AKP សៀមរាប ថ្ងៃទី២៣ ខែកក្កដា ឆ្នាំ២០២៥

បន្ទាប់ពីសន្និសីទកំពូលស្ដីពីប្រព័ន្ធផ្សព្វផ្សាយអាស៊ីលើកទី២០ ត្រូវបានបិទបញ្ចប់នោះ ឯកឧត្ដម នេត្រ ភក្រ្ដា រដ្ឋមន្រ្ដីក្រសួងព័ត៌មានបានមានប្រសាសន៍ស្នើឱ្យសន្និសីទកំពូលស្ដីពីប្រព័ន្ធផ្សព្វផ្សាយអាស៊ី បង្កើតក្រុមការងារថ្នាក់តំបន់ ស្តីពីសុចរិតភាពព័ត៌មាន ដែលមានភារកិច្ចបង្កើតគោលការណ៍ណែនាំ ជំរុញកិច្ចសហប្រតិបត្តិការ និងរៀបចំផែនទីបង្ហាញផ្លូវរួមដែលត្រូវពិនិត្យនៅក្នុងសន្និសីទកំពូលប្រព័ន្ធផ្សព្វផ្សាយអាស៊ីលើកទី ២១ ឆ្នាំ២០២៦ ខណៈយន្តការនេះ នឹងធានាថាការប្តេជ្ញាចិត្តរបស់យើងក្លាយជាសកម្មភាព ហើយសកម្មភាពរបស់យើងក្លាយជាផលប៉ះពាល់។ ការស្នើសុំរបស់ឯកឧត្ដមរដ្ឋមន្រ្ដីបែបនេះ ក្នុងឱកាសបិទសន្និសីទកំពូលប្រព័ន្ធផ្សព្វផ្សាយអាស៊ីលើកទី ២០ ឆ្នាំ២០២៥ នៅខេត្ដសៀមរាប នារសៀលថ្ងៃទី២៣ ខែកក្កដា ឆ្នាំ២០២៥។

ឯកឧត្ដម នេត្រ ភក្រ្ដា បានថ្លែងថា ប្រទេសជាសមាជិករបស់យើងនិយាយដោយសំឡេងតែមួយប្រឆាំងនឹងការបោកបញ្ឆោតនៃការពិត ហើយ ធានាថាប្រជាពលរដ្ឋរបស់យើង មិនថាពួកគេរស់នៅទីណាទេ អាចពឹងផ្អែកលើប្រព័ន្ធផ្សព្វផ្សាយដើម្បីជូនដំណឹងមិនមែនដើម្បីទទួលបានព័ត៌មានមិនពិត ឬបំភាន់នោះទេ។ ឯកឧត្ដមរដ្ឋមន្រ្ដីបានបញ្ជាក់ថា ប្រធានបទនៃកិច្ចប្រជុំកំពូលឆ្នាំនេះ មិនត្រឹមតែឆ្លុះបញ្ចាំងពីការវិវត្តរបស់ AMS ពីរទសវត្សរ៍ប៉ុណ្ណោះទេ ប៉ុន្តែថែមទាំងបញ្ជាក់ឡើងវិញនូវការប្តេជ្ញាចិត្តរួមគ្នារបស់យើងក្នុងការពង្រឹងតួនាទីរបស់ប្រព័ន្ធផ្សព្វផ្សាយក្នុងការកសាងសង្គមដែលទទួលបាននូវព័ត៌មាន ធន់ និងរួមបញ្ចូលនៅទូទាំងតំបន់អាស៊ី។ ឯកឧត្ដមបានបន្ដថា ក្នុងអំឡុងពេលនៃកិច្ចប្រជុំកំពូលនេះ សមាជិកទាំងអស់បានធ្វើការពិភាក្សាប្រកបដោយខ្លឹមសារ និងស្ថាបនា ដែលបានដាក់ចេញនូវបញ្ហាប្រឈមសំខាន់ៗដែលកំពុងប្រឈមមុខនឹងវិស័យប្រព័ន្ធផ្សព្វផ្សាយរបស់យើងនៅក្នុងយុគសម័យនៃការផ្លាស់ប្តូរឌីជីថលយ៉ាងឆាប់រហ័ស។ ឯកឧត្ដមរដ្ឋមន្រ្ដីក៏បានរំលេចពីការកើនឡើងនៃព័ត៌មានមិនពិត រហូតដល់ការលុបបំបាត់ការជឿទុកចិត្តរបស់សាធារណជនលើប្រព័ន្ធផ្សព្វផ្សាយបែបប្រពៃណី យើងមិនបានគេចចេញពីការប្រឈមមុខនឹងបញ្ហាលំបាកនោះទេ ផ្ទុយទៅវិញ យើងបានទទួលយកការទទួលខុសត្រូវក្នុងការចូលរួមជាមួយពួកគេដោយតម្លាភាព និងដំណោះស្រាយ។

ជាមួយគ្នានេះ ឯកឧត្ដមរដ្ឋមន្រ្ដីសង្ឃឹមថា ពេលដែលកិច្ចប្រជុំកំពូលនេះបានបញ្ចប់ទៅដោយជោគជ័យ ជាមួយនឹងការយល់ដឹងកាន់តែស៊ីជម្រៅ ការប្តេជ្ញាចិត្តជាថ្មី និងយុទ្ធសាស្រ្តច្បាស់លាស់ជាងមុន ដើម្បីពង្រឹងមូលដ្ឋានគ្រឹះនៃស្ថាប័នប្រព័ន្ធផ្សព្វផ្សាយ និងតំណាងប្រព័ន្ធផ្សព្វផ្សាយ។ ឯកឧត្ដមបានលើកឡើងផងដែរថា៖ «អ្វីដែលយើងបានកសាងនៅទីនេះ គឺមានច្រើនជាងការប្រជុំ តែវាគឺជាការប្រកាសពីចេតនា ទស្សនៈវិស័យរួម និងសម្ព័ន្ធភាពជាថ្មី។ នៅក្នុងពិភពលោកដែលកាន់តែមានទំនាក់ទំនងគ្នា និងស្មុគ្រស្មាញកាន់តែច្រើនឡើងៗពីមួយថ្ងៃទៅមួយថ្ងៃ ការពិត និងទំនុកចិត្តគឺជារូបិយបណ្ណដ៏មានតម្លៃបំផុតរបស់យើង»។ 

ក្នុងឱកាសនោះដែរ ឯកឧត្ដម នេត្រ ភក្រ្ដា រដ្ឋមន្រ្ដីក្រសួងព័ត៌មានគូសបញ្ជាក់បន្ថែមទាក់ទងនឹងព័ត៌មានក្លែងក្លាយមិនមែនគ្រាន់តែជាការរំខាននោះទេ វាគឺជាគ្រោះថ្នាក់ ដែលគ្រោះថ្នាក់ដល់ការរួបរួមសង្គម សុខភាពសាធារណៈ សន្តិភាព ស្ថិរភាព និងដំណើរការប្រជាធិបតេយ្យ ហើយដោយសារតែបញ្ហាប្រឈមនេះមិនស្គាល់ព្រំដែន ដំណោះស្រាយរបស់យើងក៏ត្រូវតែគ្មានព្រំដែនផងដែរ ដែលត្រូវបានបង្កើតឡើងដោយសាមគ្គីភាព ការសម្របសម្រួល និងសកម្មភាពរួម។ លើសពីនេះ ឯកឧត្ដមបានធ្វើការចែករំលែក និងការប្តេជ្ញាចិត្តយ៉ាងមុតមាំរបស់កម្ពុជា ចំពោះកិច្ចខិតខំប្រឹងប្រែងក្នុងការប្រយុទ្ធប្រឆាំងព័ត៌មានក្លែងក្លាយនេះ ដោយនៅក្នុងខែមេសាឆ្នាំនេះ ក្រសួងព័ត៌មានបានចាប់ផ្តើមយុទ្ធនាការ "និយាយថាទេចំពោះព័ត៌មានក្លែងក្លាយ" ដែលជាគំនិតផ្តួចផ្តើមពីភាគីពាក់ព័ន្ធជាច្រើនក្នុងគោលបំណងអប់រំសាធារណជន បណ្តុះបណ្តាលអ្នកជំនាញផ្នែកប្រព័ន្ធផ្សព្វផ្សាយ ការផ្តល់សិទ្ធិអំណាចដល់យុវជន និងលើកកម្ពស់ភាពជឿជាក់នៃព័ត៌មាន។

ឯកឧត្ដមរដ្ឋមន្រ្ដីជឿជាក់ថា៖ «គំរូនេះអាចត្រូវបានកែសម្រួល ចែករំលែក និងពង្រឹងនៅទូទាំងតំបន់អាស៊ីប៉ាស៊ីហ្វិកសម្រាប់ប្រព័ន្ធផ្សព្វផ្សាយ ហើយយើងត្រៀមខ្លួនរួចជាស្រេចដើម្បីធ្វើការរួមគ្នាជាមួយរដ្ឋភាគីជាសមាជិករបស់យើង ដើម្បីលើកកម្ពស់កិច្ចសហប្រតិបត្តិការក្នុងតំបន់ក្នុងការប្រយុទ្ធប្រឆាំងព័ត៌មានក្លែងក្លាយនេះ»៕

ដោយ៖ រិទ្ធី