអប់រំផ្សព្វផ្សាយនូវច្បាប់ចររាចរណ៍ផ្លូវគោក ក្នុងគោលបំណងដើម្បីផ្តល់នូវចំណេះដឹងបន្ថែមស្តីពីសុវត្ថិភាពចរាចរណ៍ដល់អ្នកប្រើប្រាស់ផ្លូវ ជាពិសេសក្មួយៗសិស្សានុសិស្ស ដែលស្ថិតក្នុងវ័យប្រើប្រាស់កង់ឬម៉ូតូ ជាមធ្យោបាយធ្វើដំណើរ និងជាជនងាយរងគ្រោះថ្នាក់ដោយសារគ្រោះថ្នាក់ចរាចរណ៍។ឱ្យមានការយល់ដឹងកាន់តែច្បាស់ ក៏ដូចជាការពញ្ញាក់ស្មារតី ឱ្យមានការប្រុងប្រយ័ត្ននិងចូលរួមគោរពច្បាប់ចរាចរណ៍ទាំងអស់គ្នាឱ្យបានខ្ជាប់ខ្ជួន។ បញ្ហាគ្រឿងញៀនជាបញ្ហារបស់យើងទាំងអស់គ្នា ត្រូវរួមគ្នាប្រយុទ្ធប្រឆាំង មិនត្រូវគិតថាកិច្ចការទាំងអស់នេះជាភារកិច្ចផ្តាច់មុខរបស់កម្លាំងមានសមត្ថកិច្ចតែម្នាក់ឯងនោះឡើយ  គឺទាមទារឱ្យមានការចូលរួមពីគ្រប់បណ្តាភាគីពាក់ព័ន្ធ អាជ្ញាធរមូលដ្ឋាន លោកគ្រូ អ្នកគ្រូ អាណាព្យាបាល ពិសេសប្អូនៗសិស្សានុសិស្សខ្លួនឯងតែម្តង ព្រោះថា គ្រឿងញៀនខុសច្បាប់និងគ្រឿងស្រវឹងអាច បណ្ដាលឱ្យមានគ្រោះថ្នាក់ដល់សុខភាពនិង អាយុជីវិត បំផ្លាញអនាគតយុវជននិងភាគីពាក់ព័ន្ធផងដែរ។ក្នុ ងចំណោមគ្រឿងញៀនគ្រប់ប្រភេទ ប្រភេទបារីអេឡិចត្រូនិក (E-Cigarette-Vape) កំពុងបញ្រ្ជាបខ្លួនយ៉ាងខ្លាំងក្នុងចំណោមសិស្សានុសិស្ស ដែលអាចបង្កគ្រោះថ្នាក់ធ្ងន់ធ្ងរដល់សុខភាព ដូចជាបង្កជំងឺមហារីក បង្កើនហានិភ័យជំងឺបេះដូង ជំងឺសួត ធ្វើឱ្យខួរក្បាលមានដំណើរការមិនប្រក្រតីក្នុងអំឡុងពេលប្រើប្រាស់ និងប៉ះពាល់យូរអង្វែងដល់ការលូតលាស់ខួរក្បាលរបស់កុមារ និងយុវវ័យ ព្រមទាំងបង្កអន្តរាយដល់រាងកាយ។

លោក កង អាណាន់ បានមានប្រសាសន៍បន្ថែមទៀតថា បញ្ហាក្មេងទំនើងក្នុងសាលា ក្រុមការងារនៃគណៈបញ្ជាការឯកភាពក្រុងនឹងចុះកំណត់មុខសញ្ញាក្មេងទំនើងឱ្យបានច្បាស់លាស់ ការពារ និងចៀសវាងជនទាំងនោះបង្កផលប៉ះពាល់គ្រោះថ្នាក់ដល់អ្នកដទៃ។ ត្រូវកោះហៅមកអប់រំណែនាំ និងពិនិត្យសារធាតុញៀន ព្រមទាំងអនុវត្តច្បាប់លើជននោះផងដែរ។ ចំណែកអនាម័យបរិស្ថានត្រូវបញ្រ្ជាបចំណេះដឹង និងចំណេះធ្វើ ក្នុងចំណោមកុមារ សិស្សានុសិស្ស និងយុវជន នៅតាមសាលារៀននិងគ្រឹះស្ថានអប់រំ ដែលជាកន្លែងប្រមូលផ្តុំមានលក្ខណៈងាយស្រួលក្នុងការផ្លាស់ប្តូរទម្លាប់ ផ្នត់គំនិត និងឥរិយាបថរបស់កុមារ និងយុវជន សំដៅធ្វើឱ្យប្រសើរឡើងនូវកិច្ចគាំពារបរិស្ថាន ការការពារធនធានធម្មជាតិ ការអភិរក្សជីវៈចម្រុះ និងការរស់នៅប្រកបដោយចីរភាព៕

ដោយ អ៊ុច សៀង