AKP សៀមរាប ថ្ងៃទី២៣ ខែ កក្កដា ឆ្នាំ ២០២៥--
ដោយសារនាពេលបច្ចុប្បន្ននេះបណ្តាញសារព័ត៌មានបែបប្រពៃណីកំពុងត្រូវបានប្រឈមទៅនឹងបញ្ហាធ្លាក់ចុះចំណូលប្រចាំថ្ងៃ និងមួយចំនួនត្រូវប្រឈមនឹងបិទទ្វារជាបន្ដបន្ទាប់នោះ ក្រសួងព័ត៌មានបាននិងកំពុងជំរុញឱ្យសារព័ត៌ទាំងនោះ ពង្រឹងសមត្ថភាព ហើយត្រូវឈោងចាប់មកវិញនូវការផ្សព្វផ្សាយបែបឌីជីថល។ នេះគឺជាការថ្លែងបញ្ជាក់របស់ឯកឧត្ដម ស្លេះ អាល់ហ្វីន អនុរដ្ឋលេខាធិការក្រសួងព័ត៌មាន ក្នុងបទបង្ហាញក្រោមប្រធានបទ ស្ដីពី យុទ្ធសាស្រ្ដក្នុងការធានាប្រកបដោយចីរភាពរបស់ប្រព័ន្ធផ្សព្វផ្សាយបែបប្រពៃណី នារសៀលថ្ងៃទី២៣ ខែកក្កដា ឆ្នាំ២០២៥ ក្នុងសន្និសីទកំពូលស្តីពី ប្រព័ន្ធផ្សព្វផ្សាយអាស៊ីលើកទី២០ (20th Asia Media Summit) នៅខេត្តសៀមរាប។ 

ឯកឧត្ដម ស្លេះ អាល់ហ្វីន បានលើកឡើងពីការធ្លាក់ចុះនៃបណ្តាញសារព័ត៌មានប្រពៃណី ដោយសារចំនួនអតិថិជនថមថយចុះ ដែលទាំងនេះព្រោះតែការផ្លាស់ប្តូរនៃការប្រើប្រាស់របស់ប្រជាពលរដ្ឋទៅតាមបរិបទនៃសង្គមដោយសារពេលបច្ចុប្បន្ននេះអ្នកប្រើប្រាស់ភាគច្រើនបានផ្លាស់ប្តូរទៅប្រើប្រាស់បណ្តាញសង្គម។ ឯកឧត្ដមបញ្ជាក់ថា ផ្តើមចេញពីការការផ្លាស់ប្តូររបស់ប្រជាពលរដ្ឋជាអតិថិជននេះហើយ បានធ្វើឱ្យចំណូលរបស់គេធ្លាក់ចុះទៅតាមនោះដែរ។ ក្រៅពីនេះ ព្រោះតែការធ្លាក់ចុះនៃអតិថិជនក៏បានធ្វើឱ្យគុណភាពនៃប្រព័ន្ធផ្សព្វផ្សាយប្រពៃណីក៏ធ្លាក់ចុះដែរ ដែលចំណុចទាំងអស់នេះហើយ ធ្វើឱ្យការទទួលបានព័ត៌មានក៏ថយចុះទៅតាមនោះដូចគ្នា។ ឯកឧត្តមអនុរដ្ឋលេខាធិការបានបញ្ជាក់បន្ថែមថា៖ «ដើម្បីរក្សាបាន សិទ្ធទទួលបានព័ត៌មានក្រសួងព័ត៌មានបានកំពុងខិតខំពង្រឹងសារព័ត៌មានរបស់រដ្ឋ ដោយធ្វើយ៉ាងណាឱ្យគ្របដណ្តប់បានទូលំទូលាយ ការផ្សព្វផ្សាយប្រកបដោយគុណភាព ក៏ដូចជាធ្វើយ៉ាងណាឱ្យប្រជាពលរដ្ឋទទួលបានព័ត៌មាន មានគុណភាព ដើម្បីជួយឱ្យប្រជាពលរដ្ឋអាចសម្រេចចិត្តបានត្រឹមត្រូវ ដោយប្រើប្រាស់ព័ត៌មានពិត ព័ត៌មានត្រឹមត្រូវ»។

បើតាម ឯកឧត្ដម ស្លេះ អាល់ហ្វីន ក្នុងបទបង្ហាញនេះក៏បានផ្តល់នូវយុទ្ធសាស្រ្តមួយចំនួនដែលក្រសួងព័ត៌មានបានផ្តួចផ្តើម ដោយក្នុងនេះដូចជាជួយដល់អ្នកសារព័ត៌មានពិនិត្យសុខភាពបញ្ចុះតម្លៃ ៣០ភាគរយ ក្រសួងបានធ្វើអនុស្សរណៈយោគយល់ជាមួយមជ្ឈមណ្ឌលប៊ីយ៉ូម៉េតជាដើម។ ក្រៅពីនេះ ក៏មានការផ្តល់ជូនប្រឹក្សាដោយឥតគិតថ្លៃជាមួយមេធាវីតាមសំណើររបស់អ្នកសារព័ត៌មាន ក្នុងការផ្តល់ជូនការបណ្តុះបណ្តាលផ្សេងៗដោយឥតគិតថ្លៃ ក៏ដូចជាផ្តល់វាគ្មិន សម្ភារផ្សេងៗសម្រាប់ជូនទៅដល់សមាគមន៍អ្នកសារព័ត៌មាន និងអ្នកសារព័ត៌មាន ការមិនយកថ្លៃការចុះបញ្ជីពាណិជ្ជកម្ម ហើយក្រៅពីនេះក៏មានការលុបចោលនូវរាល់បំណុលនានាកន្លងមករបស់អ្នកសារព័ត៌មានជាដើម។
 ឯកឧត្ដមអនុរដ្ឋលេខាធិការក្រសួងព័ត៌មានក៏បានអះអាងបន្ថែមថា៖ «ទាំងនេះគឺជាការលើកកម្ពស់ខ្លះៗរបស់បណ្តាញសារព័ត៌មានប្រពៃណី ក្នុងនេះក៏មានផ្តល់ជូនយុទ្ធសាស្រ្តមួយចំនួនទៀតដូចជាទី១ ប្រព័ន្ធផ្សព្វផ្សាយប្រពៃណី ត្រូវអភិវឌ្ឍន៍ខ្លួនដោយចាប់យកប្រព័ន្ធបច្ចេកវិទ្យាឌីជីថល ក៏ដូចជាការធ្វើយ៉ាងណាពង្រឹងសមត្ថភាព និងប្រើប្រាស់មធ្យោបាយនានាក្នុងការស្វែងរកចំណូល»។

សូមជម្រាបជូនថា សម្រាប់រយៈពេលវែង ដើម្បីធានានិរន្តរភាពនៃប្រព័ន្ធផ្សព្វផ្សាយបែបប្រពៃណីនោះ ក្រសួងព័ត៌មានបានដាក់ចេញវិធានការមួយចំនួនដូចជា៖ ១. ពិនិត្យមើលឡើងវិញ និងពិនិត្យមើលគំរូអាជីវកម្មដែលមានស្រាប់គំរូអាជីវកម្មបច្ចុប្បន្នអាចមិនពាក់ព័ន្ធ ឬលែងពាក់ព័ន្ធរៀនពីការអនុវត្តល្អបំផុតនៃគំរូអាជីវកម្មប្រកបដោយភាពច្នៃប្រឌិត ដោយប្រើប្រាស់បច្ចេកវិទ្យាថ្មី ធ្វើពិពិធកម្ម និងពង្រឹងគុណភាពនៃការចែកចាយខ្លឹមសារ។ ការធ្វើពិពិធកម្មនៃស្ទ្រីមចំណូល (គំរូសមាជិកភាព និងការជាវ ការឧបត្ថម្ភ មាតិកាម៉ាកយីហោ ពាណិជ្ជកម្មអេឡិចត្រូនិក និងទីផ្សារសម្ព័ន្ធ ការបង្ហោះព្រឹត្តិការណ៍ និងវេទិកាភាពជាអ្នកដឹកនាំគំនិត ជំនួយឥតសំណង និងមូលនិធិស្ថាប័នសម្រាប់សារព័ត៌មានផលប្រយោជន៍សាធារណៈ) ការផ្ដល់មូលនិធិ និងការបរិច្ចាគសាធារណៈ។ ២. សិក្សាអំពីអាកប្បកិរិយារបស់អតិថិជនថ្មី និងអាចបំពេញតម្រូវការរបស់ពួកគេដោយគិតពីគុណភាពមាតិកា ភាពពាក់ព័ន្ធ និងរយៈពេល។ ៣. ជំរុញវប្បធម៌នៃការរៀនសូត្រពេញមួយជីវិត ដែលអ្នកជំនាញផ្នែកសារព័ត៌មានត្រូវបានបន្តជំនាញខាងសារព័ត៌មាន (ក្រមសីលធម៌ បច្ចេកវិទ្យា ការប្រើប្រាស់ទិន្នន័យ និងការនិទានរឿងតាមឌីជីថល)។ ៤. បណ្ដុះបណ្ដាលភាពជាអ្នកដឹកនាំប្រកបដោយភាពច្នៃប្រឌិត និងការគិតបែបសហគ្រិននៅក្នុងស្ថាប័នប្រព័ន្ធផ្សព្វផ្សាយ ដើម្បីជំរុញការផ្លាស់ប្តូរ គ្រប់គ្រងហានិភ័យ និងចាប់យកឱកាសទីផ្សារថ្មី។ ៥. ដើម្បីវិនិយោគ និងទទួលយកបច្ចេកវិជ្ជាថ្មី (ដើម្បីរស់រានមានជីវិត) (វាជាជីវិត និងបញ្ហាដែលស្លាប់) វិនិយោគលើការចែកចាយមាតិកាពហុវេទិកា ធានានូវភាពងាយស្រួលតាមរយៈប្រព័ន្ធឌីជីថល ទូរស័ព្ទ និងប្រព័ន្ធផ្សព្វផ្សាយ៕

ដោយ៖ មករា រូបថត៖ លន ហ្សាឌីណា