AKP ភ្នំពេញ ថ្ងៃទី២៣ ខែកក្កដា ឆ្នាំ២០២៥-- ឯកឧត្តមបណ្ឌិត អាន ពេជ្រ ហត្ថដា រដ្ឋលេខាធិការក្រសួងធនធានទឹក និងឧតុនិយម បានអញ្ជើញជួបប្រតិភូនៃវិទ្យាស្ថានសិក្សា និងអភិវឌ្ឍន៍សកល តំណាងមជ្ឈមណ្ឌលអូស្ត្រាលីសម្រាប់ការស្រាវជ្រាវកសិកម្មអន្តរជាតិ ដើម្បីពិភាក្សាការងារ និងផ្ដល់អនុសាសន៍លើវិសាលភាពនៃគម្រោងសិក្សាសម្រាប់ស្រាវជ្រាវការវិនិយោគដែលមានសក្តានុពល ដើម្បីគាំទ្រដល់ប្រព័ន្ធកសិកម្មធន់ និងបម្រែបម្រួលបរិស្ថាន នៅទីស្ដីការក្រសួង នាថ្ងៃពុធ ទី២៣ ខែកក្កដា ឆ្នាំ២០២៥។

មជ្ឈមណ្ឌលអូស្ត្រាលីសម្រាប់ការស្រាវជ្រាវកសិកម្មអន្តរជាតិតាមរយៈវិទ្យាស្ថានសិក្សា និងអភិវឌ្ឍន៍សកល មានបំណងពង្រីកសកម្មភាពដោយផ្តល់មូលនិធិដល់ដៃគូស្រាវជ្រាវដែលគាំទ្រការអភិវឌ្ឍកសិកម្មប្រកបដោយនិរន្តរភាពនៅក្នុងប្រទេសដៃគូ រួមទាំងប្រទេសកម្ពុជាផងដែរ។ មជ្ឈមណ្ឌលគាំទ្រអ្នកវិទ្យាសាស្ត្រ អ្នកស្រាវជ្រាវ និងស្ថាប័ននានានៅក្នុងប្រទេសដៃគូ ដើម្បីស្វែងរកដំណោះស្រាយជាក់ស្តែង និងផ្អែកលើវិទ្យាសាស្ត្រចំពោះបញ្ហារួមគ្នាក្នុងវិស័យកសិកម្ម។

ឯកឧត្តមបណ្ឌិតរដ្ឋលេខាធិការបានសម្ដែងការស្វាគមន៍យ៉ាងកក់ក្តៅ និងបង្ហាញនូវចំណាប់អារម្មណ៍ ព្រមទាំងបានផ្តល់ជាអនុសាសន៍មួយចំនួនទាក់ទងទៅនឹងការកំណត់នូវបញ្ហាអាទិភាពក្នុងការស្រាវជ្រាវ និងវិសាលភាពនៃការសិក្សា ដោយបញ្ចូលបច្ចេកទេសដែលមានប្រសិទ្ធភាពនៃការប្រើប្រាស់ទឹកក្នុងការអនុវត្តការដាំដុះ។ បន្ទាប់មកក៏បានស្តាប់ការសង្ខេបអំពីបទពិសោធន៍នៃការអនុវត្តគម្រោងសិក្សាស្រាវជ្រាវរបស់មជ្ឈមណ្ឌល ដែលទទួលជោគជ័យនៅក្នុងប្រទេសមួយចំនួនក្នុងអាស៊ីខាងត្បូង និងអាស៊ីអាគ្នេយ៍។

ឯកឧត្តមបណ្ឌិតបានថ្លែងអំណរអរគុណដល់តំណាងមជ្ឈមណ្ឌល និងរំពឹងទុកថាលទ្ធផលនៃការសិក្សាអាចរួមចំណែកក្នុងការអភិវឌ្ឍវិស័យកសិកម្មនាពេលអនាគត ដើម្បីធានាសុវត្ថិភាពស្បៀងនៅកម្ពុជា៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក)