AKP ភ្នំពេញ ថ្ងៃទី២៣ ខែកក្កដា ឆ្នាំ២០២៥--
ឯកឧត្តម Nguyen Minh Vu ឯកអគ្គរដ្ឋទូតសាធារណរដ្ឋសង្គមនិយមវៀតណាមប្រចាំកម្ពុជាបានថ្លែងបញ្ជាក់ថា វៀតណាមសូមគាំទ្ររាជរដ្ឋាភិបាលកម្ពុជាក្នុងការបង្រ្កាប បោសសម្អាត និងទប់ស្កាត់ឧក្រិដ្ឋកម្មឆ្លងដែន ហើយក៏សូមវាយតម្លៃខ្ពស់ចំពោះកិច្ចប្រឹងប្រែង និងលទ្ធផលដែលកម្ពុជាសម្រេចបាន ក្នុងការប្រយុទ្ធប្រឆាំងឧក្រិដ្ឋកម្មឆ្លងដែននេះ។ ការលើកឡើងរបស់ឯកឧត្ដម ឯកអគ្គរដ្ឋទូតបែបនេះ ក្នុងកាសជួបសម្តែងការគួរសម និងពិភាក្សាការងារជាមួយឯកឧត្តមសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) បាន នាព្រឹកថ្ងៃទី២៣ ខែកក្កដា ឆ្នាំ២០២៥ ។

ក្នុងជំនួបនោះ ឯកឧត្តមសន្តិបណ្ឌិត ឆៃ ស៊ីណារិទ្ធ បានគូសបញ្ជាក់ពីការប្តេជ្ញាចិត្តខ្ពស់របស់រាជរដ្ឋាភិបាលក្នុងការបោសសម្អាតការឆបោកតាមប្រព័ន្ធបច្ចេកវិទ្យា តាមរយៈការបង្កើតយន្តការ គ.ប.ឆ.ប ដែលមានសមាសភាពពីក្រសួង ស្ថាប័ន និងអាជ្ញាធរពាក់ព័ន្ធ។ ឯកឧត្តមសន្តិបណ្ឌិតបានលើកឡើងថា គ.ប.ឆ.ប គឺជាយន្តការបំពេញបន្ថែមលើយន្តការមានស្រាប់របស់ក្រសួងមហាផ្ទៃ អគ្គស្នងការដ្ឋាននគរបាលជាតិ និងគណៈបញ្ជាការឯកភាពរដ្ឋបាលរាជធានី ខេត្ត។ ក្រោយការបង្កើត គ.ប.ឆ.ប. កម្ពុជាបានធ្វើការស្រាវជ្រាវស៊ើបអង្កេត បង្រ្កាប និងបោសសម្អាត ព្រមទាំងអនុវត្តវិធានការច្បាប់លើទីតាំងសង្ស័យ។  
ឯកឧត្តមសន្តិបណ្ឌិតក៏បានជម្រាបជូនពីលទ្ធផលនៃប្រតិបត្តិការនាពេលថ្មីៗនេះ និងបានបញ្ជាក់អំពីភាពចាំបាច់នៃការពង្រឹង និងពង្រីកកិច្ចសហប្រតិបត្តិការរវាងភាគីពាក់ព័ន្ធដើម្បីប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា។

ឯកឧត្តមឯកអគ្គរដ្ឋទូតវៀតណាមបានលើកឡើងថា ការឆបោកតាមប្រព័ន្ធបច្ចេកវិទ្យាមិនមែនជាបញ្ហាថ្មីទេ បញ្ហានេះបានកើតឡើងមិនមែនតែនៅកម្ពុជាទេ គឺមាននៅប្រទេសផ្សេងជាច្រើនទៀត ហើយឯកឧត្តមបានគាំទ្រ១០០% លើកិច្ចសហប្រតិបត្តិការបង្រ្កាបការឆបោកតាមប្រព័ន្ធបច្ចេកវិទ្យា និងត្រៀមលក្ខណៈជួយទាំងការទប់ស្កាត់ និងការស្រាវជ្រាវស៊ើបអង្កេតក្នុងករណីមានសំណូមពរ។ លើសពីនេះ ឯកឧត្តមផ្ទាល់ក៏បានចូលរួមក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យានេះដែរ និងបានកត់សម្គាល់ថា ឧក្រិដ្ឋជនតែងបានរត់ពីប្រទេសមួយ ទៅប្រទេសមួយ។ 

ឯកឧត្តមឯកអគ្គរដ្ឋទូតក៏បានថ្លែងអំណរគុណចំពោះរាជរដ្ឋាភិបាលកម្ពុជា ចំពោះកិច្ចសហប្រតិបត្តិការក្នុងវិស័យសន្តិសុខ កន្លងមក។ 
ជាមួយគ្នានេះ ភាគីទាំងពីរបានពិភាក្សាលើកិច្ចសហប្រតិបត្តិការរវាងប្រទេសទាំងពីរ នាពេលកន្លងមក និងបានផ្លាស់ប្តូរទស្សនៈចំពោះវិធានការបន្ទាប់ សំដៅជំរុញកិច្ចសហប្រតិបត្តិការកាន់តែជិតស្និទ្ធថែមទៀត ក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា រួមទាំងការចែករំលែកព័ត៌មាន និងការសម្របសម្រួលបញ្ជូនពលរដ្ឋវៀតណាមពាក់ព័ន្ធ ត្រលប់ទៅមាតុប្រទេសវិញ៕

ដោយ៖ រិទ្ធី